С.Эрдэнэ: Гадаах тамхидалт илүү хортой байна

Өнгөрсөн жилээс хэрэгжиж эхэлсэн тамхины тухай хуульд нэмэлт өөрчлөлт оруулах хуулийн төслийг УИХ-ын гишүүн О.Баасанхүү өргөн барьсан юм. Уг хуулийн төслийг  өнөөдөр байнгын хороогоор хэлэлцэж шийдвэрллээ. Нэмэлт өөрчлөлт оруулах уг хуулийн төсөлд тамхи татах зориулалтын цэг байгуулах, хөдөө орон нутагт 500 метр гэдгийг 250 метр болгон өөрчлөх зэргийг тодорхой тусгасан аж. Ингээд байнгын хорооны гишүүдийн  олонхын саналаар О.Баасанхүү гишүүний өргөн барьсан хууль дэмжигдэж, УИХ-аар хэлэлцэхээр боллоо. Өнгөрсөн жил  хэрэгжиж эхэлсэн тамхины тухай хууль болон нэмэлт өөрчлөлтийн талаар УИХ-ын зарим гишүүд ямар бодолтой байгааг сонирхлоо.

-УИХ-ын гишүүн Д.Сарангэрэл

-Онгоцны буудлын ойролцоо тамхи татах цэг байдаггүй нь олон улсын стандартыг зөрчөөд байгаа. Үүнийг эргэж харах хэрэгтэй байх. Харин дотор орчинд тамхины цэг, өрөө байгуулахтай огт санал нийлэхгүй байна. Үнэхээр дэлхий нийтийн хандлага гэж байгаа боловч үндсэндээ олон улсад олон нийтийн газарт тамхи татахаа огт больсон байна. Тамхи татахгүй байж чаддагүй хүмүүс нь гадаа гарнуу. Машиндаа татнуу өөрсдөө аргаа бодох хэрэгтэй байх. Амьдрал дээр хэрэгтэй тамхи татдаггүй хүмүүст ашигтай хууль болсон.

-УИХ-ын гишүүн Л. Эрдэнэчимэг

-Энэ хууль эзэнтэй хууль. Би энэ хуулийг ахлаад, батлуулсаныхаа хувьд бүтэн жил энэ хуулийн араас хөөцөлдөж мэргэжлийн хяналтын байгууллагууд  руу албан бичиг шидэж байна. Цагдаагийн газрынхантай хамтарч ажилладаг. Олон нитийн цагдаатай болохоор энэ асуудлыг цагдаагийн байгууллагынхан хөнгөхөн шийдчихнэ гэж бодож байна. Аливаа хууль  хэрэгжиж эхлэснээс хойш таван жилийн дараа үр дүн нь гардаг. Энэ нь нийт хүн амын дундах уушиг амьсгалын замын өвчлөлийн хэмжээгээр илэрнэ. Мөн тэр өвчлөлд зарцуулдаг мөнгө буурсанаар гарч ирдэг юм. Гадаад орчинд тамхины цэг байгуулах нь нээлттэй. Энэ хавраас эхлэн автобусны буудлын ойролцоо тамхины цэг байгуулна.

 УИХ-ын гишүүн С.Эрдэнэ

Хэтэрхий хатуу заасан  хууль хэрэгждэггүй гашуун туршлага бий. Аливаа хууль хэрэгжилтэд  шилжих шат гэж байх ёстой. Энэ хууль огцом хатуу хууль болсон.  Доторх тамхидалт гудамжинд гарсан. Гудамжинд гарсанаар илүү хор хөнөөлтэй боллоо. Гадаа тамхи татдаг хүмүүс гудамжыг бохирдуулж шүлс, нусаа замбараагүй хаяж байна. Дотроо татахаараа ингэж их бохирдуулдаггүй юм байна лээ. Ийм байдалтай байж болохгүй. Өөрчлөлт оруулж сайжруулах хэрэгтэй гэж бодож байна.

УИХ-ын гишүүн Я.Содбаатар

О.Баасанхүүгийн гаргасан нэмэлт өөрчлөлтийг дэмжиж байна. Тамхины хяналтын хууль зөв хууль. Үр дүн гарсан. Гэхдээ засч,  сайжруулах өөрчлөлтийг  хийх хэрэгтэй. Орон нутагт 500 метр гэдэг бол хэтэрсэн тоо юм байна лээ. Тамхины хууль бус худалдааны асуудлыг зохицуулах шаардлагатай. Буруу юм хийчихээд, нөгөө буруугаа засахын тулд дахиад буруу зүйл хийдгээ болих хэрэгтэй. Олон нийтийн цагдаа гаргах шаардлаггүй. Эдийн засагт ч хохиролтой их ажил болно.

УИХ-ын гишүүн Д.Сумьяабазар

-Бодит амьдрал дээр хэрэгжих нь аль вэ гэдгийг бодож хуулиа амьдрал руугаа ойртуулах хэрэгтэй байна. Маш сайн төгс хууль болтол олон жил шаардлагатай болох байх.  Тамхи татдаг хүмүүсийнхээ эрхийг бодох хэрэгтэй. Өөрчилж сайжруулаад явах нь зөв.

УИХ-ын гишүүн Д.Батцогт

-Тамхины хяналтын хууль цаг үеэ олсон сайн хууль болсон. Төгс бол биш засаж сайжруулах юм бол байгаа.

Н.Ганаа