Монгол дахь Турк сургуулиудын төлбөрөөр терроризмыг санхүүжүүлж байна гэв

Сүүлийн өдрүүдэд Туркийн иргэнийг хулгайлахыг завдсан хэргийн дуулиан багагүй шуугиан тарьж байна. Турк, Монголын хамтарсан “Улаанбаатар-Эмпати” сургуулийн захирал Вэйсел Акчайг гэрийнх нь гаднаас өнгөрсөн сарын 27-ны өдрийн өглөө хулгайлсан гэх мэдээлэл тархсан.  Түүнийг  баг өмссөн үл таних хүмүүс тухайн өглөөний  10:00 цагийн орчимд гэрээсээ гарч явахад нь барьж авч, саарал өнгийн “Toyota Alphard” маркийн автомашинд суулган, нүдийг нь боон, есөн цаг орчим энхэл донхолтой шороон замтай газраар авч явсан тухай Вэйсел Акчай суллагдсаныхаа дараа  хэвлэлийнхэнд хэлсэн байдаг. Харин хулгайлсан хүмүүс хэн байсан талаар тагнуул, цагдаагийн байгууллага, хулгайлагдсан гэгдэх Вейсел Акчай ч өнөөдрийг хүртэл албан ёсны тайлбар хийгээгүй чимээгүй байсаар.  

Зарим иргэн Туркийн тусгай, тагнуулынхан оролцсон байх магадлалтай хэмээн хардсан ч удаатай. Тухайн өдөр Турк улсаас “СТ 4010” дугаартай онгоц анх Хөшигийн хөндийд бууж, дараа нь “Чингис хаан” олон улсын нисэх онгоцны буудалд газардсан нь “хулгайлагдсан” иргэнийг авч явах зорилгоор ирсэн байж болзошгүй гэх хардлагыг олон нийтийн дунл бий болгосон юм. Тус онгоц Туркийн зэвсэгт хүчнийх. Энэ онгоцоор Казахстан болон Косвогоос туркууд хүн хулгайлсан тухай Улаанбаатар Эмпита сургуулийн зарим ажилтан телевизээр ярьсан.  Захирлыг нь хулгайлсан даруйд Турк сургуулийн багш, оюутнууд, төгсөгчид “Чингис хаан” олон улсын нисэх буудлын гадаа эсэргүүцэл илэрхийлж, гэм буруугүй хүнийг суллахыг шаардсан,  хэвлэл мэдээллийнхний ч нөлөөгөөр  Вэйсел Акчай Монголд үлдсэн. 

Эл хэрэгтэй холбогдуулан өчигдөр БНТУ-аас Монгол Улсад суугаа Онц бөгөөд Бүрэн Эрхт Элчин сайд Ахмет Язал хэвлэл мэдээллийн байгууллагуудын төлөөлөлтэй уулзаж, мэдээлэл өгсөн юм.

Тэрбээр “Турк улсад 2016 оны долдугаар сарын 15-нд төрийн эргэлт хийхээр оролдсон Фетуллах Гулен болон түүний удирддаг ФETO бүлэглэлийн террорист үйл ажиллагааг Монгол Улсад үйл ажиллагаа явуулдаг Эмпати сургуулиуд санхүүжүүлж байна. Эмпати сургуулиудыг, удирдлагуудыг нь Туркийн талд хүлээлгэн өгөх талаар сүүлийн үед болсон хоёр орны айлчлал, уулзалтуудаар байнга илэрхийлж байгаа” гэсэн байр  суурь илэрхийлсэн юм. Үндсэндээ Монголд террорист үйл ажиллагаа явуулдаг гэж шууд хэлээд байгаа юм. Захирлын тухайд сурагчид, төгсөгчид, ажилтнууд нь Монголд 20-иод жил амьдарсан. Ямар нэгэн гэмт хэрэгт Монголд ч Туркт ч холбогдож байгаагүй гэдгийг батлан ярьдаг юм.  

“Турк сургуулиудыг Туркийн Засгийн газарт хүлээлгэн өгөх тухай  Монгол Улсад удаа дараа уламжилсан. Эмпати сургуулиудад сурч буй хүүхдүүдийн асуудлыг  хэрхэн шийдвэрлэх вэ” гэсэн асуултад  “Энэ тухай удаа дараа байр сууриа илэрхийлсэн. Турк сургуульд сурч буй сурагчдын хувьд ямар нэгэн хүндрэл гарахгүй. Эцэг, эхчүүдийн төлж буй сургалтын төлбөр террорист байгууллагыг санхүүжүүлэхэд зарцуулагдаад байгаа нь Монгол Улс терроризмыг санхүүжүүлэгч улс болон ойлгогдож байна. Манай талд сургуулиудыг хүлээлгэн өгснөөр  ямар нэгэн өөрчлөлт гарахгүй. Хэвийн ажиллана” гэсэн хариулт өгчээ.   Турк Улсын Ерөнхий сайд, Шадар сайдын айлчлалын хүрээнд энэ асуудал яригдсан. Монгол Улсаас Турк улсад хийгдсэн албан ёсны айлчлалуудын үеэр ч яригдсан гэдгийг хэлмээр байна. Харин манай улсын албаныхан ямар нэгэн тайлбар өгөөгүй л байна. Элчин сайдын ярианаас Монгол Улс терроризмыг санхүүжүүлэгч гэсэн ойлголт  шууд гарч байна.

А.Эрдэнэ

www.zindaa.mn