”Ирээгүй гишүүдийн ихэнхи нь ЗГ-аа авч үлдэнэ гэж байсан”

Хэдхэн цагийн өмнө УИХ-ын чуулганаар Ерөнхий сайд Н.Алтанхуягийг 54,6 хувийн саналаар огцрууллаа. Н.Алтанхуягийг суудалд нь үлдээнэ гэж санал нэгдсэн намын гишүүдийн хувьд хүндхэн цохилт болсон бөгөөд энэ талаар УИХ дахь АН-ын бүлгийн гишүүн Д.Зоригтоос тодрууллаа.

-Ардчилсан намын зарим гишүүд ийм чухал асуудал хэлэлцэж байхад чуулганд ирсэнгүй. Энэ хүмүүс шалтгаанаа юу гэж хэлсэн бэ?

-Олонхын бүлгийн гишүүд гарын үсэг зурж, эсрэг санал дарж өгвөл эс үйлдэл гэж үзэн ирцээ бүрдүүлж ирээгүй хүмүүсийг намаас хасах дүрмийн заалттай. Манайхаас долоон хүн ирсэнгүй.

-Эдгээр хүмүүс бүлгийн хуралдаанд суусан уу?

- Ихэнхи нь Засгийн газраа авч үлдэнэ гэсэн байр суурьтай байсан. Гэтэл өнөөдөр ойлгомжгүй шалтгаанаар ирсэнгүй.

- Танхим тэр чигээрээ уналаа гэж ойлгож болох уу? Цаг хугацааны хувьд шинэ сайдыг томилоход хэд хоног шаардлагатай вэ?

-14 хоногийн хугацаанд шинэ Засгийн газрыг бүрдүүлэх шаардлагатай.

- Өнөөдрийн чуулганд ирээгүй гишүүдэд ямар нэг хариуцлага тооцох вэ?

-Манай намын дүрэмд тооцох хариуцлага нь тодорхой байгаа. Намаас хөөх асуудлыг  одоо шийдэхгүй. Намын хяналтын зөвлөл гэж бий. Тэр байгууллагын шийдвэр гарна.

-Дараагийн Засгийн газар байгуулахад зөвшилцлийн ширээний ард суух хэрэгтэй гэж байсан. Энэ тал дээр дэлгэрэнгүй мэдээлэл өгөөч?

-Улс орны эдийн засаг нийгмийн байдал амаргүй байна. Ийм үед УИХ-д суудалтай намууд зөвшилцөж таарна.

-Ирэх оны төсөв батлахад хоёр долоо хоног ч хүрэхгүй хугацаа үлдээд байна. Баталж амжих болов уу?

- Үүнийг бол баталж чадах байх гэж бодож байна.

-Энэ огцорсон Засгийн газрын бүтцээр төсөв өргөн баригдсан байгаа. Тэгэхээр өөрчлөлт орох уу?

-Ерөнхий сайд, Засгийн газар огцорсон ч үүрэг гүйцэтгэх хүмүүсийг сая томиллоо. Шадар сайд ахалж төсвөө батлана.

Д.Янжмаа