Д.Бямбасүрэн: Эдийн засгийн тусгаар тогтнолоо худалдчихсан юм даа

Ерөнхий сайд асан Д.Бямбасүрэн гуайтай   олон сэтгүүлч уулзаж  улс төр, эдийн засгийн сэдвээр ярилцдаг билээ.  Харин энэ удаа түүнтэй  монголчуудын оюун санааны өв уламжлал,  түүний дархлаа, мөн эх орон,  тусгаар тогтнолын сэдвээр  уулзаж ярилцлаа. 

-Эрдэмтэн, зохиолч  Л.Түдэв гуайн нэгэн  ярилцлагыг үзэж суугаад  “Ташуураар хамгаалсан эх орноо тархиараа хамгаалах цаг ирлээ” гэсэн үгийг их гүнзгий хүлээж авлаа.   Тэгээд таньтай энэ сэдвээр ярилцья гэж бодоод хүрээд ирлээ.  

-Хичээе л дээ...

- Ташуураар хамгаалж болдог байсан эх орноо тархиараа хамгаалахгүй бол болохгүй нь гэсэн энэ өгүүлбэр  надад олон юм бодогдууллаа.  Үүнээс үүдээд монголчууд бидний оюун санаа хэр хүчирхэг билээ  гэсэн асуулт хариу нэхээд байх болов ?

- Зөв л дөө...   Хүн төрөлхтний хөгжлийн жам ёсыг   харлаа  ч тэр   оюун ухаан, оюун санааныхаа  хүчээр  амьдрах  цаг ирлээ.   XX зууныг хүртэл улс төрийн асуудал, амьдрах эс амьдрахаа  зэвсгийн хүчээр  шийддэг байлаа.  Ингэж явсаар XX зуунд бүр дэлхий даяараа   хоёр ч удаа дайтаж нийтээрээ   “зодолдож” үзлээ.  Энэ бүхнээс  хүн төрөлхтний олж авсан ухаарал бол  “оюун ухааны чадварыг олж авсан нь үлдэх юм байна” гэсэн ойлголт .    Гэхдээ энэ бол зөвхөн нэг талын ойлголт. Харин нөгөө талдаа тайлбарлах юм бол  их сонин. Одоо бидний амьдарч байгаа үеийн  Европын соёл иргэншил гэгддэг техникийн хөгжлийн иргэншил бол  хүний амьдралыг баталгаажуулах чадвараа улам бүр алдаж байна шүү дээ.   Тухайлбал, байгаль экологийн тэнцвэр алдагдах, хүний уг мөн чанарын доройтол, эрүүл мэндийн дархлаа байхгүй болж байгаа зэрэг нь одоо бидний туулж өнгөрүүлж буй соёл иргэншилтэй л холбоотой. Үүний оронд бий болох хүн төрөлхтний  цоо шинэ ёс жамыг бол Оюун мандлын соёл иргэншил гэж нэрлэдэг л дээ...  Үүнийг  анх  1920 оны үед Оросын залуу эрдэмтэн Вернадский   тодорхойлсон л доо.  “Хүний оюун ухаан байгалийн,  биологийн хүчин зүйлээс дутахгүй болно.    Хүн төрөлхтний соёл иргэншил бол байгаль дэлхийтэйгээ хамт хөгжих ёстой юм. Үүнээс  үүдээд   амьдрал орших уу,  эс орших уу гэдэг нь шийдэгдэнэ” гэж хэлсэн байдаг л даа.  Ер нь хүн төрөлхтний оршин тогтнох эсэх нь оюун ухааны хөгжилтэй л холбоотой юм.  Надад нэг сонин жишээ тохиолдсон юм.  Оросод философич мэргэжлээр улаан дипломтой төгссөн нэг нөхөртэй би 1980 аад оны сүүлчээр  хамт ажиллаж  байлаа. Түүнийг  1993 онд Филиппин рүү   сургалтад явахад   би тодорхойлолтыг нь гаргаж өгч байсан юм.  Тэгээд  нөгөөдөх чинь ирээд надад ярилаа л даа.  Филиппинд сургалтад сууж байтал нэг америк багш ирэээд энд монгол хүн байна гэж сонслоо гэхэд нь мань хүн годосхийж босоод баахан зовлон тоочиж.  Гэтэл нөгөө багш “Нэг сая 500  мянган км квадрат нутаг дэвсгэртэй, 25 сая малтай 2 сая хүн өлсөж байгаа бол танайд ерөөсөө 27 сая мал амьдарч байна гээд тооцчихвол яасан юм бэ” гэж хэлж. Байгаа баялгаа зөв ашиглаад оюун ухаанаа түшиж амьдарч чадахгүй байнаа л гэдгийг хэлж  шүү дээ. Ер нь тэгээд энэ хүний ертөнцөд чинь хоёр нарны хооронд нүүрээ харлатал мал дагаад ч, нуруугаа бөгтийтөл  газар ухаад ч  сайхан амьдарч болдоггүй л юм байна.  Хэн оюун ухаанаа түшиж оюун ухаанаараа амьдарч чадна тэр л сайхан амьдарна.  Гэтэл бид чинь улсаа хөгжүүлж байна гээд газрын баялгаа ухаад  гадагшаа зөөгөөд байдаг. Яахав хэдэн халтар төгрөг олж л байгаа байх. Харин тэрнийхээ хариуд  нэгдүгээрт, байгаль орчин газар нутаг маань сарны гадаргуу шиг боллоо. Гурваас дөрвөн мянган гол горхи ширгэлээ. Хоёрдугаарт, хүний оюун санаанд айхтар өөрчлөлт  гарч байна.  1960 –аад оны үед манайхан Германы уран бүтээлчидтэй хамтран  “Алтан өргөө”  гэж кино хийсэн.   Тэр кинонд өвөг дээдсийнхээ өвлүүлсэн эрдэнэсийн авдрын түлхүүрийг шуналтай хүү нь авч  авдрыг онгойлгоод  нутаг орноороо  хэрхэн  сүйрдэг тухай өгүүлдэг. Одоо яг л тийм болчихлоо.  Оюун ухаанаа л өөд нь татахгүй бол бид удам судар, орон нутагтайгаа сүйрнэ. Орчин үеийн дэлхий  ертөнц гэдэг чинь хөгжим эгшиглэсэн жаргалын өргөө биш. Өлссөн өлөн араатан хаа нэгтээ нь архирч л яваа. Тиймээс оюун ухаанаа хөгжүүлж,    давж сэтгэж явахгүй бол   тэднийхээ идэш болоод л дуусна.   Тиймээс өөрийн чинь энэ удаа хөндөж буй сэдэв цагаа олж. Бас Л.Түдэв гуай үнэхээр   мэргэн үг хэлж.

-Дэлхийн өндөр  хөгжилтэй орнуудын нэр хүндтэй томоохон компаниудад монгол залуус мэр сэр ажиллаж байна. Тухайлбал   “Google”, “aplle”-д  монголчуууд ажиллаж байх жишээтэй. Бахархаж байна тэднээр. Гэхдээ  нөгөө талдаа гомдмоор, бас харамсмаар.  Бид оюунлагуудаа гадагш алдчихаж. Бид уураг тархиа гоожуулчихаж... Бид тэднийгээ дотооддоо зүтгүүлж чадахгүй байна шүү дээ?

-Тийм л дээ... Яг үнэн. Монгол хүн Францын машины үйлдвэрт зохион бүтээгчээр , монгол хүн Германд технологчоор ажиллаж байна.  Монгол хүн Microsoft-д ажиллаж алмайруулж байна гээд тоочих юм бол монгол хүн авьяас билгээ гайхуулж байгаа нь  цөөнгүй.    Яагаад ийм хүмүүсээ эх орондоо ажилуулж чадахгүй байна гэвэл хоёр гол зүйл байна.  Нэгдүгээрт,  Монголд оюун ухааныг үнэлэхгүй байна. Тэр хүмүүсийг тэнд  ажиллаж амьдрах нөхцөл бололцоог нь хангаж өгөөд ажил хөдөлмөр хийх таатай орчин бүтээж өгч чадаж байна. Энэ нэг тал нь. Нөгөө тал нь гэвэл  орчин үеийн дэлхийн философиор  бол    оюуны хүчийг өөртөө татаж чадсан  л  улс орон хөгжинө.  Тийм болохоор  “Тархины хулгайч “ гэж нэрлэдэг дээ.  Үүгээрээ  ч өрсөлддөг болчихож.  Ийм хоёр хүчин зүйлийг бид бий болгож чадахгүй байгаа болохоор хүмүүс маань гадагшаа яваад байгаа юм.

-1990-ээд оны эхээр ихэнх айл  хамаг номоо зарж, ном гудамжинд хөлийн  дор хэвтэж байлаа. Харин одоо ном гоё дэлгүүрийн лангуунд заларч хүмүүс олон ном уншсанаа гайхуулдаг болов. Ном уншиж оюун ухаанаа  тэлэх соёл хэлбэр талаасаа хөгжөөд байх шиг санагдах юм. Энэ талаар таны бодол?

-Ном олон янз шүү дээ. Ном бүрийг унших ч ёстой юм биш. Манай монголчууд бол номыг их ариун нандин зүйл гэж шүтэж биширсээр ирсэн. Ном байтугай бичигтэй цаасан  дээгүүр алхдаггүй  байсан. Үүний цаадах утга нь тэр номын дотор өгүүлсэн зүйл бол ховор нандин эрдэнэтэй дүйхүйц гэж үздэг байсантай холбоотой.  Харин орчин цагт бол зөвхөн ном төдий биш интернэт, телевизээр ч мэдээлэл орж ирж байна. Ном их уншдаг болсондоо ч биш юм. Угаасаа хүн амьтан чинь ямар нэгэн танин мэдэхүйн хэрэгцээ гэсэн хөшүүрэгтэй л дээ.  Түүнийхээ шаардлагаар янз бүрийн мэдээлэл авч байгаа. Харин тэр мэдээлэлд  нь хэрэгтэй  зүйл ч бий,  хэрэггүй эргээд  ус болох ч үйл бий байх.

-Энэ цаг  үеийн улстөрчид, нийгмийн зүтгэлтнүүд “Би их уншсан...би их мэдсэн” гэдэг имиж бүрдүүлдэг.  Гэвч яг үнэн чанартаа оюун ухаанаараа нийтэд хүлээн зөвшөөрөгдөж, тэр мэдлэгээрээ бусдыг хөтөлж өмнөх замыг нь гэрэлтүүлж яваа нь харагдахгүй юм.  Тэд дүр эсгээд байна тийм үү? 

-Миний хувьд гэх юм бол  долоон төрийн тэргүүний нүүрж үзжээ гэж хэлэх юм уу даа. Чойбалсангийн үед бол бага байсан даа. Түүнээс хойшхи төрийн тэргүүнүүдтэй уулзаж ярилцаж, ажил төрлийн холбоотой байж заримынх нь удирдлагад төрийн үйл хэрэгт  зүтгэж л явлаа. Сүүлийн үеийн төрийн зүтгэлтнүүдээ хараад байхад өмнөхөөсөө  мэдлэгийн  хүрээгээрээ   үнэхээр явцуурчээ  гэж би хэлнэ. Ю.Цэдэнбал гуай, Ж.Батмөнх гуай нар бол тухайн  үеийнхээ эрдэм номын чинад хүртэл боловсорсон, эрдэмтэй хүмүүс байлаа шүү дээ.  Тэрнээс гадна дорныхоо ном сургаалийг үзэж гэгээрсэн хүмүүс ч байсан л даа.  Нэг сонин юм одоо ч сэтгэлээс гардаггүй юм. Улс төрийн товчоонд  Моломжамц гээд өвгөн настай хүн байх.  Аливаад  их голч байр суурьтай ханддаг хүн байлаа.  Зөвлөлтөд 1948 онд  сургууль төгссөн сэхээтэн хүн.  Залуучууд бид яахав дээ түүнийг нөгөө л марксистүүдийн нэг гэж боддог байхгүй юу.  Заримдаа хүмүүс   “ Төв хорооны Санхүүгийн хэлтсийн Санжаацамц тэр хоёрыг   Их тэнгэрийн аманд хурал хураад байх юм аа ” гэхэд тоглоом байлгүй гээд шоолоод л явдаг байлаа.  Гэтэл 1988 онд би Удирдлагын институтын захирал  хийж байхдаа Төв номын санд  Нагаржунайн  73 бадагтыг  үзэх санаатай  хоёр гурав хоног суулаа. Тэгсэн Моломжамц гуай дууддаг юм байна. “Би хоёр гурав хоног чамайг эрээд  олсонгүй чи хаачив” гэхэд нь “Ном үзэх санаатай Төв номын санд суулаа ...” гээд учраа хэлсэн.  Тэгтэл урдаас   “Нагаржунайн 150 бадагт  гэж байдаг юм шүү дээ ” гээд өмнөөс цээжээр дүнгэнэтэл унших нь тэр.

- Төвд хэлээр нь үү?

-Тэгэлгүй яахав,  Моломжамц гуайн уншиж судалж цээжилсэн нь бол  Нагаржунайн филосифийн  их хөлгөн судар шүү дээ. Миний үзэж байсан 73 бадагт бол   бага хөлгөн нь юм. Тэгээд  би бодлоо. “Манай төр засгийн толгойд чинь ийм гайхалтай хүмүүс суудаг юм байна шүү дээ” гэж.   Тэр үеийн сэхээтнүүдийн   филосифи боловсрол ямар түвшинд байсан бэ гэдгийг харуулж байгаа юм.  Гадны улс төрийн зүтгэлтэн  хэн нэгэн хүн ингэж амьдарч байж гэнэ гэдгийг харуулсан сайхан сайхан номууд байдаг л даа.  Түүнийг унших л хэрэгтэй.  Хүнд амьдралын туршлага өгнө. Гэхдээ цаад талд  нь суурь  философи байгааг бас судлах ёстой. Өнөө цагийн манай удирдагч нар тэрхүү суурь философи талдаа сул анхаардаг юм уу даа  гэж  би хувьдаа боддог юм.

-Юм уншихгүй байгаам уу гэхээр үгүй. Уншсан, мэдээлэл авсан байгаад байдаг.  Харин яг таны хэлдгээр тэр филосифи   нь байхгүй байна аа даа.  Монголд хүнд хэрэгтэй  Монгол оронд наалдацтай биш  нэг тийм  имэрхэд ширхэг нь мэдрэгдэхгүй гэдэг шиг хөндий хоосон суртал яваад байх шиг..?

-Манайхан одоо оюун санааны  өв гээд  Чингис хаан ингэж сургасан тэгж сургасан гээд л их ярьдаг шүү дээ.  Гэтэл  Оюунтүлхүүр гээд  их судар байдгийг  мэддэг, ойлгодог эсэх нь их эргэлзээтэй.  Чингис хааны “Биеэ засаад гэрээ зас. Гэрээ засаад төрөө зас ” гэж сургасан гээд л яриад байдаг. Гэтэл энэ чинь Чингис хаанаас  1500 гаад жилийн өмнөөс явсан том философи юм шүү дээ. Биеэ засна гэдэг нь юу юм бэ, гэрээ засна гэж яадаг юм бэ. Тэгээд төрөө засаад дараа нь төгөлдөр дээдийн хязгаарт хүрнэ гэсэн үг  хүртэл бий. Манайхан тэрийг нь огт ярьдаггүй юм. Манай сүүлийн гурван Ерөнхийлөгчийн үед... за анхны Ерөнхийлөгч бол иймэрхүү юм огт ярьдаггүй л дээ. Сүүлийн хоёр Ерөнхийлөгчийг  хараад байхад “ Биеэ засна” гэдэг томьёоллыг  сонгуулийн кампанит ажлынхаа үеэр тайлбарлах гэж үе үе цухалзуулдаг юм.   “Биеэ засна” гэдгийг ямар нэгэн дээд сургууль төгсөөд, магадгүй эрдмийн зэрэг цол хамгаалаад, бизнес хийгээд жаахан төлөвшил олохыг хэлнэ гэж тайлбарладаг. Гэтэл “биеэ засна” гэдгийг монголчуудын филосифиор бол “их суртахуй “  гэдгээр тайлбарладаг.  Биеэ засна гэдэг чинь орчлон хорвоогийн явдлыг таньж сэтгэлийн төвийг олохыг хэлж  байгаа юм. Сэтгэлийг төвийг олно гэдэг чинь эмчийн боловсрол, инженерийн боловсролыг олохыг хэлдэг юм биш.  Энэ мэргэжлийн боловсрол олох чинь “Бага суртахуй”-даа орно.  Одоогийн 76 гишүүнээс их суртахуйг олсон хүн их цөөхөн дөө. Надад ингэж л бодогдоод байдаг юм.

-Одоогийн УИХ-ын гишүүдийн араас явж буй залуу үе   таны хэлсэн тэр сэтгэлийн төв, оюун санааны тэнцвэрээ олоогүй байж төрөө заснаа гээд дайрах боллоо.  Зөвхөн сургууль төгссөнөө биеэ зассанд, жаахан мөнгө олж байр, машинтай болсноо гэрээ зассанд тооцоод байх шиг. Заримдаа тэднээс  айх юм?

-(инээв) Би ч айдаг. Тийм хүмүүсийн гол хөдөлгөгч хүчин нь юу байдаг гэхээр мөнгө.  Тэд би юмыг мэддэг чаддаг боллоо гээд дайрсаар төрд гардаг. Төрд гарахаараа юү хийдэг вэ гэхээр төсвийн мөнгийг хувааж иддэг.  Авлига хээл хахуулиар амьдрах замыг дөт хараад байх шиг санагддаг. Улс төрийн намуудыг  ч харах нь ээ   “манай намыг дагавал сайхан амьдарна” гэсэн үзлийг түлхүү сурталчилж байна. Тэрнээс “бид эх орондоо ийм ийм сайхан үйл бүтээж чадна” гэсэн үзэл дутуу санагддаг.  Тэгээд сонгууль болохоор аль их мөнгө өгсөн хүнийг албан тушаалд томилдог. Одоо ч бүр хялбар  болсон. Намын жагсаалтын эрэмбэ дараагаар  худалддаг болж.   Монголчуудын оюун санааны ертөнцөд гарч байгаа нэг өөрчлөлт бол үнэлж хүндэтгэж явах ёстой үнэт зүйлээ  мөнгөөр орлуулах боллоо. Ялангуяа манай залуучуудад элбэг тохиолддог л доо.

-Зөвхөн эд баялагийг л мөнгөөр худалдаж авдаг гэдэг бидний ойлголт орвонгоороо эргэлээ. Мөнгөөр албан тушаал худалдан авч түүнийгээ тахин шүтдэг болсон. Мөнгөөр худалдаж авч болдоггүй оюун санааны үнэт зүйлийг дээдлэн шүтэх сэтгэлгээ үгүй болсон. Хэзээ  ямар алдаа хаана гаргаснаас ийм гажуудал үүсэв ээ?

- Монголчууд  “Эрдэм мэдлэг  эрхэм  баян, үр хүүхэд удаах баян, эд хөрөнгө адаг  баян” гэж  ярьдаг шүү дээ.  Энэ үзлээрээ бид залуучуудаа хүмүүжүүлж чадсангүй.  Нийгмийн тогтолцоо өөрчлөгдөх үе хүртэл баахан худал онолоор цатгасан. ” Хүн бүхэн хэрэгцээнийхээ хэрээр хүссэн юмаа авдаг  коммунист нийгэмд амьдрах цаг үе ирнэ”  гэсэн итгэл найдвараар амьдарч явтал нийгмийн тогтолцоо өөрчлөгдсөн. Нөгөө итгэл үнэмшил байхгүй болсон. Тухайн  цаг үеэс гадна дотны ч нөлөө байсан байх.  “Мөнгөөр л бүхнийг шийдэж болно, мөнгөтэй л бол сайхан амьдарч болно, баяжихийг хичээ “ гэсэн сэтгэлгээ орж ирсэн.  Өөрөөр хэлбэл монголчуудыг бүтээгч сэтгэлгээгээр биш шуналаар нь хөтлөж эхэлсэн дээ.  Ингэж явсаар одоогийн залуус “мөнгө мөнгө” л гэх болж шүү дээ. 
- Социалист дэглэмээс ардчилалд шилжих  тэр цаг үед  оюун санааны өв уламжлалаа хойч үедээ өвлүүлсэнгүйгээс болжээ гэж ойлгож болох нь ээ? Бүхэл бүтэн нэгэн  үе энэ алдааны золиос болчихов уу?

-Цаг хугацааны хувьд нийгмийн тогтолцоо өөрчлөгдөхөд нэг их зай завсар гараагүй л дээ. Соёл иргэншлийн мөргөлдөөн, нийгмийн тогтолцоо өөрчлөгдөх үед хүний зовлон туйлдаа хүрдэг гэж ярьдаг шүү дээ. Энэ үедээ бид мөнгөний хүчтэй түрэлтэд автаж байгаа нь үнэн. Гэхдээ ч бас оюун санаагаа тэр чигт нь алдчихаагүй.  Адаглаад та бид хоёр ингээд энэ тухай ярилцаад сууж байгаа нь оюун санааны мөхөлд тэр чигтээ орчихоогүй нь гэдгийг илтгэн харуулж байгаа хэрэг шүү дээ.

-Улс төрийн намаар   дамжаад оюун санааны алуур явагдаж байна гэж би боддог.  Гэхдээ дотроосоо гэхээс илүүтэйгээр гадны нөлөөтэй оюун санааны терроризм  гэж ойлгодог. Манайх шиг хүн ам цөөтэй оюуны дархлаа нь суларсан ийм улсад энэ аюултай биш үү?

-Намаар дамжиж оюун санааны дарангуйлал, харгислал явагддаг нь түүхийн эртний улбаатай л даа. Жишээлбэл, манай улс  чинь оюун санааны өндөр боловсролтой, соёл түүхтэй орон байлаа шүү дээ. Тэгээд социализмд ороод ирэхдээ зэрэг большевикуудын үзэл санааг даган дуурайх хэрэгцээтэй болсон.  Ингээд л Монголын шашин соёлыг устгаж хүч хэрэглэж эхэлсэн. Гэвч энэ үзэл суртал нь хоосон хуурамч байсан тул манайхны оюун санаанд тэгтлээ гүн шингэж чадаагүй. Социализм нуран унахад хүмүүсийн оюун санаанаас маш хурдан арчигдаж хоосон орон зай үлдээсэн. Харин тэр оюун санааны орон зайг мөнгө эзэлчихэж.   Большевикүүдийн үлдээсэн тэр орон зайг улс төрийн намууд эзэлж авахдаа оюун санааны хүчирхийллийг хэрхэн явуулдаг тэр арга барилаар ажиллаж байгаад гол учир байгаа юм. Тэд хүмүүст мөнгө санал болгож эхэлсэн. Аль ч намын үзэл суртлыг харахад баяжих, мөнгөжих үзлийг л түлхүү номлож байгаа.   Энэ нь нэг тал.  Нөгөө талыг нь харъя л даа.  Хөрөнгөтэй баян чинээлэг хүмүүс намыг атгаад сонгууль болоход намаар дамжиж хүссэн эрх мэдэлдээ хүрдэг болсон. Уг нь нам гэдэг бол үнэлэхүйн үнэтэй эд биш юм.  Гэтэл намгүй л бол  ардчилал байхгүй болчих юм шиг яриад байна.  Тийм биш шүү дээ. Тухайлбал Францад гэхэд сонгууль орохдоо олон түмний иргэний байгууллагууд нь холбоо байгуулаад орж болж л байна. Оросод бүх ард түмний фронт гээд иргэний байгууллагууд нь нэгдээд орох эхлэл цухалзаж  байна.  Гэхдээ Оросод бол гажуудал ихтэй л явж байгаа...

-Ер нь намгүй болчихвол яадаг юм бол ?

-Нийгэмд тодорхой хэмжээний үзэл гэж байх ёстой. Тэр үзлийг хэсэг бүлэг хүмүүсээр зангидаж байдаг юм нь нам. Тэгэхээр нам гэдэг юм нь хэрэгтэй . Гэтэл одоогийн нам гэдэг юм нь үзэл баримтлал байхгүй. Зөвхөн мөнгөнд суурилсан сонирхол.  Бид нэг хэсэг нам дагасан олигархи гэж ярьдаг байлаа шүү дээ.  Гэтэл одоо өнөөх олигархиуд нь төрийн толгойд гараад намаа тоохоо больсон.  УИХ хоёр дахь жилдээ орж төлөвших үедээ хэд хэдэн хууль баталлаа. Тухайлбал, Хөрөнгө оруулалтын тухай хууль.  Төрийн толгойд суусан олигархиуд нь өөрсдийн эрх ашгийг хамгаалсан хууль оруулаад л “Наадахаа батал” гэхэд УИХ дахь намын бүлгүүд чичирч байгаад л баталлаа.  Гэтэл Монголынхоо газар нутгийг 100  жилээр гадныханд  түрээслүүлэх  хууль баталчихсанаа одоо л мэдэж байна. Энэ юуг харуулж байна гэхээр намаас давсан олигархиудын бүлэг бий болж. УИХ дахь намын бүлгүүд бол зүгээр л тэдний зэвсэг. Өнгөлөн далдлалтын хөшиг. Тэр хөшигний цаана хоёр гурван намын баячууд суучихаад ашиг сонирхолоо тохирч байна шүү дээ.  

-Тэгээд дээрээс нь гадны нөлөөтэй...?

-Тэгээд бас гадны нөлөөтэй. Мөнгө харахтайгаа зэрэг цаадуул чинь шонхор шиг дайрч байгаа юм чинь.

- 20-оод жилийн өмнөөс “Адгийн шааруудын сүүлчийн хоргодох газар эх орон” гэсэн сүржин филосифитой  суртал явдаг байлаа. Түүнд нь ч итгэдэг байсан. Гэтэл одоо эх орон гэж ярьсан болгон, эх орны төлөө гэж дуугарсан бүхэн адгийн шаар нэр зүүж адлагдах болов. Магадгүй  би маргааш “Эх орны төлөө” гээд бичвэл  шившиг болох  хэмжээнд хүрэв.  Энэ бол өнөөх оюун санааны алуурчдын хийсэн ажлын   үр дүн мөн үү?  

-( энэ асуултыг сонсоод Д.Бямбасүрэн гуай маш их инээсэн.... ) наадах чинь их сонин ойлголт. Надад ч гэсэн 90-ээд  оны сүүлээр ийм юм ярьж хүмүүс ирдэг л байсан. “Та одоо эх орон гэж яриад байх юм. Наадах чинь мөхөж буй  коммунистуудын сүүлчийн хоргодох газар...” гээд л. Биднийг өмнө нь интернацианолч маягаар хүмүүжүүлэх гэж 100 жил оролдсон л доо. Тэгээд тэр нь ч нэг их бүтээгүй. Тэгэхээр ингэж бодох хэрэгтэй. Эхлээд эх орон гэдгээ зөв томьёолох ёстой. Чиний өөрийн чинь нутаг ус, өвлөж төлөвшсөн хэл соёл чинь, зан заншил чинь ... тэр байтугай хаа ч явсан элэг зүрхээрээ холбогдсон нутаг орон чинь Монгол юм. Харин чиний хэлсэн дээрх үзлийг номлогчид бол  хэл соёлоо, зан заншлаа, нутаг усаа ер нь юуг ч худалдаж болно гэж үзэл санааг тархинд чинь суулгахыг хүсэгчид юм. Тэд хэдэн мянган жилийн турш энэ улс орныг энэ соёл заншлийг хамгаалж хэдэн хүн амь насаа зольж ирсэнийг мэдэхгүй.  Хамгийн сүүлчийн жишээ гэхэд 1939 онд Халх голын дайнаар 2500 хүн амь үрэгдсэний төлөөсөнд бид өнөөдөр Халхын гол гэдэг нутаг дэвсгэртэй тэнд амьдардаг монгол хүмүүстэй байна. Гэтэл нэр нутагт 270 мянган га газрыг солонгосуудад  өгчихлөө. Үндсэндээ худалдчихлаа.  Үүнийгээ Хөрөнгө оруулалтын тухай хуулиар баталгаажуулаад ч авлаа. Монгол эх орон,  өв уламжлал,  үндэс  угсаа  бүхэнтэй холбоотой бүхнийг хямдруулж юуг ч худалдаж болно гэж номлогсод  бүгдийг дийлж давж байна даа.

-Энэ бүхэн чинь бид гадныханд  тархиа  хэрхэн соруулж  байгаагийн үр дүн тийм үү?

-Эхлээд эх орноо үгүйсгэнэ. Дараа нь ижий , ааваа үгүйсгэнэ. Тэгээд бүгдийг худалдаж чадна даа. 

-Өнөөдөр манай улс тусгаар тогтносон улс. Дотооддоо асуудлаа шийднэ. Хилтэй, хэлтэй. Сонгуулиа явуулж төр засгаа сонгоно. Гэтэл геополитикийн хувьд бид тусгаар тогтнолоо аль хэдийнэ алдчихсан юм шиг. Манай улсын эдийн засаг 100 хувь гаднаас хараат болсон шүү дээ...

-1990 оны ардчилсан хувьсгалын гол зорилт бол тусгаар тогтнолоо,  бүрэн эрхээ 100 хувь өөрсдөдөө авах байсан. Тэрнээс өмнө Монголын хувь заяаг Москвад шийддэг байлаа шүү дээ. Монголын төрийн тэргүүн хэн болохыг, тэр хүн хэдий хугацаагаар амьд явахыг  оросууд мэддэг байсан.  1990 оны хувьсгалаар  энэ бүх эрх чөлөөгөө олж авсан. Тэрний төлөө огт цус урсгаагүй гэж бахархдаг юм. Цус урсаагүй ч энэ эрх чөлөөний төлөө монголчууд маш их зовсон. Эрх чөлөө бол үнэтэй юм.  Гэтэл сүүлийн үед сэтгэл зовоосон асуудал их боллоо. Эдийн засгийн хувьд бид бүрэн хараат боллоо. Манай экспортын 95 хувийг урд хөрш маань дангаараа эзэлж байна. Манайхан том том гоё юм яриад л байгаа. Яг үнэндээ бодитоор аваад үзвэл Чалко нүүрс авахаа болилоо гэхэд л Монголын нүүрсний экспорт бүрэн зогсч байна. Рио Тинто “танай Ерөнхйилөгч, Ерөнхий сайд хоёр бууж өгөхгүй бол бид явлаа”  гээд л 1700 ажилчныг нь халж хаяад явахад бид Лондон руу хадаг бариад гүйж очлоо. Энэ юуг харуулж байна вэ гэвэл хувь заяаныхаа жолоог бид алдчихсан гэдгийг харуулж байна.  Энэнээс  цааших  ч юм бас бий.  Одоо манай төр засгаас явуулж байгаа бодлогод эргэлзэх юм их бий. Харин   геополитикийн хувьд гэвэл бодох, санах  юм байна. Манай  улс дэлхийн хоёр том гүрний дунд бий.  Нэг нь хүн амаараа дэлхийд нэгдүгээрт ордог, нөгөөх нь газар нутгийн хэмжээгээрээ дэлхийд нэгдүгээрт ордог. Манайхан энийг бэрхшээл гэж хардаг юм. Далайд гарцгүй, хоёр талаасаа билүүдүүлж идүүлээд гээд л... Газар нутгаа алдсаны хувьд алдсан л даа. Хуучин газар нутгаасаа гуравны нэгийг нь Хятадад, гуравны нэгийг нь Оросод, тэгээд гуравны нэг дээрээ бид өөрсдөө амьдарч байна. Энэ бол түүхийн жам тавилан. Гэхдээ одоогийн нутаг дэвсгэр дээрээ эрх ашгаа хамгаалаад амьдарч оршиж чадах уу гэвэл би оршиж чадна гэж хэлнэ.Орос, Хятад хоёр чинь манай Монгол Улсын бий болгосон бүтээл юм шүү дээ. Орос гэхэд 62 жижиг вант улс байсан бол  Зүчийн байлдан дагуулалтын улбаа явсаар өнөөгийн  Оросыг бий болгосон  байдаг. Хятад гэхэд Чингис хаанаас өмнө 12 жижиг улс байсныг бид нэгтгэж нэгдмэл хятад үндэстнийг бий болгож өгсөн  юм шүү дээ. Түрүүний хэлснээр бодоход Монгол улсыг тойроод  монгол угсаатны хүрээ байгаа.  Ингээд бодвол  гадуураа дэлхийн хоёр том улсаар хүрээлүүлсэн, тэр дотроо өөрийн монгол угсаатнаар хүрээлүүлсэн дархлаа сайтай улс болчихоод байгаа юм.  

-Хоёр хөршид хуваагдаж оршсон  монгол угсаатнууд бидний дархлаа болж чадах уу?

-Чадалгүй яахав. Хэл соёлоороо сайн дархлаа болно.

-Бид  өөрсдөө энд аж үйлдвэржээд, амьдрах таатай орчин бүрдүүлээд    тэднийгээ  өөрсөд рүүгээ татах бодлого явуулвал Орос , Хятад хоёрт хүнд байдал үүсэх үү?          

-1911 оны хувьсгалаар Да лам Цэрэнчимэд тэргүүтэй  хүмүүс энэ бодлогыг явуулахад хоёр гүрэн үхтлээ айж дургүйцсэн. Дараа нь 1921 оны хувьсгалын дараа ч нэгдсэн Монгол улсыг байгуулах болдлого гаргахад бас дургүйцэж дарж авсан.  1924 оны шинэ Үндсэн хуулиндаа  бид өөрөө бага буурай улс хэвээр явна гэж бичүүлж аваад амарсан.  Яг үнэндээ түүхийн талаас нь авч үзвэл Монгол бол хуваагдмал үндэстэн.  Мэдээж  монгол угсаатнаа нэгтгэж хоёр гүрнээ задлах болдлого явуулахгүй. Харин  монгол хэл,  монгол соёл,  ёс заншил  амьд хэвээрээ байна гэдэг бол хүн төрөлхтөнд   өөрөө үнэт зүйл юм. Бичиг нь , хэл нь , ёс заншил нь, амьдрах арга технологи нь ч үнэт зүйл.  Зүгээр л монгол дээлээ оёод хоёр зах зээл дээрээ борлуулахад дэлхийн хаана ч борлохгүй олноор  борлоно биз дээ. Энэ мэтээр хоёр том гүрний дунд оршиж байгаагаа муу зүйл гэж үзэхгүйгээр дэлхийн хамгийн том хоёр зах зээл дээр хамгийн бага өртөгтэйгөөр, шууд хүрч байна  гэж бодож ашиглаж сурах хэрэгтэй. Юун далайд гарц хайх. Ачиж аваад л давхиад хүрчих зах зээл хажууд байгаа юм л даа. Одоогоор манайх урд зах зээлээ л хараад байгаа болохоос хойноо байгаа том зах зээлийг огт ашиглахгүй байна.  Манай экспортод өрсөлдөх чадвартай  ноос , ноолууран бүтээгдэхүүн эсгий гутлаа ч бодоод үз л дээ. Дэлхийн сэрүүн бүс хойно л байна. Үүнийг бид хойд зах зээл рүүгээ хялбар гаргаж чадна. Харин канадууд биднээс  хэзээ ч авахгүй.  Скандиновын орнууд ч  авахгүй.  Тиймээс хойд хөрш рүүгээ р экспортоо жаахан бодох хэрэгтэй. 

-Бид эдийн засгийн тусгаар тогтнолоо аль хэдийнэ алдсан.... Тийм үү?

-Энэ бол Монголын төр өөрөө найр тавьж өгсөн хэрэг. 

-Санаатайгаар уу?

-Аа, үгүй үгүй, найр тавьсан хэрэг биш юм аа.  Эрх мэдэлтнүүд мөнгөөр худалдчихсан юм . Жишээ нь манай үндсэн хуульд газар,  газрын хэвлий дэх баялаг ард  түмний мэдэлд  байна, өмч байна гээд заасан байгаа. Гэтэл манай төр тэр баялгаа гадныханд найр тавьж, ирсэн болгонд хувааж өгөхийн төлөө зүтгэж  байна. Үүний ард Монголын ард түмэнд хүрэх юм гэхээсээ  илүү эрх мэдэлтнүүдийн халаасанд  орж байгаа юм л гол хөшүүрэг нь  болж байгаа.    

-Эдийн засгийн хувьд тусгаар тогтнолоо алджээ. Бас оюун санааны тусгаар тогтнолоо ч улам бүр алдсаар байна гэдэгтэй та санал нийлэх үү?

-Үнэхээр байдал их  өвөрмөц байгаа шүү. Улаанбаатарын гудамжаар явахад л байдал тодорхой байгаа. Бүх хаяг гадны хэл дээр байх жишээтэй. Үүнийгээ их соёлтой, мундаг улс болж байна гэж бодож байгаа байх. Японд гудамжин дахь үйлчилгээний газрууд хаягаа  япон болон гадны хэл дээр хоёр янзаар бичсэн байдаг.  Гадаад хэл дээр хаягаа бичих бол япон хэлээр бичсэнээсээ хоёр дахин багаар бичих ёстой дүрэм үйлчилдэг. Гэтэл манайд тийм зохицуулалт  байхгүй. Эрх баригчид мэдэхгүй байна уу, гэвэл үгүй, тэд сайн мэдэж байгаа. Хотын захиргаа энэ талаар шийдвэр гаргасан боловч  тэр нь цаасан дээр  л үлдлээ. Тэд үнэхээр хүсэхгүй байна. Гадны бүх юм сайхан, тэр хэлээр нь ярьж бичиж тэднийг даган дуурайж байвал сайхан гэдэг үзлийг л харуулж байгаа юм. Энэ бол оюун санааны тусгаар тогтнолоо алдахаас илүү хэнийг ч хамаагүй даган дуурайж явах үндэстэн болж байгаагаа л нотлож байгаа хэрэг. 

-Монголоороо гоёх биш монголоо голох болжээ?

-Монгол хэлээрээ ярьж чадахгүй атлаа курсээр англи хэл сурсан хүмүүс төрийн алба руу зүтгээд байна. Манай төрийн албанаас гарч буй бичиг  баримтыг харж байхад даанч яав даа гэмээр юм байдаг шүү дээ. Тэгээд тэрнийгээ УИХ-аар батлуулаад гаргачихна, Засгийн газрын шийдвэр гэнэ, төрийн том баримт бичиг болгоод хэвлэчихнэ.

-Та бид  хоёрын энэ яриа  нэлээд хорцогдмол, хуучинсаг зүйлд тооцогдоно шүү...

-Тэгнэ л дээ. Гэхдээ нэг зүйлийг бодох хэрэгтэй. Хэл соёлынхоо үндсэн чанарыг алдсан үндэстэн байхгүй болох тавилантай юм. Энэ бол  түүхийн жам. Үүнийг л ухаарч чадвал тэр хоцрогдсон байна уу үгүй юу хамаагүй. Монголоо орхиод өөр газар очиж сайхан амьдарья гэж бодож байгаа бол тэр хүнд монгол хэл, монгол зан заншил, Монголын соёл хэрэггүй.  Харин монгол хүн гэх өөрийг нь бий болгож бүтээсэн энэ орчин хэрэгтэй гэж бодож байгаа  хүнд бол хэл соёл, оюуны үнэт зүйлсээ юугаар ч солихгүй биз ээ.

-Монгол хүнд монгол хэл, монгол соёл, монгол зан заншил ямар учраас хэрэгтэй юм бэ гэдгийг та энэ хүмүүст хэлж өгөөч?  Монгол хүнд энэ бүхэн хэрэггүй юм шиг бодох болж шүү дээ?   

-Би заримдаа боддог юм. Хүн гэж юу юм бэ гэж. За хүн гэдэг бол хамгийн түрүүнд адгуусан амьтан. Хүн гэдэг бол бүтээдэг ч бай нураадаг ч бай нэг үйл хөдлөл хийж чаддаг. Хүнийг бусад араатан амьтнаас ялгаж байгаа гол зүйл бол хүний оюун ухаан, сэтгэлийн орон зай  шүү дээ.   Тэгэхээр чи хэрвээ өөрийгөө монгол хүн гэж бодож байгаа бол чамайг бүтээж өгч буй тэр хүчин зүйл бол  нэгдүгээрт монгол эх орон чинь юм. Монголын хэл соёл, зан заншил, монгол хүний амьдрах арга монгол хүнийг бүтээж байгаа юм.  Энэ бүхэн Монгол эх орноос чинь бүрэлдэж байгаа хэрэг.  Эх орон гэдэг чинь хил хязгаар татсан газар шороо биш. Энэ газар шороо бол үндэс суурь нь. Энэ хил хязгаар дотор оршиж буй хэл соёл, зан заншил, амьдралын арга технологи бүхэн эх орныг бүрдүүлнэ. Энэ бүхнээ алдвал чи монгол хүн биш болно. Чи монгол хүн биш болчихоод хаана очиж яаж амьдрах юм бэ. АНУ-д доктарантурт сурахад 60 кердит цаг байдаг юм. Үүний 12 цаг нь Америкийн түүх.  Ямар ч мэргэжлээр сурсан тэр хүн юуны түрүүнд америк хүн байх ёстой гэж. Тэгвэл чи монголоосоо татгалзаад Америкт очоод “Би та нарыг шүтдэг. Би монгол хүн биш. Би дэлхийн хүн байна ” гээд очоод үз дээ. Чи тэнд хэн ч биш. Чамайг хэн ч тоохгүй. Хятадад бас ингээд яваад оч. Хэн ч чамайг тоохгүй. Чи хүн гэдэг үнэлэмжээ бүтээж хүн шиг амьдрахын тулд чи монгол хүн л байх болно. Хүнээрээ байх ухаанаа, боловсролоо Монголоосоо л олж авах болно. Хэрэв эх орон гэдэг ойлголтоо алдах юм бол чи хэн ч биш болж хувирна.  Баян болох баян амьдрах амархаан. Япончууд Оросоос Куриллын дөрвөн арлаа 28 тэрбум  ам. доллараар худалдаж авъя гэхэд Орос өгсөнгүй. Тэгвэл Монголын газар нутгийг тэр жишгээр худалдья гэвэл гурван триллон доллар хүрнэ. Монголоо тэгж худалдаад хүн бүр нэг сая доллар өвөртлөөд гадагшаа явж сайхан амьдарья.  Монголын гуравхан сая хүнийг шингээчих газар нутаг дэлхийд хаа ч бий. Харин хаа нэгтэй очоод хэрхэн яаж амьдрах юм бэ. Яаж ч амьдарч чадахгүй. Хүн болж төрсөний чинь илтгэх цорын ганц зүйл болМонгол эх орон чинь юм. Үүнийгээ худалдчихаад хаа хүрэх билээ дээ. Орчин үеийн залууст, орчин цаг үед, өнөө цагийн удирдагчдад санах сэрэх бодох юм их л байна даа....гэснээр бидний ярилцлага төгслөө. Монгол Улсын Ерөнхий сайд асан энэ эрхэм хүнтэй ярилцсаны дараа цээжин дэх хөндүүр бага ч болтугай арилсан байлаа. Төрийн соёрхолт Б.Цэнддоогийн бичсэн фальетонийг уншаад шууд  утгаар нь ойлгож шүүмжилдэг,   монголоороо ярихаас залхуураад англиар ярьчихдаг , эх орон гэж ярихаар адгийн шаар гэж хараадаг энэ цаг үедээ сэхээрэл болж амьдрахын чин хүслэнд автсан байлаа.   

Л.Мөнхбаясгалан