Тавантолгой-Зүүнбаян чиглэлийн төмөр замын ажил амжилттай өрнөж байна

2020 оны 03 сарын 11

Дэлхийд данстай стратегийн аварга том орд Тавантолгойгоос говь талын суурин Зүүнбаян хүртэл 400 гаруй километр төмөр замын ажлыг дотоодын нөөц боломж, хүчинд тулгуурлан барьж байгаа нь тун амжилттай өрнөж байна. Энэ эрчээрээ төмөр замын ажил үргэлжилбэл тун удахгүй Зүүнбаян-Тавантолгойг холбосон төмөр зам биелэлээ олж, манай эдийн засгийн нэгэн том хөшүүрэг болсон хар алт маань шороон замаар өндөр зардалтайгаар бус төмөр замаар хямд өртгөөр тээвэрлэгдэх болж байна. Энэ утгаараа Монгол Улсын эдийн засагт асар том эргэлт гарах учраас төрөөс ч чамгүй ихэд анхааран ажиллаж байна. 

Тиймдээ ч Зам, тээврийн хөгжлийн сайд Б.Энх-Амгалан Дорноговь аймагт ажиллаж, УБТЗ ХНН-ийн Зүүнбаян өртөө дэх үе угсрах баазын үйл ажиллагаа, Тавантолгой-Зүүнбаян чиглэлийн 414.6 километр төмөр замын ажлын явц, гүйцэтгэлтэй танилцаж, холбогдох албаны хүмүүст үүрэг чиглэл өглөө. Мөн Зүүнбаян өртөө дэх Монголын төмөр зам ТӨХК-ийн Шуурхай удирдлагын төвд Тавантолгой-Зүүнбаян чиглэлийн төмөр замын төслийн ажлын хэсэг хуралдав.

Үндэсний том бүтээн байгуулалт Тавантолгой-Зүүнбаян чиглэлийн 414.6 километр төмөр замын барилгын ажил улирал харгалзахгүй үргэлжилж байгаа ба өнгөрсөн өвөл ухмалын ажил буюу ус шаардагдахгүй ажлуудаа хийж, одоогоор далангийн ажил үргэлжилж байна. Мөн Зүүнбаян талаас 4.5 километрт рейльс төмөр, 75 километрт цахилгаан дамжуулах шугамыг татаж суурилуулаад байна.

Зэвсэгт хүчний 7781 дүгээр ангийн захирагч, Бригадын генерал П.Доржсүрэнгийн мэдээлснээр тус ангийн хариуцаж буй хэсгийн доод бүтцийн барилга угсралтын ажлыг ирэх 06 дугаар сарын 30-нд дуусгаж, дараагийн төсөлдөө оролцох төлөвлөгөөтэй байгаа аж.

Тавантолгой-Зүүнбаян чиглэлийн төмөр замын трассын дагуу нэг өртөө зургаан зөрлөг байгуулагдах бөгөөд зөрлөгүүдийн энэ жилийн барилгын ажил эхэлж, Зөрлөг-6 дахь удирдлагын барилга болон ажилчдын орон сууцны барилгын ажил 80 хувийн гүйцэтгэлтэй үргэлжилж байна.

Зам, тээврийн хөгжлийн сайд Б.Энх-Амгалан ажлын хэсгийн хуралдаанаар Тавантолгой-Зүүнбаян чиглэлийн төмөр замын төсөлд шаардлагатай болон цаашид үргэлжлэн хэрэгжих Сайншанд-Хөөт-Бичигт чиглэлийн төмөр замтай Зүүнбаян өртөөг холбохтой уялдуулж өргөтгөхөд шаардагдах газрын асуудлыг орон нутгийн удирдлагуудтай хамтран шийдвэрлэх, төслийн барилгын ажилд гадаадаас нийлүүлэх материалыг цаг хугацаанд нь нийлүүлэх зэрэг ажлыг сайтар зохион байгуулахыг холбогдох албаны хүмүүст үүрэг болголоо.

 

Сэтгэгдэл ( 0 )

Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Top