Р.Амаржаргал: Жатин Каплаг уучиллаа гээд ”баярлалаа” гэж хэлэхгүй

УИХ-ын гишүүн Р.Амаржаргал "Саусгоби сэндс" компанийн захирал Жастин Капла болон зарим хүмүүст Ерөнхийлөгч Ц.Элбэгдорж уучлал үзүүлсэн талаар өөрийн байраа сууриа хэвлэлд илэрхийлжээ. Тэрбээр "Үнэнийг хэлэхэд Ерөнхийлөгч уучиллаа гээд "баярлалаа" гэж хэлэхгүй шүү дээ. Би гэмт хэрэг хийчихсэн байсан чинь Ерөнхийлөгч нь уучилсан гэж тэр хүн ч ярихгүй. Би хэлмэгдсэн л гэнэ. Бусад нь ч гэсэн суллачихсан байна лээ гэж баярлаад л, суллачихдаг юм билээ гээд Монгол руу гүйгээд ирэхгүй.

Үнэхээр хоригдох хэмжээний гэмт хэрэг үлдсэн, үгүйг би яг нарийн мэдэхгүй. Гэхдээ шүүх шийдвэрээ гаргасан бол шүүхийн шийдвэрээр л явах, ойлгох ёстой. Хэрвээ шүүхийн шийдвэрийг буруу гэсэн бол хянуулах хэд хэдэн боломж бий шүү дээ. Ерөнхийлөгчийн уучлал бас хоёр талтай. Монголд ихэнхдээ нэлээн хэнэггүй, танхайдуу маягийн хүмүүс эхэндээ орж ирж байсан. Одоо зарим нь манай хуулийг зөрчсөн гээд хоригдож байгаа байх. Тэднийг бас уучлах уу гэдэг асуудал гарна. Тэд нар биш юмаа гэхэд, дараа нь бас хэн нэгэн саяын уучлагддаг нөхрийнх шиг хэрэгт ял авлаа гэхэд улсынх нь Ерөнхийлөгч манай Ерөнхийлөгч рүү уучлаач гэсэн захидал бичээд л, энд нь хэвлэл жаахан ажиллачихвал уучилдаг жишиг тогтчих вий дээ гэдгээс болгоомжлох хэрэгтэй" гэжээ. Мөн "гаднынхан орж ирээд татвараа баригдвал л төлнө, хоригдсон ч суллагдчих юм чинь гэсэн буруу жишиг үүсч болохыг тооцох хэрэгтэй. Тийм учраас татвараа заавал төлдөг байх, нуусан бол нуусан хэмжээг нь хэд дахин нугалж төлүүлж байж хорихоос өөр төрлийн шийтгэл оноодог ч юмуу, эсвэл уучилдаг байх хуулийн зохицуулалт хэрэгтэй боллоо л гэж би хувьдаа харж байгаа" гэжээ.