Энэ өдөр түүхэнд: Гарсиа Маркесийн талаар 12 сонирхолтой баримт

Колумбын их бичгийн хүн, Нобелийн шагналт зохиолч Габриель Гарсиа Маркес 2014 оны энэ өдөр насан эцэслэсэн билээ. Габриэль Гарсиа Маркес Мехико дахь гэртээ эхнэр Мерседес Барча, хүү Гонсало, Родриго нарынхаа гар дээр амьсгал хураасан. Агуу зохиолч 88 настай байлаа. Колумбын Засгийн газар алдарт иргэнийхээ дурсгалыг хүндэтгэн, 3 өдрийн гашуудал зарлаж байв.

1. Габриэль 16 хүүхэдтэй айлын ууган хүү байлаа.

2. Маркес хүүхдийн үлгэр бичиж байсныг хүмүүс мэдэхгүй. Харин хүүхдүүд нь түүний зохиосон үлгэрийг уншаад “Та хүүхдүүдийг үнэхээр ийм тэнэг гэж бодож байна уу” гэж хэлснээс хойш больжээ.

3. “Хэрэв би зохиолч болоогүй бол баар, рестораны хөгжимчин болох байсан. Дурласан хосуудад улам их хайр бэлэглээд сууж байх байлаа” гэж ярьж байв.

4. 2004 онд тэр “Гунигт янхнуудаа дурсахуй" романаа хэвлүүлжээ. Гэвч албан ёсны нээлтээс сарын өмнө хулгайч гар бичмэлийг нь хувилан, худалдаанд гаргасан байна. Хариуд нь Маркес зохиолынхоо төгсгөлийг өөрчилжээ.

5. Хуучин ЗХУ-ын тухай бичсэн эссендээ тэр “ЗХУ бол кока-колагийн сурталчилгаа байдаггүй орон” хэмээн гайхаж байв.

6. Алдарт “Зуун жилийн ганцаардал” зохиолоо хэвлэлийн газар илгээх гэтэл түүнд 80 песо дутжээ. Ингээд эхнэрийнхээ гоо сайхны хэрэгслийг тавьж мөнгө авсан байна. Эхнэр нь энэ тухай мэдээд “Энэ ном нь муу зохиол байвал бүр баларна даа” гэж хэлж байжээ.

7. Мексикийн Засгийн газраас түүнийг 1965-1985 онуудад нууцаар мөрдөн шалгадаг байв. Учир нь Маркес коммунист дэглэмийн орны удирдагчидтай дотно харилцаатай байжээ.

8. Маркес онгоцоор аялах дургүй байв.

9. “Зуун жилийн ганцаардал” зохиолоороо дэлхийн хэмжээнд алдаршсанхаа дараа Габриэль Гарсиа Маркес улс орнуудын төрийн тэргүүдтэй уулзаж, хүлээн авалтад оролцох маш дуртай болсон тул нэг хэсэг түүнийг “Габриэль Гарсиа Маркетинг” гэж нэрлэдэг болсон гэдэг.

10. АНУ-г шүүмжилж, Кубын хувьсгалыг магтан дуулсан тул түүнд 1961-1991 онд АНУ-ын виза олгодоггүй байжээ.

11. “New York Times” сонин “Зуун жилийн ганцаардал” зохиолыг бүх хүн төрөлхтний заавал унших ёстой номын жагсаалтын 2-т Библи болон Хуучин гэрээний эхний ном “Эхлэл”-ийн дараа оруулсан байдаг.

12. Амьдралынхаа сүүлийн жилүүдэд тэр ярилцлага өгөхөөс татгалздаг болсон бөгөөд 30 минутын ярилцлагаа 50 мянган доллараар үнэлдэг байжээ.