Яамныхаа тухай ерөөсөө мэдэхгүй Ц.Оюунгэрэл сайдыг яах вэ

ССАЖЯ-ыг Төрийн нарийн бичгийн дарга удирддаг болоод даруй удаж байгаа гэнэ шүү. Сайд Ц.Оюунгэрэлийнх нь хувьд Т.Батаарыг эх оронд нь авчрах эрхэм үүргээ гүйцэтгэсэн болохоор одоо бэлгэдлийн чанартайгаар гар даллан мэндчилэх л ажил хийж байгаа юм байна.

Тус яамны хэлтсийн даргын албыг хашиж байсан Н.Оргил гэгч нөхөр ажлаасаа гарна, гарахгүй, халагдсан, халагдаагүй гэх шуугиан тарьж, одоо яамны хамаг “нууц” юм ил гараадах лаа.

Тэр ч бүү хэл, сайд Ц.Оюунгэрэл нь яамныхаа ажлыг ерөөсөө мэдэхгүй гэдгээ хэлчихлээ. Түүнээс Н.Оргилын талаар асуухад “Миний дүү ээ, чи сонсож бай. Би яамны ажлыг мэдэхгүй. Тэр дотоод ажил мажлыг Төрийн нарийнаас л асуу. Би бол ёстой хэлж мэдэхгүй. Тэгээд ч эгч нь хүн ажилд авах, халах асуудлыг огт мэддэггүй юм. Ер нь л мэдэхгүй дээ” гэх нь тэр.

Яамны асуудлыг мэдэхгүй сайд гэхээр юу болно гэсэн үг үү. Тэгэхээр нь арай өөр нухацтай зүйл тодруулахаар “National Geographic”-т өгсөн 500 орчим сая төгрөг ямар учиртайг асуухад “Би нэг л зүйлийг хэлнэ. Тэр мөнгөнд Н.Оргил ямар ч хамаагүй. Түүнийг би өмөөрнө” гэлээ. Сайдын амнаас гарсан аливаа тайлбарыг, хувийн амьдралыг нь л асуугаагүй бол албан ёсны мэдэгдэл гэж ойлгомоор байдаг.

Гэтэл өөдөөс яамыг би мэдэхгүй гээд дал мөрөө хавчаад байгаа хүнийг яалтай билээ. Хөөрхөн инээмсэглэж, нүдээрээ мишээж, хэлээ хазасхийн асуултад хариулах түүнд уурлалтай биш.

Гэхдээ тэрбээр нэг л зүйлд итгэлтэй байдаг нь “National Geographic”-т яам мөнгө өгсөн. Яг яагаад өгснөө “мэдэхгүй” байж болох ч өгсөн нь үнэн. Бас тэр мөнгөнд Н.Оргил яаж ч байсан хамаагүй, бас яагаад хамаагүйг нь мэдэхгүй байж болох ч ямар ч байсан хамаагүй нь үнэн аж.

Тэгэхээр Монгол Улсын Соёл, спорт, аялал жуулчлалын салбарыг төрийн зүгээс зохицуулах учиртай сайд маань үндсэндээ яамыг бол ерөөсөө мэдэхгүй. Гэхдээ гурван асуудлыг бол цээжээрээ мэднэ.

Эхнийх нь мэдээж Т.Батаар, хоёр дахь нь “National Geographic”-т мөнгө өгсөн, гурав дахь нь тэр мөнгөнд Н.Оргил хамаагүй гэх гурван зүйл. Тэрнээс биш Монгол Улсын соёлын өвийг хятадууд өөрсдийнхөө нэр дээр бүртгүүлэх, эсхүл монгол ёс заншил гээгдэн хаягдаж залуус хүүхдүүд хэт гадааджих, бас нийтийн биеийн тамир гээч зүйл үгүй болсноос монгол хүн жин нэмэгдэх, үе чулуужих бас бус өвчинд ээрэгдэх, аялал жуулчлалын салбар хэдэн эсгий таавчигнаас цааш хөгжихгүй байгаа зэргийг ерөөсөө мэдэхгүй болж таарлаа.

Бас тэр Төрийн нарийн гэгч этгээд түүнийг мэдээгүй явахад нь салбарыг нь яаж ч холиосон хамаагүй болох нь. Ийм хүн л сайд хийгээд байна даа, цаана чинь.

Д.Маргад