Л.Гансүхийн өмгөөлөгч ямар нууц мэдээлэл дамжуулсан бэ?

Ерөнхий сайдын ахлах зөвлөх Л.Гансүхийн өмгөөлөгч Ц.Баасандоржийг Авлигатай тэмцэх газраас шалгахаар боллоо. Учир нь түүний өнгөрсөн сарын 15-ны өдөр урьдчилан хорих ангид өөрийн үйлчлүүлэгчтэйгээ уулзаад гарахдаа үлдээсэн баримтыг ШШГ албанаас Авлигатай тэмцэх газарт хүргүүлжээ. Тус баримтанд “Тулга эмнэлэгт гарсан өчигдөр”,  “А-тай уулзсан өлсгөлөн заралсан нь дээр гэж байгаа. Өлсгөлөн зарлаад хэд хонуулаад эмнэлэгт гаргана гэж ярьсан”, “миний бодлоор их удах байх”, “нэг дэх өдөр Е сайдтай уулзана, “өлсгөлөн зарласан мэдээлэл их цацагдаж байгаа” гэх мэтчилэн гараар бичсэн зүйлс байсныг урьдчилан хорих төвөөс Авлигатай тэмцэх газарт ирүүлсэн байна.

Үүний дагуу Авлигатай тэмцэх газраас Л.Гансүхийн өмгөөлөгч Ц.Баасандорж нь төрийн өндөр албан тушаалтны нэрийг барьж мөрдөн байцаалтын явцад саад учруулсан гэж үзжээ. Тиймээс цагдаагийн байгуулагад шалгуулахаар хүсэлт гаргаад байгаа юм байна.

Уг хэрэг өнгөрсөн дөрөвдүгээр сарын 24-ний өдрөөс эхэлж эрүүгийн хэрэг үүсгэн шалгагдаж байгаа. Өнөөдрийн байдлаар нийтдээ арван хүнийг сэжигтний яллагдагчаар татан шалгаж, зургаан хүнийг мөрдөн байцаалтын шатанд цагдан хорьж байгаа юм. Гансүхийн хэргийн талаар хэвлэл мэдээллийн хэрэгслүүдээр “АТГ хүний эрхийг зөрчиж байна” гэсэн мэдээллүүд цацагдаж байгаа нь ташаа мэдээлэл гэсэн юм.

Ж.Уранмандал