Ө.Энхтүвшин: Тэр хөрөнгийг та нар идчихээд гөлийгөөд суугаад байгаа юм уу

Өнөөдрийн хууль зүйн байнгын хорооны хуралдаанаар Х.Тэмүүжин сайдыг огцруулах тухай хэлэлцэхийг О.Баасанхүү шаардсан ч УИХ-ын гишүүд уг асуудалтай танилцана гэдэг үндэслэлээр тодорхойгүй хугацаагаар хойшлуулсан учраас авч хэлэлцэхгүй гэлээ. Үүний дараа Засгийн газраас өргөн мэдүүлсэн Хохирлыг эргэн төлөх нөхцлөөр барагдуулах тухай хуульд нэмэлт, өөрчлөлт оруулах тухай хуулийн төслийг УИХ-ын чуулганы хуралдаанаар хэлэлцэн батлуулах эсэхийг хэлэлцсэн юм.  Сүүлийн 10 гаруй жилийн хугацаанд яригдаж буй Хадгаламж зээлийн хоршоодын хохирогчдын хохирлыг барагдуулахаар ийнхүү хуульд өөрчлөлт оруулж Засгийн газраас өргөн барьсан юм байна. Харин үүнийг нь УИХ-ын чуулганы хуралдаанаар хэлэлцэн баталбал, ХЗХ-ны хохирогчдын хохирлыг барагдуулах шинэ эрхзүйн үндэс бий болох юм.

Уг асуудлыг Хууль зүйн байнгын хороогоор хэлэлцэж байх үеэр УИХ-ын гишүүн Ө.Энхтүвшин Хадгаламж зээлийн хоршоодын хохирогчдоос асуулт асууж хариулт авсаныхаа дараа "Уг хэрэгт нь эзэн холбогдогч байхгүй, төр хөрөнгийг хурааж аваад, идсэн учраас  төрөөр төлүүлнэ гэж байгаа юм байна. Энэ хохирогч гэх хүмүүс хэвлэлийн хурал хийж энд тэнд жагсаж, айлгадаг гэхдээ бид айхгүй л дээ. Их буруу аргаар тэмцээд байгаа юм. Үнэхээр хохирсон юм бол тэр хохирлыг нь барагдуулж өгөх хэрэгтэй байна. Хэн тэр төрийн хурааж авсан хөрөнгийг идээд үрээд алга болгосон юм. Эзэн холбогдогчыг нь олох хэрэгтэй ш дээ. УИХ-ын гишүүд  нар гөлийгөөд суугаад байх юм. Энэ хүмүүсийн хохирлыг барагдуулж асуудлыг шийдэх юм уу үгүй юу. Эсвэл тэр мөнгийг нь та нар идчихсэн юм уу" гэлээ.  Үүний дараа Хадгаламж зээлийн хоршооны асуудлыг УИХ-аар хэлэлцье гэж санал хураахад гишүүдийн олонх дэмжиж уг асуудлыг УИХ-аар хэлэлцэхээр боллоо. Уг асуудлыг ажлын хэсгийн ахлагч УИХ-ын гишүүн З. Баянсэлэнгэ  танилцуулах юм.

Н.Ганаа