МАН: Найман аймагт ялагдсан нь нутгийн удирдлагуудтай холбоотой

Нутгийн өөрөө удирдах байгууллагыг сонгох аймаг, нийслэл, сум, дүүргийн Орон нутгийн сонгуулийг өчигдөр (2020.10.15) орон даяар амжилттай зохион байгууллаа. 

МАН-ын тухайд нийслэлийн ИТХ-ын 45 суудлын 34-т нь, 21 аймгийн 10-т нь ялалт байгуулсан юм.

Сонгуулийн үр дүнгийн талаар МАН-ын Ерөнхий нарийн бичгийн дарга Д.Амарбаясгалан, нийслэлийн МАН-ын дарга Д.Сумъяабазар нар мэдээлэл хийлээ.
 

МАН-ЫН ЕРӨНХИЙ НАРИЙН БИЧГИЙН ДАРГА Д.АМАРБАЯСГАЛАН:

-СЕХ-ны зүгээс урьдчилсан байдлаар дүн танилцуулсан. Энэ дүнг албан ёсоор танилцуулж байна. НИТХ-ын 45 суудлын 34-т нь, нийслэлийн есөн дүүргийн тухайд Сүхбаатар дүүргээс бусад найман дүүрэгт, 21 аймгийн 13 аймагт нь буюу 291 суудлын 200-д нь МАН ялалт байгууллаа.

Үүнээс гадна 330 сумын 185 суманд МАН-аас нэр дэвшсэн гишүүд ялалт байгууллаа.

МАН-ыг дэмжсэн мянга мянган сонгогчдодооо талархаж байгаагаа илэрхийлье.

2020 оны парламентын сонгуульд итгэл хүлээлгэсэн сонголтоо баталгаажуулсан сонголт боллоо. Энэ их итгэлийг МАН бүрэн зүтгэлээр хариулж, чармайн ажиллана. Иргэдийн дэмжлэг хүлээж чадаагүй найман аймаг, нэг дүүрэг, 130 гаруй сумын асуудал бий. Эдгээр иргэдийн итгэлийг олж авахын төлөө орон нутагт үйл ажиллагаа явуулж байгаа улс төрийн байгууллагад шинэчлэл хийх болно. Монгол Улсын эдийн засгийн байдал амаргүй байна. Бидэнд сандал суудал ярьж суух цаг алга.  
 

НИЙСЛЭЛИЙН МАН-ЫН ДАРГА Д.СУМЪЯАБАЗАР:

-2020 оны УИХ-ын сонгуулийн дараа Засгийн газрын бүтэц, зохион байгуулалт гээд дараа дараагийн тулсан ажлаа цаг алдалгүй зохион байгуулсан. Үүний дараа бүх аймаг, сум, дүүргийг хамарсан том хэмжээний сонгууль боллоо. МАН-д саналаа өгсөн сонгогчдодоо талархаж байна. Бүх шатанд ажил хийх нөхцөлөөр хангаж өгсөн та бүхэнд баярлалаа. Энэ их итгэлийг хариулах бүтээн байгуулалтын том төлөвлөгөө бий. Нийслэлийн хэмжээнд 45 суудлаас 34-т, орон нутгийн ИТХ-ын 291 суудлын 200-д нь МАН ялалт байгуулсан. Иргэдийн өмнө тулгамдаж буй асуудлыг хотын хэмжээнд бие даасан байдлаар хэрэгжүүлэхийн төлөө ажиллана. Хөгжлийн хөрөнгө оруулалтыг бүх дүүрэгт жигд хэрэгжүүлэхийн төлөө ажиллах болно.

-УИХ-ын сонгуулиар ялалт байгуулсан аймгууд өнөөдөр ялагдал хүлээж байна. Үүний шалтгааныг юу гэж харж байна вэ?

-МАН найман аймагт ялагдал хүлээлээ. Энэ нь тухайн орон нутгийг удирдаж ажилласан удирдлагуудын үйл ажиллагаатай холбоотой. Мөн бие даагчид олон оролцсонтой холбоотой. Увс, Говь-Алтай, Архангай аймагт манай намд харьяалагдаж байсан хүмүүс нэр дэвших мандат аваагүй тул бие даасан. Орон нутгийн сонгуулиар дотоод эв нэгдлээ хангаж чадаагүй нь ялагдал хүлээх шалтгаан боллоо. Ер нь манай намын дүрэмд тухайн шатны намын байгууллага нь оролцсон сонгуульдаа ялагдал хүлээсэн тохиолдолд 30 хоногийн дотор өргөдөл өгөх ёстой байдаг. Ялалт байгуулах юм бол намын байгууллага хуралдуулж, Засаг дарга болон ИТХ-ын даргаар дэвшүүлэх нэрээ явуулах дүрмийн заалттай.

-Хотын даргаар ямар шалгуурт тэнцэх хүнийг тавих вэ?

-Нутгийн өөрөө удирдах байгууллагын хүрээнд анхдугаар чуулганаа зарлах ёстой. Тэргүүлэгчид анхдугаар чуулганаа зарлаад, дараагийн хурлаар ИТХ-ын дарга, хотын даргын асуудал намын бүлгээр орох байх. Үүний дараа бид бүхний төлөвлөж байгаа ажил, намын мөрийн хөтөлбөр, "Алсын хараа 2050" хөтөлбөрийг төлөвлөж, үүн дагуу ажиллах боловсролтой, итгэл хүлээх хүнийг сонгоно. Шалгуур даах чадалтай байх ёстой. Багаар ажиллах чадвартай байх ёстой. Хотын хэмжээнд далайцтай ажиллах шалгуурыг шинэ удирдлагад тавина. Ерөнхий сайдын гол шалгуур бол Улаанбаатар хотын төлөө чин сэтгэлтэй байх ёс суртахуун, боловсролтой, ажлын дадлага туршлагатай хүн байх ёстой гэж үзэж байгаа.