Тэд залуустаа итгэж байна

МАН хэзээнээсээ шинэчлэлийг хурдтай хийж байна. МАН-ын удирдах зөвлөлийн хурлаар тус намын УИХ дахь бүлгийн дэд даргад Н.Номтойбаярыг дэвшүүлэхээр шийдвэрлэсэн юм. Улмаар бүлэг хуралдаж шийдвэрээ гаргасанаар УИХ-ын гишүүн Н.Номтойбаяр бүлгийн дэд даргаар сонгогдлоо. МАН-д У.Хүрэлсүх, С.Бямбацогт, Ж.Энхбаяр нарын залуучууд хэдхэн жилийн өмнө хүчтэй орж ирж байсантай ижил 70-аад оны сүүл 80-аад оны эхэн үеийн залуучууд ийнхүү Н.Номтойбаяртай мөр зэрэгцэн орж ирж байна. Өмнө нь НИТХ-ын МАН-ын бүлгийн даргаар Д.Амарбаясгаланг томилж итгэл үзүүлж байсан бол одоо тэд УИХ-д хүч түрэн орж ирлээ. Ажиглагчид олон төрлийн хүчин зүйлс нөлөөг харж байгаа ч эцсийн дүндээ УИХ дахь бүлгийн дэд дарга болгоно гэдэг нь ихээхэн ачаалалтай УИХ-аар хэлэлцэгдэх болон хэлэлцэж буй асуудлууд дээр нэг бүрчлэн ажиллаж, зөвшилцөл яриа хэлэлцээний бүхий л шатанд оролцох тул маш яривагтай ажил байдаг. Гэхдээ МАН-ынхан залуустаа их ачааны нэгэн хэсгийг ийнхүү үүрүүллээ. Н.Номтойбаярын хэрхэн яаж ажиллах нь дараа дараагийн залуус ялангуяа түүний тэргүүлдэг НАМЗХ-ны залуучуудын улс төрийн ирээдүйн карьерт ихээхэн нөлөө үзүүлэх нь дамжиггүй. Тус намын бүлгийн дарга С.Бямбацогт өмнө нь дэд даргын ажлыг хашиж байсан юм. Н.Номтойбаярыг МАН-ын бүлгийн дэд даргаар томилсноор тус бүлэг хуучнаараа хоёр дэд даргатай ажиллах юм. Өөрөөр хэлбэл тус намын бүлэг Д.Оюунхорол, Н.Номтойбаяр гэсэн хоёр дэд даргатай болж байгаа юм.