Ж.Энхбаяр Ц.Нямдоржийн хажууд Генсекээр ирвэл УИХ-ын гишүүнээс татгалзахад бэлэн үү?

МАН-ынхны сэтгэл гэгэлзээд байгаа янзтай. Шинэчлэлийн хорооны нөхдүүд их хурал эхлэхэд тав хоног үлдлээ хэмээн сошиал сайтуудаар бичээд л ... За арга ч үгүй биз. Ингээд уруудсанаараа өнхөрчихвөл МАН-чуудад тун халгаатай юм болох учраас. Ерөнхийдөө бол энэ удаагийн их хурал нь тэднээс эв нэгдлийг эхний ээлжинд шаардаж байгаа нь хөндлөнгөөс харагдаж буй. Гэхдээ энэ бол нэг өнцөг байж болно. Тэгээд нөгөө талаас шинэчлэл энэ тэрээс гадна ирээдүйн удирдлагуудын томилгооны асуудал нийгмийн анхааралд байгаа. Намын дарга болоод Генсекийн суудалд хэн суух вэ гэдэг асуултын хариулт хэд хэдэн хувилбарын дагуу яригдаж байгаа.Манай сайт МАН-ыг залах боломжит хоршилуудын тухай болоод, эрх мэдэлд эргэн хүрэхээр төлөөний хүмүүсээ зүтгүүлж байгаа туршлагатай улстөрчдийн тухай өгүүлсэн.

Тэгвэл намын даргад хоёулаа нэр нь яригдаж байгаа Ц.Нямдорж, Ж.Энхбаяр нар хоршоод ороод ирвэл ямар вэ гэсэн нэг хувилбар байна. Улстөр дэх зангараг, зүтгэсэн зүтгэл,  байр суурин дээрээ тууштай зогсдог гэхчлэн давуу талуудаараа даац үнэртүүлж байгаа Ц.Нямдоржийг шинэчлэгч гэж харахад тиймхэн ч, хэрэв тэр 70-аад оныхны нэг болох Ж.Энхбаяртай хоршчихвол боломжийн байж болох юм. Хөнжилдөө хууль зассан гэгдэж буруутаж явсан Ц.Нямдорж түрээсийн байранд амьдардаг гэх итгэл үнэмшил хөндсөн сэдвээр ярьж олны анхаарлыг татаж байсан ч, зарим нэгэн шигээ газрын наймаагаар задартал хөлжихдөө хүрээгүй нэгэн гэдэг нь ерөнхийдөө ил харагддаг.

Шинэчлэл гэж орилсноороо шинэчлээд сүйд болчихдог юм биш гэдгийг  намынхаа залууст хатуухан хэлж суугаа тэрээр арваад жил хууль зүйн салбарын толгойд суухдаа улстөрийг дарамталсан рецедив гэмт хэрэгтнүүдийг дарж чадсан гавьяагаа хаа ч ярих дуртай. Тэгж цэвэрлэж чадсан салбарыг хүлээлгэж өгсөн гэдгээ хэн хүний өмнө хэлж суудаг. Тэгэхээр улстөрийг бизнест ашиглаж улайн цайм хөлжсөн хүмүүсээс арай өөр имижтэй түүнийг МАН-ын даргын суудалд суулгахдаа хажууд нь Ж.Энхбаярыг авчирвал олон нийтийн итгэл үнэмшил өөр тийш эргэж бас болох. 70-аад оныхон түүнийг илүү эерэг харагдуулж чадах байх. 

Нас залуу  ч МАН-ын ирээдүйг зурах нь тодорхой Далаад оныхны төлөөлөл болсон  Ж.Энхбаярын тухайд эрх баригч намынхны өөдөөс хүчтэйхэн тод хоолойгоор дуугарч чадаж байгаа нэгэн. Харьцангуй хараат бус улстөрчийн шинж тэмдэг харагдах түүнийг намын даргын суудалд сууж болох талаар  гарсан шумыг  тэр бас өөрөө бататгасан ч, энэ удаад тэр Генсекийн суудалд, тэртусмаа Ц.Нямдоржтой хамт намаа удирдахад болохгүй гэх газаргүй. Бас  Я.Содбаатарын хувьд Ц.Нямдоржтой зохицож болох ч, түүнээс илүүгээр Ж.Энхбаяр нь зохимжтой байж мэдэхээр юм.

Гэхдээ нэг асуудал бий. Намын Ерөнхий нарийн бичгийн даргын албан тушаал бол Орон тооных. Тэгэхээр Ж.Энхбаярын тухайд Генсек болохоор болвол УИХ-ын гишүүнээс татгалзаж чадах уу гэдэг асуудал байгаа. Ц.Нямдоржтой хамтраад бусдыгаа манлайлаад 16 оны сонгуульд ялалт байгуулвал тэр байтугай гавьяа түүнийх болох нь дамжиггүй. Тэгэхээр нэг талаас нэлээд хариуцлагатай сонголтын бас хариуцлагын өмнө тэр ирж ч мэдэх л юм.