“Алтангадас” хүчтэй хэвээрээ байна

Ардчилсан намын ҮЗХ-ны хурал арсалдаж арсалдаж ашиггүй тарав. Ашиггүй гэдэг нь ард түмэнд шинээр томилогдох Ерөнхий сайдын нэр тодорно гэдэг хүлээлт байсан юм. Амь нь тэмцэж буй арсалдагч бүлэглүүдэд ч энэ хурал ашиг авчирсангүй. “Дүлзэнгүүд”-ээ хөөлгөхгүй нэг хэсэгтээ дөнгөсөн ч “дүлзэнгүүд”-ийн бүлэглэлүүд хүч хавсраад ч “Алтангадас”-ын гишүүдийн тоог нь давах тэнхэлгүй сулран уналаа.  Н.Алтанхуяг ганц л зүйлийг харуулж чадав. “Гадас” хүчтэй хэвээр байгааг хүнийхээ тоогоор харуулж дөнгөв. Харин ханаруулж унагах санаатангууд Халтмаагийн хүүгээс эхлээд Үүл баатараар үргэлжилж  байсан ч хүч нь хүрэлгүй  хүзүүгээ сунгаад ч нэмэргүй гэдгийг харуулсан.  З.Энхболд мэт нь улс төрд уран тоглолтоор гавихгүй, ухаантай хэмээн өөрийгээ дөвийлгөхөөс өөр нам дотроо “хөл гар” байхгүй гэдгээ хүлээн зөвшөөрүүлэв. Энгэрт нь ердөө арав хүрэхтэй үгүйтэй  хүн  өлгөгдсөн харагдана. МоАх гээд ардчиллын анхдагчид нэртэй бүлэглэл гэхэд дотроо хэд хэд задарсан байх жишээтэй.  Арай дөмөг хэсгийг нь Х. Баттулга  барьж авсан юм биз дээ, аархаад байх ч юм алга л байна даа. Д.Арвинг татаад татаад  арайхийн арвуулаа болж амь тэмцэж байгаа З.Энхболдын бүлэглэл богинохон биетэй, болчимгүй бодолтой эрийг бараадаад барсангүй хэмээн дундуурхан бодол тээгсэд л үлдлээ. Хүзүүвчинд нуугдаад хүн бүр рүү нулимахгүй байж байгаад дундаасаа Ерөнхий сайдаа сойгоод үзэх бодолтой бүлэглэл бол МҮДН.  Тэд тэмээн жин явж байна тэнтгэр хатан жадалж байг гэсэн хандлагаар амгалан тайван хандаж байгаад наанадаж Ц.Баярсайханаа ч болтугай Ерөнхий сайдад зүтгүүлэх бодол тээж буй. Энэ бүхнийг харахад  цагаа болоод ирэхээр цааш  ч үгүй нааш ч үгүй болоод байгаа намаа аврах санаа аль ч бүлэглэлд нь алга л байна. Өмнөх сайдууд суудлаа хадгалж үлдэхийг санаархаж, өширхсөн бүлэглэлүүд нэг нэгийнхээ хүнийг унагах тактик баримталж байх шив.

Эцсийн дүн нь энэ нам найман гишүүнээ хөөж, нам нь  тарах дээрээ тулаагүй  дэнжигнэж байгаа ч намынхаа нэр хүндийг  тавиад туучихаад масст таалагдахгүй олон алхам хийж байгааг тэр бүр мэдэх сөхөөтэй хүн байгаа юм уу, мэдэхгүй. Иргэд ч энэ намд итгэл алдаж, хуйвалдаж идэхээс өөр юу хийж чадаж байлаа даа  гээд л амаа баригсад олшрох төлөвтэй. Хүн шиг амьдруулья хэмээн ам алдсан АН ард түмнээ нохой шиг амьдруулж байгааг  захын хэнбугай  ч батлах билээ.  Ерөнхий сайдад хэд хэдэн хүний нэр явж байгаа ч Ц.Элбэгдорж болон Н.Алтанхуяг нарын аль нэг хүн л ялах нь тодорхой. Тэд одоо зүтгүүлэх хүнээ гаргаж ирэхийн тулд ҮЗХ-ны гишүүдийн ирцээр  тоо бодохгүй бол нэр дэвшигч нь  тоогдохгүй тоосонд торойн үлдэх тул сампин руу ухасхийн  тооцоо бодож эхлэв. Хэн хэн Ерөнхий сайдад дэвшвэл гараад ирэх магадлалтай вэ?

Ч.Сайханбилэг хамгийн өндөр магадлалтай, хэт сайрхахгүй номхон даруухан царайлж байгаад  сайтар хөөцөлдвөл сайдаар тодорч мэдэх юм.

“Фортуна” Батбаяр санаатай байгаа ч түүний гараар эдийн засаг нуран унасан тул санаа байгаад  ч сачий нь хүрэхгүй, баасан дээр нь нам нь төдийгүй монголчууд  хальтирч байна.

Х.Баттулга барахгүй, бага дунд боловсролтой, цараа нь гүйцэхгүй,  басхүү хонзон санаж өш зангидаж шүдээ зуусан төрх нь төдийлэн олонд таалагдахгүй байна.

Ц.Баярсайхан уг нь итгэл төрөхөөр дөлгөөн зантай, нүдэнд дулаахан эр. Басхүү  сэтгэлийн хөөрлөө дарж чаддаг, ямар ч хүнд асуудлыг Байнгын хороогоор ороход даргалж байгаагийнхаа хувьд  яаж ийж байгаад зохицуулаад аваад гараад  байсныг санах юм. 

Д.Дорлигжавыг дөрвөдүүд зүтгүүлэх ч дөргүй бух гээд дөнгөлж орхино. Ерөнхий прокурор байхдаа ч тэрээр олон хүний мууг үзсэн болохоор олигтой дэмжлэг авахгүй. Тэгээд ч парламент дотроосоо Ерөнхий сайд гаргах амбиц нь  дийлдэхгүй байгаа өнөөгийн нөхцөлд тэрээр тооноор нь орж тортогтой тогооных нь хөөг долоохоос цаашгүй.

Л.Гантөмөр салбартаа шинэчлэл хийсэн сайд, залуу улс төрч гэдгээрээ олон нийтээс дэмжлэг авах нэгэн. Хэлэх үг, хийсэн ажилтай түүнийг АН-ын аль ч фракц дэмжих магадлалтай.

Р.Амаржаргал аргагүй л Ерөнхий сайдын хэмжээний улс төрч. Гэхдээ тэр нам байтугай бүлэг дотроосоо дэмжлэг авах магадлал муутай. Ганцаарчилсан тоглолтонд гаршсан. Ганц мод гал болохгүй тул ганцаараа дүрэлзээд л дуусахаас. Гарц байхгүй.

Х.Тэмүүжин  хэрэв тэрийж унаагүй бол түүнийг Ц.Элбэгдорж Ерөнхий сайд төдийгүй 2017 онд Ерөнхийлөгчид  дэвшүүлэх байсан ч итгэлийг хөсөрдүүлсэн.

Э.Бат-Үүл дараагийн Ерөнхий сайдад хүчтэй өрсөлдөгийн нэг. Гэсэн хэдий ч “Алтангадас” хүчтэй байгаа энэ үед Н.Алтанхуягтай хэт их, улаан цайм тэмцэж байгаа учраас заалнаас дэмжигдэх магадлал бага. Тэгээд ч түүнд Улаанбаатарыг удирдаж байгаа "том бялуу" бий. Түүнд одоохондоо Нийслэлийн АН-ын даргын суудал хангалттай.

 Хэрэв сая М.Батчимэг гишүүн “дүлзэндээгүй” бол Монгол Улсын анхны Ерөнхий сайд эмэгтэйгээр нэр дэвших боломж байв. Талаар боллоо, тоогүй юм.

Иймэрхүү дүр зураг харагдаж байна. Ойрын үед дээрх нөхдийн хүрээнд Ерөнхий сайд тодрох хүлээлт үлдлээ. 

Л.Одончимэг