Ш.Түвдэндорж сайд боллоо

УИХ-ын үдээс хойшхи чуулганд 40 гишүүн оролцож, 34 нь зөвшөөрч, 6 нь татгалзаж, 85 хувийн саналаар Ш.Түвдэндорж давхар дээлтэй боллоо. 

Уг нь УИХ, Засгийн газрын гишүүний албыг давхар хашихгүй байх гэсэн нийгмийн санаа бодолд Ерөнхий сайд Н.Алтанхуяг тун ч ширэн нүүртэй, дүлий чихтэй хандаж байгаа талаар МАН-ынхан өдөржингөө шүүмжилсэн юм. УИХ энэ өдөр 12 асуудлаар хуралдах ёстой байсан ч зөвхөн Засгийн газрын гишүүнийг томилох асуудлаар хуралдсаар өдрийг өнгөрөөсөн. Товчхондоо бол Ш.Түвдэндоржийг томилох эсэх асуудлыг өдөржин хэлэлцэхдээ УИХ дахь МАН-ын гишүүд давхар эрх мэдлийг дан болгох Ерөнхийлөгчийн саналаар бамбай барьж, Ерөнхий сайд  Н.Алтанхуяг Үндсэн хуулиар УИХ-ын гишүүн Засгийн газрын гишүүн байхыг хориглоогүй гэдгийг олонтаа  давтав. Н.Алтанхуяг “Хэн нэгнийг буруутгаад яах юм. Раман дотроо яажигнаад асуудлаа шийдье. Ш.Түвдэндоржийг томилоод өгчих л дөө. Энэ хаваржингаа ярьсан юмыг одоо яриад яах юм” гэж хэлж байлаа.

Ө.Энхтүвшин гишүүн 2000 гаруй хүний дунд явуулсан судалгаагаар 87  хувь нь давхар эрх мэдлийг дэмжихгүй байгааг дуулгасан. Гэсэн ч Ерөнхий сайд УИХ социологийн судалгааны дүн ярихгүй гэсэн нь сөрөг хүчнийхнийг ихэд бухимдуулав. Сонгуулийн үеэр олон нийтийн санал хамаагүй гэдэг үгээ хэлээрэй хэмээн сүрдүүлсэн дуу хоолой ч сонсогдсон.  Ц.Нямдорж “Сөрөг хүчнээ сонсох тухай ярихаа байг гэхэд та нар өөрсдийгөө ч сонсохоо байсан. Эрүүл дуу хоолойтой гишүүдээ ч сонсохоо байсан. Ерөнхийлөгчөө ч сонсохоо байлаа. Давхар дээлээ тайлахыг дэмжсэн интернетийн санал асуулгын дүнг ч тоохгүй байна. Ш.Түвдэндоржийг томилогдвол Ерөнхийлөгч хориг тавих болов уу гэж найдаж байна. Ингэж та нар Ц.Элбэгдоржийг хүнд байдалд оруулж яах юм” гэсэн юм.  Юутай ч 16,37 цагийн үед Засгийн газрын гишүүнийг томилох асуудал шийдэгдлээ.