Өчнөөн тэрбумаар нь хулгайлаад өлсгөлөн зарлаад суллагдсаар байх уу

Өчнөөн тэрбумаар нь хулгайлчихаад өлсгөлөн зарлаж суллагддаг “моод” гэмээр зүйл Монголд бий болсныг баталсан жишээ саяхны нэг өдөр дахин болов. ШШГЕГ-ын харьяа цагдан хорих 461 дүгээр ангид хоригдож байсан ЗГХЭГ-ын дэд дарга, “Эрдэнэс Тавантолгой” ХХК-ийн ТУЗ-ийн дарга асан Г.Дэнзэн батлан даалтад гарлаа. Өлсгөлөн зарлаж, захидал бичиж, өрөөлийн хэн нэгнээр яриулж байгаад суллагддаг “моод”-ыг дуусаагүй болохыг батлав.

Хэдийгээр Г.Дэнзэнгийн биеийн байдал тааруу, шүүх үүнийг нь харгалзан үзэж ийм шийдвэр гаргасан ч яг өмнөхүүд шиг хулгайлж, далд хийсэн тэрбумуудаа хав дарсаар суллагдлаа. Үнэхээр үхэх сэхэх дээрээ тулсан хүн хав дарсан тэрбумуудаа гаргаж өгмөөр. Угаасаа хадгалсаар, гүрийсээр байгаад суллагддаг жишиг тогтчихсон болохоор хойдохууд нь энэ жишгээр явахыг хүсдэг болж. Тэгж гүрийж чадаж байгаа нөхдүүдэд үнэнээ илчлэх хэмжээний шахалт үзүүлж чадахгүй байгаа гэсэн үг. Жирийн хүнийг хориод хэдхэн хоногийн дотор үнэнийг нь хэлүүлж чаддаг манайд “аавын хүүг алаг үздэг” болоод удаж байна.

Тэгээд ч амьдралынхаа насан туршийн баталгааг хийж байхад 10 сар юу юм бэ. 10 тэрбумыг хулгайлаад 10 хүрэхгүй сар хоригдсон ч яадаг юм гэх болж. Гарч ирсэн хойноо хав дарсан мөнгөөрөө туйлж, хэрэг хийгээгүй хүн шиг аягладаг олон жишээ Монголд байна.  Үүнээс өмнө хоригдож байхдаа өдөр бүр шахуу үхлээ, хатлаа хэмээн сенсаацалж, захидал, гэрээслэл бичиж, танил талаараа хөөцөлдүүлж, улстөрийн золиос боллоо хэмээн сүржигнэнэ.

17 тэрбум төгрөгийн хэрэгт холбогдуулан АТГ-т шалгагдаж улмаар өнгөрсөн тавдугаар сарын 21-ний өдрөөс хойш цагдан хоригдсон Г.Дэнзэн өөрийгөө гэм буруугүй хэлмэгдсэн хэмээн үздэгээ удаа дараа илэрхийлсээр байгаад ийнхүү батлан даалтад гарав. Ер нь сүүлийн гурав, дөрвөн жилд авилга, албан тушаалын гэмт хэрэгт холбогдсон албан тушаалтнууд хоригдохоороо гарах гэж бөөн юм болдог ёс тогтжээ. Буруу зүйл хийж хоригдсон ч өөрийг нь хорьсон хүмүүсийн үйлдлийг улстөржүүлж, өс хонзон санах энүүхэнд. Бүр өөрөөсөө гадна өрөөлийг ч өлсүүлэн байж хорихоос суллагддаг болж.

Ийм жишгийг экс Ерөнхийлөгч Н.Энхбаяр анх тогтоож, сенсаацалж суллагддаг моодонд шинэ зүйл анги нэмэв. Олон тэрбумаар нь хулгайлсан хүнд хэдийнэ тогтсон ханш болох бусдыг өлсүүлэхэд 5 сая, хуурайгаар өлсүүлэхэд 10 саяыг төлөх бол юу ч биш.  Ямартай ч, энэ мэт олон тэрбумын хэрэгт орсон хүмүүс суллагдсаар, өршөөгдсөөр.

Ерөнхий сайд асан Н.Алтанхуягийн “хүргэн” Г.Дэнзэнгээс өмнө түүний хамтрагч гэгдэж байсан “Эрдэнэс Тавантолгой” компаний ерөнхий захирал асан Я.Батсуурь хоригдоод байхдаа мөн л өлсгөлөн зарлаж, басхүү УИХ-ын дэд дарга Р.Гончигдорж, Нийслэлийн мэр Э.Бат-Үүл нарын намынхаа журмын нөхдөд захидал бичиж тэд нь бүлэг дээрээ энэ асуудлыг нь ярин байж батлан даалтанд гаргасан.

Мөн Н.Алтанхуягийг Ерөнхий сайд байхад ахлах зөвлөх нь асан Л.Гансүх бас л өлсгөлөн зарлаж, захидал бичсээр урьдчилан хорих төвөөс суллагдаж байлаа.

Э.Төгс