Авто зам ашигласны төлбөрийн нэмэгдлийг ЦУЦАЛЛАА

Нийслэлийн иргэдийн төлөөлөгчдийн хурлын Тэргүүлэгчдийн хурлаар авто зам ашигласны төлбөрийг нэмэгдүүлсэн шийдвэрийг 79.17 хувийн саналаар цуцлах шийдвэр гаргалаа.

Хуралдааны үеэр ИТХ-ын төлөөлөгч Ц.Сандаг-Очир "Нэг хэсэг нь ажил хийх гээд нөгөө хэсэг ажлыг унагаах гээд байна. Саяны жагсаал цуглаан улс төрийн зорилготой байсан. Авто зам ашигласны төлбөрөөр гүүрэн гарц, зам арчлалт гээд олон ажил хийх байсан. Энэ ажлыг зогсоочихоор хариуцлагыг нь хэн хүлээх вэ. Гудамжид жагссан хэдхэн хүний ашиг сонирхлоор асуудлыг шийдэж болохгүй" хэмээн байр сууриа илэрхийлсэн бол нийслэлийн Засаг дарга С.Амарсайхан "Ерөнхий сайдын үг, үүрэг бол төрийн бодлого. Тиймээс түүний багт ажиллаж, хариуцлага хүлээдэг хүний хувьд асуудлыг оруулж ирж байна. Дээд, доод шатандаа ажлаа уялдуулж явах жишгийг тогтоож байгаа юм. Энэ асуудлаар сайн, муу хоёр жишиг ч тогтож байгаа ч сайн нь давамгайлах болов уу. Зориуд зохион байгуулан, асуудлыг мушгин гуйвуулж байгаа нөхдүүдэд хандан хэлэхэд явцуу улс төр хийж, улс төрд хялбархан орох гэсэн сонирхол, сүрдүүлгээс үүдэн оруулж ирсэн асуудал огт биш. Харин Засаг төрийн үүрэг даалгаврыг оруулж ирж байна. Түүнээс биш иргэдийн нэрийг барьж, элдэв янзын зүйл ярьж байгаа залуучуудаас болж оруулж ирээгүй юм" хэмээв.