Европчууд Н.Энхбаярыг Монголын авлигын загалмайлсан эцэг гэж нэрлэв

Европын “BNE.eu”-д “Монголын авлигын загалмайлсан эцэг төвийн тоглолтод эргэж ирэх нь” гэсэн нийтлэл гарчээ. Энд чухам хэнийг яриад байгааг уншигчид төвөггүй мэдэж байгаа биз ээ. Монгол Улсын гурав дахь Ерөнхийлөгч Намбарын Энхбаярыг гадныхан шууд ингэж нэрлэж байгаа анхны тохиолдол энэ. Түүнээс урьд дам байдлаар “Монголчууд Н.Энхбаярыг авлигачин гэж нэрлэдэг” гэх маягаар л бичдэг байв. Тиймээс дээрх нийтлэлийг засваргүйгээр орчуулан хүргэж байна.

Монголын авлигын загалмайлсан эцэг төвийн тоглолтод эргэж ирэх нь

Монголын улс төрийн хамгийн дуулиантай хүн Сөүлийн эмнэлгийн орон дээрээс эргэж ирэхээр болов. Тэрбээр эмзэг, хэврэг Засгийн газраас үргэж зугтсан хөрөнгө оруулагчдыг эргүүлж авчрах ажилд түүнийг саад болно гэж эрх баригчид айж байна. Намбарын Энхбаяр Ерөнхийлөгч, Ерөнхий сайдын албыг хашиж байсан бөгөөд авлигын хэргээс болж шүүхээс 2.5 жилийн ял сонссон.

Гэхдээ одоогийн Ерөнхийлөгчийн уучлалаар түүний ялыг хэрэгсэхгүй болгосон. Харин одоо түүнийг улстөрд эргэн ирснээр Шинэчлэлийн Засгийн газрын үйл ажиллагаа, цаашилбал Монголын улстөрд шууд өөрчөлт гарна гэх айдас, хардлага гарах боллоо.

Н.Энхбаяр шоронд байхдаа ялын тогтоолыг эсэргүүцэж, хуурай өлсгөлөн зарлаж байсан. Гэхдээ тэр МАХН-ын дарга болсон ба хэдий шоронд байсан ч түүний нөлөө Монголын улстөрд байсаар ирсэн.

“Сант Марал” төвийн тэргүүний хэлснээр, Н.Энхбаяр тэтгэвэрт гарах арай болоогүй, тэгээд ч 2014 онд улстөрд эргэж ирж байгаа нь түүний сонгуулийн бэлтгэлийн эхлэл ажээ.

Тоглогч

Ер нь Н.Энхбаяр ардчиллын 20 гаруй жилийн түүхэнд улстөрийн гол хүмүүсийн нэг байсан. Тэрбээр төрийн өндөрлөг гэгдэх албан тушаалуудад бүгдэнд нь байж, МАХН /одоогийн МАН, МАХН/-ыг олон жил удирдаж, өөртөө чамгүй хүч, нэр хүнд хуримтлуулж авсан нэгэн.

Түүний гол гавьяа нь ОХУ-д төлөх их өрийг тэглэсэн явдал гэж ард түмэн боддог. Гэхдээ тэрбээр Оюутолгойн гэрээний гол тоглогч байсан юм. Харин одоо ард түмэн Оюутолгойн ихэнхийг гадныханд өгөхөөр гэрээлснийг хүчтэй шүүмжилж байгаа.

Гэхдээ өр тэглэлт, Оюутолгойн гэрээ байгуулах хоёр ажил салшгүй холбоотой гэх хардалт одоо бий. Өөрөөр хэлбэл, Оюутолгойг худалдсан мөнгөөр Орост өр төлсөн гэж зарим улстөрч үзэж байна.

Энэ хэргээс хойш Н.Энхбаярыг “Авлигын загалмайлсан эцэг” гэж нэрлэх болсон. Гэвч түүнийг ялласан нь энэ хэрэгтэй холбоогүй, төрийн мэдэлд байсан хэвлэл, “Өргөө” зочид буудлын хувьчлалаас болсон зүйл. Одоо түүний төрсөн дүү Н.Энхтуяаг мөн хувьчлалтай холбоотой хэргээр Интерполоор эрэн сурвалжилж байгаа. Н.Энхтуяаг байцаах үндэслэл нь ахынх нь хэргээс гадна, мөнгө угаахтай холбоотой.

Харин Н.Энхбаяр хэрэгт хутгалдсан ч олон нийтийн дунд нэр хүндтэй хэвээр байгаа. Угаасаа түүнийг баривчилж, ялласан нь ард түмний дундахь нэр хүндийг нь огцом өсгөсөн явдал болсон гэж хөндлөнгийн шинжээчид үзэж байгаа юм. Зарим хүн энэ нь түүний улс төрийн хоёр дахь том замналыг эхлүүлсэн ч гэдэг.

Өнөөгийн Ерөнхийлөгч Цахиагийн Элбэгдоржийн хувьд, өнгөрсөн сонгуулиар түүнийг суллагүй нь түүнд болгоомжлол байсан учраас тэр.

Хөшигний ард

Өнөөдрийн улстөрийн байдлаас харахад, Н.Энхбаярыг яллаж, шоронд хорьж, эцэст нь уучлалаар суллаад, тэрбээр өдгөө Монголд байхгүй ч түүний гар хаана ч хүрж байсан. Тэрбээр хөшигний араас бүгдийг удирдаж байсан юм.

Түүний нам хоёр хуваагдсан ч хэрвээ хүсвэл тэр буцаагаад нийлүүлж ч чадах ажээ. Хамгийн гол нь одоо хэдийгээр эдийн засаг ганхалттай байгаа ч Н.Энхбаярыг төр барьж байх үеийнхээс хэд дахин томорч, төсөв тэлсэн.

“Рио Тинто” удахгүй Оюутолгойн далд уурхайг ашиглаж эхлэх ба ингэснээр төсөвт орж ирэх мөнгө маш ихээр нэмэгдэнэ. Одоогоор Засгийн газар “Рио Тинто”-той хэлцэлд хүрч чадахгүй байгаагаас энэ ажил түр саатсан.

Энэ үед Н.Энхбаяр Монголын улстөрд эргэж ирвэл нэлээд том бужигнаан үүсч, маш олон хүний авлигын хэрэг сөхөгдөж, бас маш олон нь энэ салбараас гарахаас өөр аргагүй болно гэж хүмүүс бодож байгаа. Түүнчлэн хүчний харьцаанд том өөрчлөлт гарна.