Н.Номтойбаяр: Өрөөнд талийгаач, зөвлөх, бид гурав байсан

УИХ-ын гишүүн Н.Номтойбаярыг АН-ын дэд дарга, УИХ-ын гишүүн асан Г.Батхүүтэй хамгийн сүүлд уулзсан гэж хэвлэлүүд бичжээ. Энэ талаар Ардчилсан намынхан ч өглөө мэдээлэл хийхдээ дурьдсан.  Тэгвэл энэ асуудлаар УИХ-ын гишүүн Н.Номтойбаяр Төрийн ордонд тайлбар хийлээ.

Тэрбээр “Юуны өмнө талийгаач Г.Батхүү гишүүнд тохиолдсон золгүй явдалд харамсаж байгаагаа илэрхийлье. Энэ бол зөвхөн АН-ын харамсал биш. Монголын ард түмэнд золгүй явдал тохиолоо. 2019.05.17-ны орой талийгаач бид хоёр уулзсан. Мэдээж өмнөх парламентад хамт ажиллаж байсны хувьд болон адилхан авто спорт сонирхогчдын хувьд манай өрөөнд 10-15 минут саатаад гарсан. Тэгэхээр хамгийн сүүлд уулзсан МАН-ын гишүүн гээд хайгаад байх зүйл байхгүй. Сүүлд уулзсан хүмүүсийнх нь нэг яах аргагүй би. Талийгаачийг өрөөнөөс гарсны дараа миний бие 19:18 цагт бүлгийн хуралд орсон. Бүлгийн хуралд картаа хийхээр цаг нь бүртгэгддэг. Яах аргагүй цаг хугацааны хувьд сүүлд уулзсан хүний нэг нь би учир Цагдаагийн байгууллагаас надаас гэрчийн мэдүүлэг авсан. Энэ талаар холбогдох мэдээллийг өгсөн. Түүнээс өөр мэдээлэл надад алга” хэмээн тайлбар хийлээ. Энэ үеэр сэтгүүлчид түүнд дараах асуултыг тавьж, хариулт авав.

-Талийгаач “Торгоны зам” авто ралли зохион байгуулах хуралд оролцсон юм билээ. Танд энэ талаар ярьсан уу?

-Тэр хурал дээр юу ярьсныг хэлээгүй. Ямар ч байсан Торгоны зам уралдаан долдугаар сард болно гэдгийг хэлсэн. Миний ойлгосноор гурван давхарт, З.Энхболд даргын өрөөнд хурал нь болсон шиг байгаа юм. ОХУ-ын талаас зочид ирсэн гэсэн. Бид хоёр энэ жил манай төрлийн авто спортын тамирчдын цол зэргийн асуудлыг шийдэх талаар ярилцсан. Үндсэн холбоотойгоо хамтраад хурлаа хийгээд явъя гэсэн ажил хэрэгч зүйлүүдийг ярьсан.

-Таньтай уулзахдаа сэтгэл санааны байдал нь ямар байсан бэ?

-Зүв зүгээр байсан. Жин нилээн хассан харагдсан. 2016 оны сонгуулиас хойш бид хоёр таараагүй. Нүүрний судас улайлттай, “Ах нь эмчилгээ хийлгэж байгаа” гэж хэлсэн. Ордон чинь тэр чигээрээ л камер баймаар юм. Намайг бүлгийн хуралд орох гээд явж байхад сэтгүүлчид, төрийн тусгай хамгаалалтынхан байсан. Бүлгийн хуралд ороход У.Хүрэлсүх дарга, Г.Занданшатар дарга гээд бүгд байсан.  

-Та бүлгийн хурал дээрээ Ерөнхий сайд У.Хүрэлсүхтэй маргалдсан юм уу?

-Маргалдаан байнга болдог. Тэр өдөр хоёр гишүүний асуудал хөндөгдсөн байсан. Өмнөх бүлгийн хурлууд дээр ч маргаан болж л байсан. Түүнээс биш хувийн шинж чанартай биш. Сүүлийн үеийн маргаан 1072 хувьцааны асуудал, мах болон өргөн хэрэглээний бараа бүтээгдэхүүний үнийн өсөлттэй холбоотой Засгийн газрын үйл ажиллагааны хэрэгжилттэй холбоотой өрнөж байна. Дандаа ажил хэргийн маргаан.

-Таны өрөөнд талийгаачаас гадна өөр хүн байсан уу?

-Миний өрөөнөөс ганцаараа гарсан. Миний өрөөнд миний зөвлөх, талийгаач, миний бие бид гурав байсан. Уулзаж байхад нэмж хүн орж ирээгүй. Түүнийг гарснаас 3-4 минутын дараа би зөвлөхийнхөө хамт өрөөнөөсөө гарч, бүлгийн хуралд орсон. Бүлгийн хурал удалгүй тарсан. “Ах нь яараад байна. Хүн хүлээж байгаа” гээд манай өрөөнөөс яаруу явсан.

-Тэр өдөр таныг уусан байсан гэсэн?

-Үгүй дээ. Ямар мэдээллээр тэгээд байгаа юм бол. Өдөр нь Хятадад айлчлал хийсэн УИХ-ын гишүүдтэй хоолонд хамт орсон. Тэгэхэд Ши Жин Пин даргын өгсөн бэлэг гээд 0.5 литрийн архи задалсан. Өөр зүйл байхгүй.

Нэмж хэлэхэд, ар гэрийнхэнтэй нь уулзаж, эмгэнэл илэрхийлж чадаагүй байж ийм байдлаар хэвлэлийн хурал хийсэн явдалдаа уучлал хүсэж байна.
 

ВИДЕО ҮЗЭХ