Ерөнхийлөгч тохиролцсоныхоо дагуу Н.Энхбаярыг чөлөөлөв үү?

Экс Ерөнхийлөгч Н.Энхбаяр эрхэм Ерөнхийлөгч Ц.Элбэгдоржийн уучлалаар эрх чөлөөт нэгэн боллоо. Хэдхэн хоногийн өмнө АТГ-аас Н.Энхбаяртай холбоотой хэд хэдэн газар нэгжлэг хийж сүрийг бадруулахад “экс”-ийг дахин намнах сонирхол байна уу гэх хар хэн хүнд төрж байсан бол, тэр нь эсрэгээрээ үр дүнг дагуулав. Ер нь тэдгээр нэгжлэгүүдтэй зэрэгцэн МАХН-ын гишүүн, хуульч  Л.Эрдэнэтуул нарын нөхдүүдийн амнаас унасан үгс эрхгүй анхаарал татаж байсан билээ. Л.Эрдэнэтуул хэлэхдээ “... Н.Энхбаяр дарга бид хоёр, Ардчилсан нам болон Ерөнхийлөгчтэй ярьсан яриа байсан. Уг яриа хэлцлийг баримтжуулсан бичлэг ч байгаа. Н.Энхбаяр даргад эмчлүүлэх боломжийг нь өгнө, улмаар цагаатгах талаар ярилцсан. Гэтэл хэлсэн үгэндээ хүрсэнгүй. Тийм болохоор нийт Ардчилсан намынханд хандаж, та нар ичээч ээ хэлсэн ярьсандаа эр хүн шиг хүрээч ээ. Одоо бүр авгай хүүхэн, хамаатан садангаар нь оролдож байна. Тийм мундаг юм бол өөрийнхөө намын шалгах ёстой хүмүүсээ шалгаач гэдгийг л хэлмээр байна.” хэмээн ярьсан билээ.

Сонирхолтой нь талуудын хооронд ийм яриа болсон тухай асуудал сөхөгдөөд хэдхэн хонож байхад Ерөнхийлөгчийн уучлал үзэглэгдэв. Ямартай ч Л.Эрдэнэтуулын хэлсэнчлэн АН-ынхан экс Ерөнхийлөгчийг цагаатгах тухай асуудлыг тулж суугаад ярилцсан нь үнэн юм бол, тэд тохиролцооноосоо ухрах оролдлогыг ч бас хийсэн харагдаж байгаа. МАХН-ын дотоодоос гарсан мэдээллээр  6 болон 7 дугаар саруудад Н.Энхбаярыг суллана гэх молигыг  АН-ынхан дараалан үмхүүлсэн бөгөөд  МАХН-ын Гүйцэтгэх товчоо хуралдаад Засгийн газар дахь зургаан сайдаа татахаар болсон гэх мэдээллийг өгч байсан. Гэхдээ энэ санал дээр эргэлзээ үүссэн нь дараа нь тодорхой болсон юм.

Харин одоо Н.Энхбаяр наранд гарлаа. Сануулахад, экс Ерөнхийлөгч өнгөрөгч дөрөвдүгээр сард ялаас чөлөөлүүлэх хүсэлт гаргаж байсан. Тэрээр Шүүхийн шийдвэр гүйцэтгэх байгууллага, Эрүүл мэндийн яам, Улсын Ерөнхий прокурорын газарт гаргасан хүсэлтдээ ““Миний бие өнгөрсөн жилийн өлсгөлөнгөөс хойш сул дорой хэвээр байгаа бөгөөд мэргэжлийн эмч нарын комиссын хувьд удаа дараагийн дүгнэлтээрээ эрүүл мэндийн  шалтгаанаар ял эдлэх боломжгүй гэж гарсан. Энэ бүхнийг харгалзан үзэж, намайг эрүүл мэндийн шалтгаанаар хуулийн дагуу чөлөөлөх асуудлыг яаралтай шийдэж өгөх хүсэлтийг тавьж байна.

Мөн миний биеийг мэргэжлийн эмч нар гадаадад яаралтай явж эмчлүүлэх шаардлагатай гэсэн дүгнэлт гарсныг харгалзан үзэхийг хүсч байна. Н.Энхбаяр” гэсэн байсан.

Харин прокурорын газраас түүний хүсэлтийг  хянаж үзээд ялтныг өвчний учир ялаас чөлөөлөх Хууль зүй дотоод хэргийн сайд, Эрүүл мэндийн сайдын хамтарсан тушаалд заасан шаардлаг а хангаагүй байна гэж үзсэн.

Н.Энхбаярын намын гишүүн, УИХ-ын О.Баасанхүү экс Ерөнхийлөгчийг суллах боломжийн талаар өнгөрөгч онд ярихдаа “Бид эхний ээлжинд Нийт шүүгчдийн хурлаар оруулахаар Шүүхийн Ерөнхий зөвлөлд хандана. Мөн цагаатгалын комисст хандана. Цагаатгах бололцоо нь бол энэ улс төрийн хэрэг. Хүний эрхийнхэн энэ бол улстөрийн хоригдол мөн гэдгийг тогтоосон. Монгол Улсын Ерөнхийлөгч уучлалт үзүүлэх ч гарц бий. Н.Энхбаяр Ерөнхийлөгч намайг уучлаач гэж царайчилж явахгүй байх. Харин миний хувьд улс төрийн хоригдол мөн учраас цагаатгалын комисс шийднэ. Цагаатгах гарц бий” гэж байсан.

Тэгэхээр Н.Энхбаяр уучлал гуйж царай алдаагүй ч, Ц.Элбэгдорж түүнийг уучилчихлаа. Ард нь ямар тохироо байгаа нь удахгүй тодорхой болох биз.