МАН-ын дарга Б.Бат-Эрдэнэ үү, М.Энхболд уу?

МАН-ын даргыг шинэчлэх энэ удаагийн шийдвэр нь намдаа шинэчлэлийг хийж чадах хариуцлагатай үүргийг хүлээж, хэрэгжүүлж чадах хүнийг сонгох тухай асуудал. Тэгсэн ч улстөрийн эрх мэдлийг авах эцсийн зорилгыг өвөртлөсөн улстөрийн нам дотооддоо эрх мэдлийн төлөөх марафоныг явуулдаг бичигдээгүй хуультай. Тэр дагуу С.Баяр, Сү.Батболд нар хувьчилсан тохироо хийж Н.Энхболдыг намын даргын суудал руу зүтгүүлээд байсан ч, тэд эцэстээ өөр хувилбар дээр нэгдээд байгаа аж. Нэг ёсондоо М.Энхболдын эсрэг аваргыг зүтгүүлж байгаа хэрэг аж. Өнөөдрийн тухайд МАН-д  хамгийн нэр цэвэр  гэхээсээ хэлснээ хийж чадах хүн хэрэгтэй байгаа.Тэгж харвал улстөрийн тавцан дахь орон зай болоод өнгөрсөн жилүүдийн туршлага сэлтээрээ давж гарах нь М.Энхболд юм.

Уг нь намын даргын суудалд суух боломжтой хүмүүсээр М.Энхболд, Ц.Нямдорж, Н.Энхболд, Ж.Энхбаяр нарын нэрс жин дарж яригдаж байсан бол энэ удаад М.Энхболд, Б.Бат-Эрдэнэ гэсэн хоёр эрхмийн нэг нь намын даргын суудалд томилогдох хувилбар гишүүдийг талцуулж байгаа аж. Түүнчлэн өнөө шөнө намын их хуралд чуулсан гишүүд хэлэлцээд намын шинэ даргынхаа нэрийг тодорхой болгох юм байна. Ер нь намын дарга хэн байх вэ гэдэг асуултын хариулт болсон хувилбарууд дунд хаа нэгтээ яригдаж байсан аварга энэ удаад, эцсийн мөчид ийнхүү нэр нь тодорч байгаагаас үзэхэд М.Энхболдын эсрэг бүлэглэлүүдийн эртнээс төлөвлөсөн сценари ч байж болох. Гэхдээ МАН-ын гэгээ муутай өнгө төрхийг харахаар энэ удаадаа тэр бүлэгчилсэн хорын найруулгаасаа нэг удаа татгалзаад намдаа өөрчлөлтийг дагуулж чадах хүнд эрх мэдэл олгохын сацуу хариуцлага хүлээлгэх нь зөв алхам болж болохыг тодотгоход илүүдэхгүй болов уу. 

Ямартай ч эр нь бүрэн тодорхой болоод байгаа хоёр өрсөлдөгчийн хэн нь МАН-ыг даргалахад хамгийн боломжтой бөгөөд туршлагатай вэ гэдэг дээр намын их хуралд оролцогчдын байр суурийг сонирхоход  М.Энхболдыг дэмжигсэд олон байна. Сайн саарын аль алинтай нь нэр холбогдсон ч, өнгөрсөн жилүүдэд улстөрчийн хувьд бүрэн төлөвшсөн. Засгийн газрын тэргүүнээр нэг удаа, Шадар сайдаар гурван ч удаа томилогдон  ажилласан гэхчлэн харвал хууль тогтоогчийн туршлагаас гадна гүйцэтгэгчийн зангараг ч түүнд бий. Мөн хийхээр зүтгэсэн бол заавал ард нь гардаг характерыг нь аваад үзсэн ч энэ удаа түүнийг л томилох нь зөв гарц хэмээн хэлэгсэд байна.

Харин түүнтэй энэ удаа намын даргын сунгаанд өрсөлдөж байгаа Б.Бат-Эрдэнэ аваргын хувьд МАН-ыг шинэчлэлд хошуучлан дагуулах улстөрч мөн үү? гэдэг дээр үгүйсгэсэн байр суурьтай гишүүд байна.  Өнгөрөгч зургадугаар сард болсон Ерөнхийлөгчийн сонгуульд тэрээр намаасаа нэр дэвшин гаргасан амжилт сайн байсныг үгүйсгэж болохгүй. Гэхдээ Монголчууд Монгол Улсын Ерөнхийлөгчийн статусыг өдийг хүртэл ард түмний эв нэгдлийг илэрхийлэгч гэсэн билэг тэмдэг маягийн ойлголтоор гүн бат хүлээж авсан хэвээр байгаа нь Монголчууддаа аварга хэмээн хүндлэгдэн ирсэн Б.Бат-Эрдэнэ аваргыг өндөр хувийн санал авахад хүргэсэн хэмээн дүгнэж хэлэх хүмүүс бий.

Түүнчлэн таван сонгуульд дараалан унасан МАН-ыг шинэчлэгдсэн улстөрийн хүчин болгож босгож ирэхэд энэ хоёр хүний хэн нь илүү тохирох бол гэдэг асуултын хариултыг МАН-ын Их хурлын гишүүд энэ шөнө хуралдаад эцэслэн тодорхой болгох нь ээ.