С.Баяр Ерөнхийлөгчийн сонгуульд нэр дэвших гэнэ

Ерөнхий сайд асан, МАН-ын дарга асан С.Баяр, Н.Энхбаяр шиг харийн орноос улстөр хийхээр төлөвлөж сууна. Өнгөц харвал адилхан юм шиг энэ хоёрын хооронд асар их ялгаа бий. Хоёулаа адилхан Ерөнхий сайд, намын дарга хийж үзсэн.

Тэгсэн атлаа хоёулаа идэж уусан хөрөнгөнөөсөө болоод гаднын оронд бүгж буй. Н.Энхбаярын хувьд С.Баярыг бодвол Ерөнхийлөгчөөр ажиллаж, Ерөнхийлөгчөөр сонгогдож үзсэн туршлагатай ч хоригдож, одоо дахин саатуулагдахаар шалгагдаж байгаа. Харин АНУ-д долоон хаус худалдан авч, хууль бусаар хураасан хөрөнгө угаасан хэрэгт сэжиглэгдээд буй С.Баяр “Намайг Авлигатай тэмцэх газар /АТГ/-аас шалгаж байгаа юм байхгүй. Гэхдээ би энэ асуудлаар өөрөө хүсэлт гаргаж шалгуулах болно. Намайг гүтгэж байна” гэж алс холын Америкаас хэлсэн.

Юутай ч, ирэх сонгуулийн өмнө С.Баяр Монголд ирж АТГ-т өөрийн биеэр хүсэлт тавин шалгуулаад зогсохгүй Ерөнхийлөгчийн сонгуульд хүч үзэхээр төлөвлөсөн тухай яриа улстөрийн хүрээнд чих дэлсэх болов. Харин тэр болтол МАН болон АТГ-ыг хэрхэн аргалах хороо найруулж байгаа гэх.

Үүний эхний алхам нь МАН-ын дарга М.Энхболдыг ирэх сонгуулиас өмнө өвдөг шороодуулах төлөвлөгөө бөгөөд ингэхийн тулд МАН дотроо нөлөөтэй шадар сайд У.Хүрэлсүхийн фракцтай хүч хавсрах гэнэ. С.Баяр болон МАН ирэх 2016 оны парламентын сонгуулийг намд нь нааштайгаар шийдэгдэнэ гэж харж байгаа бөгөөд цаашлаад 2017 оны Ерөнхийлөгчийн сонгуульд ялж чадна гэж харж байгаа ажээ. Нөгөөтэйгүүр 2017 оны сонгуульд С.Баярт хүч өрсөлдөгч байхгүй хэмээн бодож сууна.

Хэрвээ 2016 оны парламентын сонгууль цаашлаад 2017 оны Ерөнхийлөгчийн сонгуульд С.Баяр ялалт байгуулбал адаглаад алдсан нэр хүндээ өсгөж, авлигын хэргээр шалгагдахгүй цаашлаад хоёронтоо сонгогдох боломжтой Ерөнхийлөгчийн бүрэн эрхийн хугацаагаа 2025 он хүртэл хадгалж чадна хэмээн найджээ. Нөгөө талаас С.Баяр 2012 оны парламентын сонгууль болон 2013 оны Ерөнхийлөгчийн сонгуульд ялж чадахгүйгээ мэдсэн үү, улстөрийн хүрээний тэмцэл ихэссэн үү, аль эсвэл мөнгө төгрөг байв уу ямартай ч 2012 оны парламентын сонгуулиас өмнө Ерөнхий сайд болон МАН-ын даргын албан тушаалаа намын анд Сү.Батболдод шилжүүлж АНУ-ыг зорьсон.

Алсаас бүхнийг харж суусан тэрбээр 2012 оны парламентын сонгуульд МАН ялбал эргэж ирэхээр төлөвлөсөн ч нам нь ялагдаж дараагийн чухал мөчийг хүртэл хүлээхээр болсон. Нөгөө талаас 2013 оны Ерөнхийлөгчийн сонгуульд одоогийн Ерөнхийлөгч Ц.Элбэгдорж чансаа өндөр, сонгогдох магадлал өндөр байгааг тухайн үеийн судалгаанууд тогтоосон.

Тиймээс С.Баяр ямар нэгэн амбийц гаргалгүй Б.Бат-Эрдэнэ аваргыг түүнтэй хав дөрвөлжин золгуулчихаад нэг хэсэгтээ амар жимэр амьдарч шинэхэн амрагтайгаа нялх үрийн зулай үнэрлэсэн шиг хэл амнаас хол буйдхан АНУ-д суухыг илүүд үзжээ.

Харин саяхны ОХУ-ын Уфа хотод болсон БРИКС /BRICS-Brazil, Russia, India, South Africa/ болон ШХАБ /Шанхайн хамтын ажиллагааны байгууллага/-ын Төрийн тэргүүн нарийн уулзалтад оролцсон барууныг дэмжигч Ц.Элбэгдоржийн айлчлал бүтэлгүйтсэнтэй холбогдуулан С.Баяр Ерөнхийлөгч болохоор зорьсон байж болох талтай.

ОХУ АНУ тэргүүтэй баруун Европын орнуудтай таагүй харилцаж буй энэ үед АНУ, Европын холбоо гэдэг Ц.Элбэгдоржийг хашраахаар шийдсэн үү ямартай ч төсөөлснөөс доогуур үр дүнтэй буцаасан. Харин С.Баярын хувьд ОХУ-д Элчин сайдаар ажиллаж байсан басхүү Оросын талыг баримтлагч бөгөөд ОХУ-тай Ц.Элбэгдоржоос илүү харьцаж чадна хэмээн үзэж байна.