Б.Энх-Амгалан сайд "Дэлүүн болдог" нисэх буудлыг олон улсын стандартад нийцүүлж жуулчдыг татах нь зүйтэй гэв
Монгол Улсын Ерөнхий сайд У.Хүрэлсүхийг Хэнтий аймагт ажиллах үеэр УИХ-ын гишүүн, Засгийн газрын гишүүн, Зам тээврийн хөгжлийн сайд Б.Энх-Амгалан Хэнтий аймгийн Дадал сумын "Дэлүүн Болдог" нисэх буудлын үйл ажиллагаатай танилцаж, холбогдох албаны хүмүүст үүрэг чиглэл өглөө. Тус нисэх буудал нь 1960 онд Дадал сумын төвд Ус цаг уурын байранд байрлаж, холбоочны нэг орон тоотойгоор үйл ажиллагаагаа эхэлсэн түүхтэй. 1970-1992 онуудад АН-2, АН-24 агаарын хөлгөөр зорчигч тээвэр, ачаа тээш, шуудан, түргэн тусламжийн үүрэг гүйцэтгэн үйлчилж байсан ба 1992-2000 онуудад Ю-12 агаарын хөлгөөр Улаанбаатар-Өндөрхаан-Биндэр-Дадал чиглэлд тогтмол нислэг үйлдэж байжээ. 2004 онд нисэх буудлын барилгыг шинэчилсэн бөгөөд нэгэн зэрэг дунд оврын нэг агаарын хөлөг, хоёр нисдэг тэрэг хүлээн авч, 30-50 хүнд үйлчлэх хүчин чадалтай болгон өргөжүүлсэн байна.
Ерөнхий зориулалтын нисэхийг хөгжүүлэх хөтөлбөрийн хүрээнд аймаг тус бүрийн зорчигч урсгал, газарзүйн байршил, хүн амын нягтаршил, авто замын сүлжил зэрэг хүчин зүйлүүдийг судалж, бага оврын агаарын хөлгийн шаардлагатай хөөрч, буух зурвас байгуулах газарзүйн байршлыг тогтоох судалгаа хийсэн бөгөөд Хэнтий аймгийн Дадал суманд буух зурвас байгуулах нь нийгэм эдийн засгийн хувьд үр ашигтай гэж тооцоолсон. Өнгөрөгч онд ИНЕГ-ын Залуучуудын холбооноос санаачлан тус нисэх буудлыг тохижуулсан бөгөөд Зам, тээврийн хөгжлийн сайд Б.Энх-Амгалан, Засгийн газраас дээрх бүс нутгийг “Түүхэн аялал жуулчлалын бүс” болгон зарласантай холбогдуулан "Дэлүүн Болдог" нисэх буудлыг олон улсын стандартад нийцүүлэх шаардлагатай гэж үзэж буйгаа илэрхийлэв. Үүнд шаардлагатай хөрөнгө оруулалтын асуудлыг судалж үзэж, шийдвэрлэх талаар Монгол Улсын сайд, ЗГХЭГ-ын дарга Л.Оюун-Эрдэнэтэй санал солилцлоо.
Түүх соёлын дурсгалт нутаг Хэнтий аймаг, Дадал сум, Дэлүүн болдог, дэлхийн дайдад алдраа дуурсгаж явсан эзэн Чингис хаан гээд гадна дотны зочдыг татах бүхий л зүйл байдаг учраас тус нисэх буудлыг олон улсын стандартад нийцүүлэх нь эдийн засгийн хувьд ч үр ашигтай юм.
Холбоотой мэдээ
Сэтгэгдэл ( 2 )
Их эзэн хаан Чингисийнхээ өлгий нутгийг дэлхийд сурталчлах гэдэг бол зөвөө?! Мөнгө харамгүй зарцуулж барьж байгуулаад өгвөл аялал жуулчлалыг хөгжүүлэхэд сайхан бүтээн байгуулалт болох нь дамжиггүйшдээ?! Тэр болтол нь хуучин буудлаач додомдож ашиглах боломжтойшдээ?!
Эд бүр солиорчихжээ. Байгаа буудал, шинээр барьсан буудлаа бүрэн гүйцэд ашиглаж, шинийг нь ажилд оруулж чадаагүй байж, хий мөрөөдөж, Хүрэлсүхээ даган попорч хөдөө эзгүй хээр бөөн хөрөнгө үхүүлэх нь дээ. Салбарын сайданцар гуай ТЭЗҮ-тэй юм ярихаас цээжний бангаар асуудалд хандаж болохгүй. Наад Оюун эрдэнийн араас оржээ..