Л.Оюун-Эрдэнэ: Засаг даргад газар олгож болохгүй гэсэн чиглэл өгсөн

Засгийн газрын ээлжит хуралдаанаар Улаанбаатар хотод замбараагүй газар олголт, зориулалт бусаар ашигласан асуудлыг цэгцлэх асуудлыг хэлэлцсэн байна.

Энэ талаар ЗГХЭГ-ын дарга Л.Оюун-Эрдэнэ нийгэмд бий болсон алдаатай, төлөвлөлтгүй, аливаа асуудлыг засаж, залруулж байж бид цаашаа хөгжих талаар ярих цаг болсон. Улаанбаатар хотын утаа, автомашины түгжрэлтэй холбоотой өнөөдөр үүсээд байгаа хүндрэлүүд бол нэг талаасаа улстөрчид, эрх мэдэлтнүүдийн өнгөрсөн жилүүдэд хууль бусаар, замбараагүй олгосон газар олголттой холбоотой гэж үзэхээс өөр аргагүй. Өнгөрсөн 27 жилийг бүхэлд нь дүгнэж, цэгцлэх олон асуудал гарч ирж байгаагийн нэг нь нийслэлд замбараагүй олгосон газар олголтыг цэгцлэх асуудал гэдгийг онцолсон юм. Мөн нийслэлийн өмнөх удирдлагуудын хууль бусаар бусдад олгосон зарим газар олголтыг жишээ болгож танилцуулав.

Тухайлбал, хотын төвд Хөрөнгийн биржийн баруун талын 0.7 га, мөн 2012 онд хотын төвд “Асашёорюү” цэцэрлэгт хүрээлэн бүхий 0.24 га, Монгол, Туркийн найрамдлын цэцэрлэгийн хажуу талд 1.8 га, МУИС-ийн урд талын оюутны талбайн 0.12 га, Улсын драмын театрын зүүн талын Ю.Цэдэнбалын нэрэмжит талбай бүхий 0.4 га газруудыг тухайн үеийн хотын захирагчийн захирамжаар Улаанбаатар хотын банканд тус бүрийг нь таван жилийн хугацаатай эзэмшүүлэхээр олгосон байжээ. Үүнээс гадна “Улаанбаатар” зочид буудлын өмнөх цэцэрлэгт хүрээлэн, Д.Сүхбаатарын талбайн газруудыг ч Улаанбаатар хотын банк өөрийн мэдэлд авсан талаарх баримт, материалыг тэрбээр баримтаар тайлбарлаад хотын төвд нийтийн эзэмшлийн зам, талбай бүхий нэг бус газруудыг ганцхан банкны эзэмшилд олгосон байгаа нь хууль бус үйлдэл хэмээн тодорхойлов. Засгийн газрын зүгээс ирэх даваа гарагт нийслэлийн удирдлагуудтай хамтран зөвшөөрөлгүй олгосон газруудын эрхийг цуцалж, улмаар зарим объектив буулгах асуудлыг тавих гэнэ. ЗГХЭГ-ын дарга Л.Оюун-Эрдэнийг мэдээлэл хийх үеэр дараах асуултад хариулт авлаа.

-Засгийн газраас Хятадын компанид 50 га газар олгосон гэх мэдээлэл байгаа. Үүнийг цуцлах уу?

-Ямар нэгэн компанид 50 га газар олгосон зүйл байхгүй. Санал солилцож байсан зүйл бий. Ерөнхий сайд нийслэлийн Засаг даргад ямар ч газар олгож болохгүй гэдэг чиглэл өгсөн. 50 га-тай холбоотой асуудал байхгүй. Цаашдаа ч ийм асуудал гарахгүй.

-Олгосон газраа төрд авлаа гэхэд дахиад нэг дарга зөвшөөрөл өгөхгүй гэх баталгаа бий юу?

-Хаа хаанаа хяналттай, олон улсын нийтлэг жишгийн дагуу хөгжье гэж хэлмээр байна. МУИС-ийн газар МУИС-даа л байг. "Улаанбаатар" зочид буудлын урд талын цэцэрлэгт хүрээлэн хэвээрээ л байг. Тэнд заавал аж ахуйн нэгжүүд оролцох шаардлага байхгүй.

-Зөвшөөрөлгүй барьсан барилгыг нурааснаар хохирлын асуудал яригдана. Үүнийг хэрхэн шийдэх вэ?

-Зөвшөөрөл аваад барьсан бол зөвшөөрөл олгосон хүн нь хариуцлага хүлээх хэрэгтэй. Энэ асуудлыг цэгцлэхэд хэн нэгний эсэргүүцэлтэй тулгарна. Тиймээс олон нийтийн дэмжлэг хэрэгтэй. Бүх байшинг буулгана гэж хэлэхгүй. Үнэхээр зөвшөөрөлгүй барьсан бол буулгахаас өөр арга байхгүй.