М.Батчимэг: Төр мах, нүүрс зарах ажлаа болих ёстой

Өнгөрсөн саруудад Монгол Улсын Засгийн газар, Монголбанк хоёр үнэ тогтворжуулна гэсэн үндсэн чиглэлийг барин баахан ажиллав. Үр дүнг нь одоо харвал гомдмоор нөхцөл байдал үүсэх янзтай байна. Ам.доллар төгрөгийг барьж идэх дээрээ тулж, монгол төгрөг зүгээр цаас болон хөл доор хөглөрөх нь. Одоо нөгөө үнэ нь  өсч болдоггүй айхтар зүйлсийн ханш өсөх эрсдэл нэгэнтээ тулаад байна. Гэтэл Засгийн нөхдүүд бондын долларыг эдийн засагт зөв оруулж,  тогтвортой байдлыг бий болгохын оронд шалдар булдар хэмжээнд асуудал яриад сууж байна. Үүнийх нь ч эсрэг байр сууриа илэрхийлэх улстөрчид байгаа юм. УИХ-ын гишүүн М.Батчимэг “...Төр мах, нүүрс зарах ажлаа больж, макро түвшний ажлуудаа сайн хийдэг болсон үед л хөгжил зөв явна... Одоо сурагчийн дүрэмт хувцсыг хүртэл төр мөнгө гаргаж оёулдаг, компаничилж шахдаг болж байна! Монгол ийм байдлаар хөгжихгүй байх аа.” хэмээн ярьж байна.