"Жи тайм"-ын гэх тодотголтой 11 мянга гаруй хохирогчтой шүүх хурал хойшиллоо

“ЖИ ТАЙМ” гэх сүлжээний хэргийн гэм буруугийн шүүх хуралдаан өнөөдөр 09:00 цагаас Баянгол, Хан-Уул, Сонгинохайрхан дүүргийн Эрүүгийн  хэргийн анхан шатны шүүх дээр болсон. Шүүх  хуралдааныг шүүгдэгч өмгөөлөгчөө сольсон, хавтаст хэрэгтэйгээ танилцаагүй, хохирогч нар өмгөөлөгчөө сольсон гэх шалтгаанаар хойшлууллаа. Дараагийн шүүх хуралдааныг долоодугаар сарын 8-нд өглөөний 09:00 цагт товлолоо.

Нийслэлийн прокурорын газраас 2015 оны Эрүүгийн хуулийн тусгай ангийн 17.3 дугаар зүйлийн 2 дахь хэсгийн 2.2 дахь заалтад заасан /Залилах/ гэмт хэрэгт яллах дүгнэлт үйлдэж ирүүлсэн шүүгдэгч Э.Оюунчимэгт холбогдох эрүүгийн хэргийг Баянгол дүүргийн эрүүгийн хэргийн анхан шатны шүүх 2020 оны тавдугаар сарын 13-ны өдөр хүлээн авсан. Улмаар 2020 оны зургаадугаар сарын 23-ны өдрийн урьдчилсан хэлэлцүүлгийн шүүх хуралдаанд шүүгдэгчийн өмгөөлөгч Ч.Шаравнямбуу, шүүгдэгч  Э.Оюунчимэг нараас  гаргасан хүсэлтийг хэлэлцэхгүй орхиж,  анхан шатны шүүх хуралдаанаар уг хүсэлтийг шийдвэрлэхээр болоод байсан юм. “Жи тайм корпоррейшн” ХХК нь 11.398 иргэнд 25.801.303.770 төгрөгийн хохирол учруулсан байх бөгөөд уг хэрэг нь 586 хавтастай 11.398  хохирогчтой юм.

Монгол улсын Засгийн газраас цар тахлын үед авах арга хэмжээний хүрээнд өндөржүүлсэн бэлэн байдал зарласан болон Эрүүл мэндийн яамнаас өгч буй зөвлөмжийн хүрээнд тус шүүхийн тамгын газраас шүүх хуралдааныг иргэдийн бөөгнөрөл үүсгэхгүйгээр зохион байгуулан хохирогч нарт шүүх хуралдааны явцыг WWW.ZINDAA.MN цахим сайттай хамтран LIVE хэлбэрээр дамжуулан хүргэлээ.

ШУУД ДАМЖУУЛАЛТ