Засгийн газар бүслэлтэд орчихоод байна

Хуйсагнуур,  хаврын тарчигхан өдрүүд, гудамжны шороо хийссэн гундуухан төрхтэй хамт  улс төрчид дээрээ хэмлэлдэж, эрх дархаа булаалдсан эхнэр нөхөртэй  айл л нэг ийм байдаг боловуу гэмээр  болж бүтсэн зүйлгүй, задгай зайварган, ундуй сундуй л байна даа Монгол орон минь.

Өвөлжин хаваржин өлгийдөж авах гэж бэлдсэн Тавантолгойн хөрөнгө оруулалт Их Хурлынхны ширээн дээр очоод таг чиг. Гэсэн хэрнээ лхагва гаригт УИХ-ын Эдийн засгийн байнгын хороо хэлэлцэх асуудал байхгүй гээд хуралдсангүй.  

Эдийн засаг өндийх нь үү, Гачууртын орд гацаанаас гарах уу, Оюутолгой урагшлах уу...  Мөн ч олон асуулт, хүлээлтийн өмнө мэлэрч байна, өнөөдөр.   АН-ын сонгуулийн уриа дуудлага болсон  “улс шиг хөгжиж, хүн шиг амьдрах”-аа хүлээсээр дараагийн сонгуультай золгох нь тодорхой болчихлоо. Итгэж найдаж энэ намыг дугуйлсан юм сан, өөдөөс барьж буй хариу нь  эдүгээгийн бүтэлгүйтэл болж ирэв ээ. Их санасан газар есөн шөнө хоосон  хононо гэдэг л энэ байх.

Эдийн засгаасаа илүүтэй засаглалын хямрал монголчуудын хоолойд тээглэчихээд байна.  Харж байгаа биз дээ.  Их Хурал нь Засгийн газраа буланд шахчихаад бүлтэгнүүлж байгааг.  Хагас жилийн нүүр үзэж байгаа  “Шийдэл”-ийн Засгийн газрын шийдвэрүүд бүгд УИХ дээр очоод бүдэрдэг  болсон. Ч.Сайханбилэгийн  сайхан мэдээллийн маргааш нь З.Энхболд хаврын чуулганы нээлтэн дээр  байгуулсан Засгийн газрын сайдуудаа огцруулна гэж заналхийлсэн. Төрт  ёсны дэг жаяг, хүндлэл хүлээц, улс төрчийн соёл гэдэг юм гээгдэж буйн  жишээ нэг ийм.

Ерөнхийлөгч  энэ гэрээг  УИХ-аар оруулах шаардлаггүй гээд хэлчихсэн байхад УИХ-ын дарга нь татаж аваад  таг дараад суучихаж байгаа юм. Ерөнхий сайд нь 14 хоногийн дотор түргэн шийдвэрлэж өгөх хүсэлтийг дайгаад явуулсныг санаж байгаа байх. Тэгээд хүсэхэд хясч байгаа нь энэ.  Ажлын хэсгийн ахлагч гэсэн шошигтой  УИХ-ын гишүүн  Л.Эрдэнэчимэг “Тавантолгойн тендерийг дахин явуулах хэрэгтэй” гээд “халуурч бүлээрч” байна.  Хамгийн хачирхалтай нь энэ бүхнийг харсаар мэдсээр суугаа хэрнээ эрхэм Ерөнхийлөгч бүлх  залгичихсан юм шиг бүлтэгнэж, таг чиг суугаа нь хачирхалтай. Хэрвээ тэрбээр хэлсэн үгэндээ эзэн болдог бол Тавантолгойг Засгийн газрын хэмжээнд шийдээд урагшлуулах боломж байгаа.  Монгол  төрийн ноён оргил  хүчгүйдэж, хүлээхээс өөр гаргалгаагүй болсон бололтой.  Засаглалын энэ хямрал араасаа эдийн засгийн доройтлыг  хөтөлж ирлээ. Одоо “стэнд бай”-г мөрөөдөж байна.  Эс тэгвэл гадныханы муу амалсан 2017 оны Монголын дампуурал  жинхэнээрээ ирнэ.

Монголын “мөс зүсэгч” болох учиртай Тавантолгойн мега төсөл УИХ-ын дарга З.Энхболд гэж ганцхан хүний хүсэл зорилгоор гацчихаад байна гэж иргэд харсаар, ярьсаар байна.  УИХ нь Засгийн газраа хянадаг цагддаг юмаа гэхэд  Энхболд гэдэг хүн УИХ-ыг дангаар төлөөлөөд байх эрх зүй нь ямар байдаг юм бол. Тэр хурал удирдах, алх цохих үүрэгтэй.  Одоо дээр нь АН-ын даргын сонгуульт ажил нэмэгдсэн. Намын дарга байх нь намаасаа сонгогдсон гишүүдээ дуулгавартай байлгах  “хүмүүжил”-ийн  бэлээхэн хэрэгсэл болно гэсэн үг.  Дараагийн сонгуульд  нэр дэвшье л гэж байгаа бол  даргынхаа өөдөөс цор цор хийх хэрэггүй гэдгээ Их хуралд суудалтай энэ намын 30 гаруй гишүүд мэдэхгүй гээд яах билээ.  Дагаж л урсахаас өөр аргагүй.

Тавантолгойн асуудлаар намынх нь  Гүйцэтгэх зөвлөл Засгийн газрынхаа эсрэг улс төрийн шийдвэр гаргаж байх жишээний.  Дампуурал гэх үү, даажигнал гэмээр юм уу.

Сайханбилэгийн Засгийн газар гэж улс төрийн дэмжлэггүй,  талд төөрсөн янзага шиг , аль эсвэл нохойд хөөгдсөн туулай шиг хөөрхий дүр төрхтэй төрийн институц болж хувирав.  Одоо оймсонд хавчуулагдаж ордонд орж ирсэн УИХ-ын гишүүн О.Баасанхүү Засгийн газрыг огцруулах асуудлыг судалж байна гэнэ.  УИХ-ын  дэмжлэггүй Засгийн газарт МАН мэдээж хамтраад байхыг хүсэхгүй.  Ийнхүү “Шийдэл”-ийн Засгийн газар бүслэлтэд  орчихоод байна.  Муухай дээр улцан гэгчээр угаасаа ч урагштай биш,  дээр нь шийдэмгий бус. Хоёр толгойг ярихаас хэтэрсэнгүй.

Энэ ил далд хэмлэлдээн, энэ их талцал, энэ ойворгон улс төржилт, суудлаа олдоггүй дээдчүүл, засаглалын хуваарилалт. Ухаанд нь ухна үхсэн амьтан хэмээн хууччуул ярьж байдаг сан. 

Тэснэ тэснэ гэхэд үүнээс илүү яаж тэсэхэв гэгчээр УИХ-ыг хугацаанаас нь өмнө тараах тухай дээд түвшиндээ ярьж эхлэв бололтой.