Өмнөговь аймгийн ИТХ-ын дарга Х.Түмэнбаяр улстөрөөс арчигдлаа

Өмнөговь аймгийн “Шейх” болсон Хүүгийн Түмэнбаяр өнгөрсөн оны 11 дүгээр сарын 26-ны өдөр буюу Улс тунхагласны баярын өдрөөр ИТХ-ын даргаар сонгогдож тамга тэмдэгээ хүлээж авсан. Гэтэл жилийнхээ ойн дээр ч ирэлгүй өчигдөр буюу долдугаар сарын хоёрны өдөр үүрэгт ажлаасаа халагдаж, улстөрөөс хөөгдсөн нь түүний хийсэн “но”-той, “ноц”-той үйлдлүүдтэй холбоотой аж.  

Улстөрийн байдал ширүүсч авлигачид нийгмээс арчигдаж байгаа энэ үед намууд өөрсдөөсөө эхлэн цэвэрлэгээ хийх ёстой гэсэн байр суурийг хаа хаанаа илэрхийлж байгаа төдийгүй “но”-той, “ноц”-той үйлдэл хийсэн нөхдүүдээ хаацайлахыг нь хаацайлж, хавирахыг нь хавирч байгаа.

Мөн үүнээс гадна намын нэр нүүр баасдаж байгаа нөхдүүдийг улстөрөөс шууд “арчих” бодлого барьж байгаа бөгөөд энэ удаагийн алчуурны үзүүрт Тавантолгой ХК-ийн гүйцэтгэх захирал асан, Өмнөговь айигийн ИТХ-ын дарга Хүүгийн Түмэнбаяр өртжээ. Намынхаа нэр нүүрийг шавар шавхайтай хольж, хамгаалахын аргагүй олон асуудал ургуулсан түүнд төр төмөр нүүрээ харуулж эхэлсэн гэхэд буруудахгүй.

Хэдэн сарын өмнөөс АТГ болон прокурорын газарт аргамжигдсан түүний хууль бус үйлдлийнх нь нэгээр хоёр хүүхдийн амь насны асуудал яригддаг. Үүний дараа шил даран гарч ирсэн “но”-той, “ноц”-той үйлдэл нь уурхайн нүүрс ачих эрхийг үнэ төлбөртэйгээр олгож, эндээс олсон орлогоо өөрийнхөө халаасанд хийж байсан үйлдэл юм.

Түүнчлэн Өмнийн говьд босгосон Хан-Уул нэртэй тансаг зочид буудлаа хаанаас орж ирсэн ямар мөнгөөр босгосон нь Өмнөговийн ард түмний хувьд  асуултын тэмдэг байдаг ч тус аймагт хэмжээлшгүй эрхэт хаанчлалаа бий болгосон тэрбээр хариу өгдөггүй нь хардлага сэрдлэг улам лавширахад хүргэдэг. Түүгээр ч зогсохгүй Хан-Уул зочид буудлынхаа хажууд байрлах авто зогсоол дээр бас нэгэн барилга сүндэрлүүлэх санаа тээж явдаг шунал нь түүнийг улстөрөөс уяаад аргамжаад байдаг биз. Ямартай ч Өмнөговь аймгийн Засаг даргын суудал руу нүд улайлгадаг тэрбээр хүчин мөхөсдөж ИТХ-ын даргын суудалд сууж чадсан ч нүгэл нь нүдээрээ гарч өдгөө албан тушаалаасаа өчиггүйгээр арчигдсан юм.

Хамгийн сүүлд л гэхэд иргэн Г.Амарсанаагаар бариулсан байр сууцныхаа хөлс мөнгийг өгөлгүй луу унжсан төдийгүй, хомхой сувдаг, хударгагүй зан гарган ажилчдыг нь хүртэл урвуулсан асуудал нь түүнийг хэвлэлийн баатар болгосон “но”-той, “ноц”-той түүхтэй. Түүний эл бусармаг үйлдлийг сонссон намынхан нь сүжиг буурч асуудлыг хуулийн дагуу шийдвэрлүүлэх тухай ч хоорондоо жиг жуг гэлцээд авсан гэх “бор шувуу” бий. Тэгэхээр авлигачдыг арчих төлөвлөгөөний энэ удаагийн сценарийн гол дүрээр Х.Түмэнбаяр тодорчих шиг боллоо.

Түүнийг хаацайлж хамгаална гэхэд арай дэндүү олон асуудал байгаа учраас “золигт” гаргачихаж мэдэх л юм. Улстөрийн өрсөлдөөн ширүүсэж, бүр сүүлдээ намынх нь нөхдүүдээс өө сэв эрж өлөн нүдэлдэг нөхдүүдэд Х.Түмэнбаярыг үг, үйлдэл бүхэн нь сонирхолтой сэдэв болж байгаа нь тодорхой. Өнгөрсөн хугацаанд түүний хэлсэн үг, хийсэн үйлдлүүд нь ч авлигыг тонших шонхоруудад хангалттай олз болж буй.

Ямартай ч Өмнөговьд улстөрийн амьдрал халуунаар буцалж халаа сэлгээ явагдчихлаа. Түүний оронд ИТХ-ын даргаар өмнө нь тус албыг хашиж байсан Л.Батчулуун томилогдсон бөгөөд Хүүгийн Түмэнбаяр Л.Батчулуун нар харш нөхдүүд. Жилийн өмнө Л.Батчулуун хавиргаа хугартал зодуулсан явдал нь тавантолгойн хувьцааны асуудалтай холбоотой бөгөөд өст хүн өлийн даваан дээр гэгч болж байна. Улстөрөөс арчигдсан Х.Түмэнбаярын дараагийн нүүдэл хаана “шаглах”-ыг харж л байя.