З.Энхболд Ерөнхийлөгчийн хоригийг хүлээж авахаа илэрхийлжээ

УИХ-аар хаалттай хэлэлцэж баталсан Өршөөл үзүүлэх тухай хуулийн төсөлд Ерөнхийлөгч хэсэгчилэн хориг тавьсан билээ. Тодруулбал, Эрүүгийн хуулийн долоон заалтыг өршөөх 4.1, 7 дугаар заалтад хориг тавьсан. 

Гэвч уг асуудлыг өнгөрөгч даваа гарагт хэлэлцэх үед УИХ дахь “Шударга ёс” эвсэл завсарлага авч, хуулийн төслийн хоригийг ирэх долоо хоногийн мягмар гарагт дахин хэлэлцэхээр болсон юм. Ингэснээр хуулийн төсөл анхнаасаа МАХН-ын дарга Н.Энхбаярт зориулагдсан гэх хардлагыг улам баталгаажуулж өгсөн гэхэд болно. Тэгвэл АН-ынхан Ерөнхийлөгчийнхөө хоригийг хүндэтгэн хүлээж авахаар шийдсэн бололтой. УИХ-ын дарга З.Энхболд өршөөлийн хуульд тавьсан хоригийг хүлээж авах ёстой гэсэн байр суурийг илэрхийлжээ. Тэрбээр энэ байр сууриа ч ирэх мягмар гарагт хадгалах гэнэ.