Гишүүд оффшорыг хамгаалав

О.Баасанхүү, Н.Батцэрэг, Х.Тэмүүжин нараас өргөн мэдүүлсэн Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуульд нэмэлт оруулах тухай хуулийн төслийн хэлэлцэх эсэх асуудлыг Төрийн байгуулалтын байнгын хорооны хуралдаанаар хэлэлцлээ. Энэ талаар төсөл санаачлагч гишүүн О.Баасанхүү танилцуулга хийсэн юм. Уг хуулийн төсөлд Үндэсний аюулгүй байдлын зөвлөлийн гишүүн нь уг албан тушаалаас чөлөөлөгдсөнөөс хойш 8 жилийн хугацаанд гадаадын хөрөнгө оруулалтай аж ахуйн нэгжийн төлөөлөн удирдах зөвлөл болон хяналтын зөвлөлд сонгогдож ажиллахыг хориглохоор тусгажээ.

Хуулийн төсөлтэй холбогдуулан асуулт асууж, үг хэлсэн гишүүд төсөлд 8 жил гэж заасан нь хугацааны хувьд урт байж магадгүйг хэлэлцүүлгийн шатанд анхаарах хэрэгтэй гэж байв. Ингээд байнгын хорооны гишүүдийн олонх нь хуулийн төслийг хэлэлцэхийг дэмжиж, энэ тухай санал, дүгнэлтээ чуулганы нэгдсэн хуралдаанд оруулж хэлэлцүүлэхээр тогтлоо.

Мөн хуралдаанаар гишүүн Ж.Батзандангийн санаачилсан Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуульд нэмэлт оруулах тухай, Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуульд нэмэлт оруулах тухай хуулийг дагаж мөрдөх журмын тухай хуулийн төслүүдийн хэлэлцэх эсэх асуудлыг хэлэлцсэн юм.

Уг хуулийн төсөлд төрийн улс төрийн, захиргааны болон тусгай албаны удирдах албан тушаалтан нь албан тушаалаа гүйцэтгэж байх хугацаанд болон уг албан тушаалаас чөлөөлөгдсөнөөс хойш хоёр жилийн хугацаанд өөрийн болон эхнэр /нөхөр/, өрхийн бүртгэлд бүртгэлтэй хамтран амьдардаг насанд хүрээгүй хүүхэд, эцэг, эхийн нэр дээр оффшор компани байгуулах, оффшор банк, банк бус санхүүгийн байгууллагад оффшор данс эзэмшихийг хориглох, мөн дээр дурдсан албан тушаалтан нь албан тушаалаа гүйцэтгэж байх хугацаанд болон уг албан тушаалаас чөлөөлөгдсөнөөс хойш хоёр жилийн хугацаанд өөрийн болон эхнэр /нөхөр/, өрхийн бүртгэлд бүртгэлтэй хамтран амьдардаг насанд хүрээгүй хүүхэд, эцэг, эхийн нэр дээр гадаад улсын банк, банк бус санхүүгийн байгууллагад хадгаламжийн болон харилцах данс эзэмших, банкны зээл авах, үл хөдлөх хөрөнгө өмчлөх болон гадаад улсад бүртгэлтэй аж ахуйн нэгж, компанийн үнэт цаас эзэмших тохиолдолд тухай бүр Авлигатай тэмцэх газарт мэдэгдэж байх, төрийн нууц, аюулгүй байдал, нийтийн ашиг сонирхлын үүднээс гадаад улсын харьяат эхнэр /нөхөр/-тэй Монгол Улсын иргэн дээр дурдсан албан тушаалд сонгогдох буюу томилогдох тохиолдолд түүнийг томилох эрх бүхий албан тушаалтан нь Үндэсний аюулгүй байдлын зөвлөлд мэдэгдэж байх, дээрх нь зохицуулалт нь төрийн болон орон нутгийн өмчит, төрийн болон орон нутгийн өмчийн оролцоотой хуулийн этгээдийн удирдах албан тушаалтанд нэгэн адил хамаарахаар тусгажээ.

Төсөл санаачлагчийн танилцуулгатай холбогдуулан асуулт асууж, үг хэлсэн гишүүд хуулийн төслийн оффшор гэсэн нэр томъёо нь оффшор бүс, оффшор банк, оффшор данс гэсэн ойлголттой уялдаа муутай байгаа, гэр бүлийн байдлаас болоод төрийн албан хаагчдад тодорхой хязгаарлалт тогтоох нь манай улсын нэгдэн орсон олон улсын гэрээ, конвенцуудтай зөрчилдөж болзошгүй байгаа учраас томъёоллоо нарийвчилж оновчтой болгох, хуулийн зохицуулалтад хамрагдах албан тушаалтнуудын хүрээг хумих хэрэгтэйг сануулж байв. Түүнчлэн зарим гишүүн төсөлд оффшор бүсийн талаарх төрийн бодлогын хандлагыг тодорхойлж оруулах, оффшор бүсэд бүртгэлтэй банк, санхүүгийн байгууллагатай хэрхэн харилцах асуудлыг нарийвчилж тусгах, төслийг Мөнгө угаах, террроризмыг санхүүжүүлэхтэй тэмцэх тухай хууль тогтоомжтой нийцүүлэх, байнгын хорооноос ажлын хэсэг гаргаж төслийг нухацтай ярилцах зэрэг санал хэллээ. Хуулиудын төслийг хэлэлцэх эсэх талаар санал хураалгахад байнгын хорооны хуралдаанд оролцсон гишүүдийн олонхын дэмжлэг авч чадсангүй.