Н.Сарангэрэл: Хулгай хийсэн охиныг зүсээ хувилгаад явж байхад нь баарнаас барьсан

Гэрийн үйлчлэгч нь ажиллаж байсан айлаасаа өндөр үнэ бүхий эд зүйлс хулгайлж, оргон зайлсан хэрэг өнгөрөгч дөрөвдүгээр сарын 29-ний өдөр нийслэлийн Баянзүрх дүүрэгт гарсан байна. Сэжигтэн эмэгтэй нь агентлагаар зуучлуулан тухайн айлд үйлчлэгчээр ажилд орсон ба айлдаа дөрөв хоног байрлаад ийнхүү хулгайн гэмт хэрэг үйлджээ. Энэ талаар “Baby sittеr” төвийн захирал Н.Сарангэрэлтэй ярилцлаа.

-Юуны өмнө байгууллагаа танилцуулахгүй юу? Ямар үйл ажиллагаа явуулж байна вэ?

-Манайх хүүхэд гэр бүл, хүүхэд хөгжлийн чиглэлд үйл ажиллагаа явуулдаг “Монголын хүүхдийн, Гэр бүл, ирээдүй” төвийн дэргэдэх “Baby sittir” гэдэг байгууллага. Монголын хүүхдийн, Гэр бүл, Ирээдүй төв маань 1998 онд анх байгуулагдсан. Харин “Baby sittir”  төв нь хүүхэд асрагч, гэрийн үйлчлэгч, цэцэрлэгийн туслах багш бэлтгэдэг анхны мэргэшсэн, тусгай зөвшөөрөлтэй агентлаг байгаа. Энэ чиглэлд 11 жил үйл ажиллагаа явуулж байна.

-Хүүхэд асрагч, гэрийн үйлчлэгчийн ажил нийгэмд хэр эрэлттэй байна вэ?

-Орчин цагт хүн бүхэн ажил хийх шаардлагатай. Ялангуяа эмэгтэйчүүд гэрийн ажлаа амжуулах, хүүхэд харах хүнгүйн улмаас ажил хийх боломжгүй тохиолдол их байдаг. Өөрөөр хэлбэл, хүүхэд асрагч, гэрийн үйлчлэгчийн ажил нийгэмд эрэлт хэрэгцээтэй байгаа.

-Хүүхэд асрагч хүүхдийг нь зодсон, эм өгсөн аль эсвэл айлаасаа хулгай хийсэн гэх мэт үнэн худал мэдэгдэхгүй хэргүүд сонсогддог. Танайд тийм тохиолдол гарч байв уу?

-Энэ хугацаанд гэрийн үйлчлэгч нараас хулгай хийсэн ноцтой тохиолдол бүртгэгдэж байгаагүй юм. Яагаад гэхээр бид нар хүмүүстэйгээ маш нарийн гэрээ хийдэг. Мөн хүүхэд асрагч, үйлчлэгч нарыг сургалтад хамруулж, эрүүл мэндийн шинжилгээ авсны үндсэн дээр үйлчлүүлэгч айлуудтайгаа холбож өгдөг. Харин сүүлд насанд хүрээгүй охин манайхаар холбогдож айлд очоод хулгайн хэрэгт холбогдсон тохиолдол гараад итгэж чадахгүй сууж байна.

-Хүүхэд асрагч болон гэрийн үйлчлэгч авах гэж байгаа хүмүүст сэрэмжлүүлэг болох үүднээс энэ хэргийн талаар дэлгэрүүлж ярихгүй юу?

-Манай байгууллага ажилд орохоор ирж байгаа хүмүүстэйгээ хөдөлмөрийн гэрээ хийгээд, эрүүл мэндийн үзлэгт хамруулаад, ажлын анкет бөглүүлээд бүх зүйлийг ном ёсны дагуу хийдэг юм. Би өөрөө хүмүүстэйгээ ярилцлагаа хийдэг. Гэтэл өнгөрсөн долоо хоногт нүдэнд дулаахан маш даруухан охин ажилд орохоор ирсэн. Иргэний үнэмлэх бичиг баримтаа аваад ир гэсэн чинь “Би Эрдэнэтийн хүүхэд юм аа. Тэгээд үнэмлэхээ хулгайд алдчихсан байгаа. Би ирэх амралтын өдөр танд хурууны хээгээр лавлагаа аваад ирнэ” гэлээ. За тэгээд анкетаа бөглүүлээд, гэрээ хийгээд, эрүүл мэндийн үзлэгт хамруулаад байж байтал үйлчлүүлэгч айлаас маань утасдаад, яаралтай хүүхэд асрагчаа авмаар байнаа, та хүнээ явуулж байгаач гэж хүссэн юм. Эхний долоо хоног туршилтын долоо хоног байдаг учраас тэр хугацаанд баримт бичгээ авч ирэх байх гээд нөгөө охиныг айл руугаа явуулсан.

-Энэ хэргийг цагдаагийн байгууллага шалгаж байгаа юу? Хулгайн хэргийн хохирлын хэмжээ хэдэн төгрөг вэ?

-Хэргийг нь Баянзүрх дүүргийн цагдаагийн хоёрдугаар хэлтэст шалгаж байгаа. Хохирол нь одоогоор 4-5 сая төгрөг гэж тогтоогдсон байгаа юм билээ.

-Охиныг хулгай хийгээд явсныг хэрхэн мэдсэн бэ?

-Дөнгөж өчигдөр /2019.04.30/ мэдсэн. Айлын эзэгтэй өглөө 07:00 цагт яриад нөгөө охин маань орон дотроо хүн унтаж байгаа мэтээр засаж орхиод шөнө гараад явчихсан байна. Ирэхгүй байна гэсэн. Тэр өдөр хоёр талдаа харзнаад байж байтал охины утас салчихсан. Айлаас утасдаад эд зүйл алга болсон байна гэсэн. Тэгээд цагдаа нартай хамт гэрт нь очтол охин шөнө хулгай хийгээд гарахдаа нэг давхрын цонхоор гараад явсан байсан. Яагаад гэхээр айлын хаалгаар гарвал дохиолол дуугардаг. Энэ бүгдийг судалж мэдээд зугтсан байгаа юм.

-Хулгай хийсэн охиныг зүсээ хувилгаад явж байхад нь саатуулсан гэсэн. Энэ талаар?

-Цагдаагийнханд би хөдөлмөрийн гэрээ болон ажлын анкет бүгдийг нь өгсөн. Гэтэл нөгөө охин овог нэр, насаа хүртэл худал хэлсэн байсан. Төв аймгийн харьяат 17 настай Б гэдэг охин байсан. Бүх зүйл нь худлаа байсан. Насанд хүрээгүй хүүхэд байгаа юм. Цагдаа нар хэдийгээр хайж байгаа ч бид нар үйлчлүүлэгч нарынхаа өмнө хариуцлага хүлээж байгаа учраас өөрсдөө хайж эхэлсэн. Ганц нэг сэжүүр гаргаж хуучин үерхдэг байсан залууг нь олоод яриулсан. Тэгээд орой нь хороололд байдаг нэг бааранд байна гэдгийг сонсоод нөгөө залуутай, цагдаа нартай хамт очсон. Гэтэл хиймэл үс зүүгээд, хэдийн 30 гаруй насны эмэгтэй шиг болж зүсээ хувилгаад, танихгүй гэж мэлзсэн. Цагдаа нар тэр охиныг хамт явсан хүмүүстэй нь хамт саатуулаад явсан.

-Насанд хүрээгүй хүүхэд хулгайн хэрэг үйлдсэн. Үүний цаана хулгайн бүлэглэл ч байж магадгүй талаар цагдаагийнхан хэлж байна. Хамт байсан хүмүүсийнх нь тухайд танд сонссон зүйл байгаа юу?

-Ажлын анкетны заавал холбоо барих дугаар гэдэг дээр нэг эмэгтэйн дугаарыг бичээд эгч гэж тэмдэглэсэн байсан. Гэтэл тэр нь эгч нь биш өөрөөс нь нилээд эгч найз нь байсан. Тэрэнтэй хамт хулгайн зүйлээ зарж борлуулаад, мөнгөөр нь бааранд ороод явж байсан байгаа юм. Харин хуучин найз залуугийнх нь хэлснээр, Б охины ард 40 орчим насны эрэгтэй байдаг гэсэн. Тэр эрэгтэй нь шөнөөр тэр айлд ороод хамт хулгай хийсэн байж магадгүй юм билээ. Цагдаа нар хэргийн газраас шороотой эрэгтэй хүний гутлын мөр олсон тухай ярьсан. Хулгайн зүйлийг нь цаашаа борлуулдаг нас биенд хүрсэн хүмүүсийн бүлэглэл байна гэж би ойлгоод байгаа.