Экс Ерөнхийлөгчгүй наадам ба Н.Энхбаярын ирэх сураг

 Шүүхээс авилга хээл хахуулийн хэрэгт буруутгагдан 2.6 жилийн хорих ял сонссон Монгол Улсын Ерөнхийлөгч асан, МАХН-ын дарга Н.Энхбаяр өнгөрөгч оны наймдугаар сард Ерөнхийлөгчийн өршөөлөөр хугацаанаасаа өмнө суллагдсан билээ. Тэрээр суллагдсан даруйдаа биеэ эмчлүүлэхээр БНСУ-ыг зорьсон. Улсын баяр наадмаар төв цэнгэлдэхийн хойморт бүх  төрийн өндөрлөгүүд заларч ард түмнээ ойроос тольдон цэнгэдэг уламжлалтай. Гэтэл энэ жил түүхэндээ дөрвөн Ерөнхийлөгчийн нүүр үзсэн Монгол улс гурван Ерөнхийлөгчтэй наадсан юм. Тэгвэл өнгөрөгч хугацаанд Н.Энхбаярын бие хэрхэн сайжирч байгаа хийгээд тус улсын буддын сүм хийдээр зочлож байгаа мэдээ сэлт тасралтгүй Солонгос улсаас ирж байлаа. Тэрчлэн алс орноос намынхаа үйл хэрэгт оролцон чиглэл өгсөөр байсан бөгөөд Монголын улс төрд нөлөөтэй нэгэн хэвээр байна. Учир нь түүний нам Шинэчлэлийн засгийн газарт хамтран эрх барилцаж буй. Харин Монгол оронд наадмын налгар өдрүүдэд буюу энэ сарын 27, 28-ны үед Н.Энхбаяр даргыг эх орондоо ирэх гэж байгаа мэдээллийг МАХН-ын Ерөнхий нарийн бичгийн дарга Г.Шийлэгдамба өгөөд байна. Ингэхдээ Н.Энхбаяр даргын бие бүрэн эдгэрээгүй байгаа учир улс төрийн үйл хэрэгт шууд оролцохгүй. Зуны дэлгэр цагт агаар салхинд гарган, сувилна гэсэн юм.