Чигч шударга дүртэй МАН-ынхан буюу хаврын хавсаргатай улстөр

Тийм удаан биш ч тодорхой хугацаанд унтаа байсан улстөрийн талбарынхан хөдөлгөөнд орж, магадгүй хөнжилдөө нам тайван унтаж чадахгүй нөхцөл байдал үүсээд байна. Улсын эдийн засаг уруудсан, төрийн данс улайсан гэх мэт мэдээллүүдтэй зэрэгцэн засаг дахь сайд нарын давхар дээлийг тайлах асуудал энэ хаврын улстөрийг сэрээгээд байна. УИХ-ын чуулганаар эл асуудлыг өнөөдөр хэлэлцэхээр тов тогтоод байсан ч,  “Шударга ёс” эсвлийн бүлгээс энэ асуудлаар  тав хоногийн завсарлага авчихлаа. Ингэж завсарлага авах болсон шалтгаан нь тус бүлгийн нөхдүүд өдийг хүртэл давхар дээлийн асуудлаар нэгдсэн байр суурьт хүрч чадаагүйтэй холбоотой гэж байна. Яадаг ч байсан хэдэн сайд нь засгийн кабинетэд суугаа тус намын бүлгийн зүгээс эхлээд дотооддоо асуудлаа шийдвэрлэх гээд байгаа харагдаж буй ч, угтаа улстөрийн цаашдын өнгө төрхийг прогнозлон өөрсдөдөө ашигтай хувилбар дээр кноп дарахаар зэхэж байж болох.

Хүлээлт үүсгээд байсан асуудлын хэлэлцэгдэх хугацаа ийн тав хоногоор цаашилж буйтай зэрэгцэн сөрөг хүчний дүрээр хоёр жилийг өнгөрөөж буй МАН-ынхан жагсаал цуглаан хийж байна. Шалтгаан нь эрх баригчид Монгол Улсын тусгаар тогтнол, язгуур эрх ашиг, үндэсний аюулгүй байдлын төлөө сэтгэл чилээн ажиллахгүй байгаа бөгөөд бурууд нүд хурц гэдгийн үлгэрээр улс төр, нийгэм, эдийн засгийн хүндрэлтэй тулгамдсан асуудлуудыг хүч хавсран шийдвэрлэн ажиллая, зүтгэе гэсэн санал санаачилгуудыг хүргүүлээд байгаа ч, хүлээж авахгүй болохоор нь эсэргүүцлээ илэрхийлж байгаа гэж буй. Түүнчлэн түмний төлөө ажиллахгүй байгаа энэ Засгийн газрын 17 сайдын давхар дээлийг тайлж, ашиг сонирхлын зөрчилгүй нөхдүүдээс бүрдсэн засгийг байгуулах ёстой гэсэн шаардлагыг тавиад байна. МАН-ын генсек  Ж.Мөнхбат энэ асуудал дээр бусад намуудын дэмжлэгийг авах бодлогын үйл ажиллагааг чуулган угтан өнгөрөгч долоо хоногоос ил явуулж, бас ч гэж дэмжлэгийг олоод байгаа.

Тэгвэл талууд энэ асуудал дээр байр сууриудаа нэгтгээд байгааг тал талаас нь харах хэрэгтэй юм. Төрийн эрхийг тун олон жил барихдаа ашиг сонирхлын зөрчил гэдэг ойлголтод ач холбогдол огтоос өгдөггүй байсан МАН-ынхан сөрөг хүчин болоод ирэхийн цагт уг асуудлыг уухайлан дэмжиж, улстөр хийн үргэлжлүүлж байгаа нь эрхбиш харагдаж л байна. Энэ засгийн үйл ажиллагааны но-г удаа дараа хэлж ярьж, огцруулах асуудлыг гаргаж тавиад үр дүнд хүрч байгаагүй МАН-ынхны хувьд энэ удаагийн боломжийг алдахгүйн төлөө зүтгээд үзэх шүд зуулт байж болох л юм. За ямартай ч МАН-ынхан давхар дээлийг тайлах хуулийн төслийг үйл ажиллагаа нь тааруу байгаа энэ засгийн нөхдүүдтэй хариуцлага тооцох арга гэж үзэн жагсаал цуглаан хийж тэмцэж байгаа бол Ерөнхий сайд Н.Алтанхуяг үүсээд буй хүндрэл бол Засгийн газар бүрэн эрхээ хэрэгжүүлж эхэлснээс хойш бий болсон зүйл биш. Ялангуяа өр төлбөртэй холбоотой асуудлыг өмнөх Засгийн газраас уламжлан авсан. Хөрөнгө оруулалт, эдийн засгийн өсөлт саарсан зэрэг нь ганц дотоодод болж буй гэхээс илүү дэлхийн зах зээлд болж байгаа үйл явдалтай холбоотой гэхчлэн бурууг бусдаас хайх ухаан сийлээд сууж байх юм.

Ийм маягаар энэ хаврын улстөр үргэлжилж байна.

Э.Болор