Инээд, ханиад ээлжилсэн УИХ-ын чуулган ба ”Микроны босс”

УИХ-ын чуулганы өнгөрөгч долоо хоногийн  хуралдаанаар  2014 оны Төсвийн төсөл болон дагалдах хуулийн төслүүдийн асуудлаар гишүүд саналаа илэрхийлсэн.

УИХ-ын гишүүн Ц.Нямдорж  энэ үеэр Ерөнхий сайдыг хүчтэй шүүмжилж байгаа харагдсан. Тэрбээр “Өчигдөр, өнөөдөр өрнөж байгаа хэлэлцүүлгийг хараад үнэхээр харамсч байна. Өчигдөржингөө микро гэдгээ гайхаж, чуулганы хуралдааныг инээдэм ханиадам болголоо. УИХ-ын гишүүдийг арай л доромжилж байгаа юм биш үү. УИХ дээр Засгийн газрын гишүүд, сайд нар худал ярих нь энгийн үзэгдэл болж. Улс орны ирэх оны төсвийг хэлэлцэж байхад номхон команд авсан цэрэг шиг зогсч байгаад танилцуулах ёстой. Хуралдааныг даргалж байгаа дэд дарга Р.Гончигдорж та яагаад инээгээд суугаад байгаа юм. Энэ хурлыг горимд нь явуулаач. Толгой ч алга. Үнэхээр микро Ерөнхий сайд, микро Засгийн газар гэдэг нь батлагдлаа. Миний саналыг эхлээд сонс Н.Алтанхуяг аа. Чам шиг сайд наймыг  үзсэн. Өнөөдөр 35 тэрбумаар шорон барих гэж байхад С.Эрдэнэ сайд яагаад чимээгүй суугаад байгаа юм. Намайг сайд байхад Ганц худагийг шинээр барих гээд  таван тэрбум төгрөг төсөвлөж байхад түүнийгээ цэцэрлэг болго гэж байсан биз дээ” гэх зэргээр бухимдлаа илэрхийлээд авсан.

Харин өчигдөрийн хуралдаан дээр  УИХ-ын гишүүн Ж.Батзандансайдад хандан ширүүхэн шүүмжлэл шидэж орхиход.
Ерөнхий сайд  “Намайг гүтгэж, доромжилж болно оо. Та нар намайг нүүрсчин гэнэ үү, микрочин гэнэ үү яаж ч доромжилж болно. Хамгийн гол нь ард түмэнд буруу ойлголт өгч байгаа нь дуугарахаас өөр аргагүй байдалд оруулж байна.

Үрэлгэн төсвийг хумисан нь зарим хүний уурыг хүргэж байх шиг байна. 60 тэрбумаар хоёр биш зургаан байшин баримаар байх юм. Авлига шингэсэн төсөв гэж нэрлээд байгаа нь буруу. Та нар нэг байшин барихдаа 10 тэрбумыг зарцуулж байгаа чинь авлига шүү дээ.

Тийм учраас УИХ-ын эрхэм гишүүдээс нэгэн зүйлийг хүсэхэд аливаа зүйлд бодитой хандаж, тооцоо тоотой байж ард түмэндээ зөв ойлголт өгөх нь чухал. Шинэчлэлийн Засгийн газрын хамгийн гол гурван баримталж байгаа асуудлыг дахиад хэлье.

Ард түмнийхээ ахуй амьдралд хэрэгтэй зүйлийг ярих л болно. Авлигыг таслан зогсооно. Төрийн хүнд суртлыг арилгана гэдэгтээ тууштай зогсч байгаа” гэсэн юм.