Ерөнхий сайдын зөвлөх Азийн сайд нарын хуралд үг хэллээ
Ерөнхий сайдын гадаад бодлогын зөвлөх Б.Мөнхжин Азийн Хамтын ажиллагааны яриа хэлэлцээний Сайд нарын 16 дугаар хуралд оролцож, Монгол Улсын байр суурийг илэрхийлж үг хэллээ. Тэрээр үгэндээ бүс нутгийн аюулгүй байдал, хамтын ажиллагааны талаар Монгол Улсын Засгийн газраас баримталж буй бодлого үйл ажиллагааны талаар танилцуулаад, улс орнууд эдийн засгийн өсөлтийг илүү тогтвортой, хүртээмжтэй болгох чиглэлд цаашид хамтран ажиллахын чухлыг тэмдэглэв.
16 дахь удаагийн сайд нарын хурлыг Катар Улс даргалсан бөгөөд өнгөрсөн сарын 30-наас энэ дугаар сарын 2-ны өдрүүдэд Доха хотноо болж өндөрлөв. Хурлаас улс орнуудыг цаашид улам нягт, хамтран ажиллаж, хамтдаа хөгжихийг уриалж, Дохагийн Тунхаглалыг батлав. 17 дугаар сайд нарын хурлыг Бүгд Найрамдах Турк Улс хүлээн авч зохион байгуулахаар болов.
Азийн хамтын ажиллагааны яриа хэлэлцээний байгууллага (Asia Cooperation Dialogue) нь анх 2002 онд байгуулагдсан бөгөөд өдгөө Азийн тивийн 33 улсыг эгнээндээ нэгтгэсэн бүс нутгийн хамтын ажиллагааны чухал платформ болон хөгжиж байна.
Холбоотой мэдээ
Сэтгэгдэл ( 0 )