Хятадын дарамт арилбал Далай лам Монголд дахин зочилно

Өчигдөр буюу 7 сарын 20 Бурхан багшийн их дүйцэн өдөр байсан бөгөөд эл өдрийг тохиолдуулан дээрхийн гэгээнтэн XIV Далай лам Монгол Улсад айлчлах гэжэ байжээ. Гэсэн ч Хятадын дарамтын улмаас энэ айлчлалаа цуцалсан байна.

Далай лам Монголд элэгтэй байдаг бөгөөд Монгол Улсад айлчлах дуртайгаа нэг бус удаа хэлж байсан удаатай. Сүүлийн үед 4-5 жилийн зайтай Монгол Улсад ирэх болсон Далай лам 2011 оноос хойш ирээгүй Монгол Улсад энэ жилийн долдугаар сард ирэх төлөвлөсөн ч Хятадын дарамтын улмаас хойшлуулсан гэж Японы “Киодоньюс” агентлаг мэдээллээ. Далай лам яагаад Монголд ирж чадахгүй байна вэ. Хятадаас хараат эдийн засагтай Монгол Улсад сүүлийн жилүүдэд Хятадын нөлөө улам бэхжсэний дээр саяхны Уфагийн уулзалтын байдлаас шалтгаалан Далай лам Монголын эрх баригчдыг хүндэтгэн ийнхүү айлчлалаа хойшлууллаа гэж олон улсын улстөрийн шинжээчид таамаглаж байна.

3 сая буддисттай Монгол Улсад Далай лам хамгийн сүүлд сонгуулиас өмнө буюу 2011 оны 11 сард айлчилсан агаад үүнтэй нийлээд нийтдээ Монгол Улсад 8 удаа айлчилсан юм. Тэрбээр өнгөрөгч оны 12 сарын эхээр Дарамсалад Монголын лам хуврагтай уулзах үеэрээ дараа жил Монголд айлчилж, буддизмын дагалдагч нартайгаа уулзахыг машид хүс байна гэж хэлж байжээ.

“Киодоньюс” агентлагийн мэдээлэлд дурдсанаар, Монгол Улсын гадаад хөрөнгө оруулалтын гол эх сурвалж болсон Хятад Улс хөршийн орны эдийн засгийн нөлөөгөө ашиглан Далай ламыг Монголд айлчлах боломжийг хааж байна гэжээ. Юутай ч, ихэнх эх сурвалжийн мэдээлснээр Далай Лам өчигдөр буюу 7 сарын 20-нд Монголд ирэх гэж байсан аж.