ТББХ: Засгийн газрын огцрох тухай асуудлыг хэлэлцэж байна

Т.Давааням | Zindaa.mn
2021 оны 01 сарын 21

Төрийн байгуулалтын байнгын хороо өнөөдөр /2021.01.21/ хуралдаж байна. Хуралдаанаар Ерөнхий сайд У.Хүрэлсүхийн гаргасан Засгийн газрыг бүрэн бүрэлдэхүүнээр нь огцруулах тухай асуудлыг хэлэлцэж байгаа юм. 

Ерөнхий сайд У.Хүрэлсүх Засгийн дөнгөж сая 16:00 цагт мэдэгдэл хийж, Засгийн газрыг бүрэх бүрэлдэхүүнээр нь огцрох санал оруулж байгаагаа мэдэгдсэн. 

Тэрбээр "Та бүхэнд хандаж таагүй мэдэгдэл хийж байгаадаа хүлцэл өчиж байна. Хоёр хоногийн өмнө дөнгөж төрсөн эмэгтэйг ХӨСҮТ-рүү зөөх явцдаа хариуцлагагүй, хүнлэг бус үйлдэл гаргасан. Би хоёр охинтой, эцэг хүн. Тэр эмэгтэйгээс хариуцлагагүй байдал гаргаж ажилласан нөхдийн өмнөөс болон хувиасаа чин сэтгэлээсээ уучлал гуйж байна. Монгол Улсын Ерөнхий сайд ёс зүйн хариуцлага хүлээх ёстой гэж бодож байна. Би Монголын төрийг ард түмнийхээ төлөө чин сэтгэлээсээ зүтгэдэг байгаасай гэж хүссэн.

Цар тахлыг амжилттай давахын төлөө хөл хорио тогтоож, албан тушаалтнууд өдөр шөнөгүй ажиллаж байгаа. гэхдээ бас зарим нэг нөхөд хариуцлага алдаж байна. харамсалтай нь хөөрхий тэр эмэгтэй хүнд нөхцөлд хүний нүд хальтрам, элэг эмтрэм хүнд нөхцөлд шилжүүлсэндээ сэтгэл өвдөж байна.

Дайны гол шугаманд нөхдийнхөө хамт тулаанд ордог нь цэрэг хүний хувь заяа байдаг. Би бүрэн бүрэлдхүүнээрээ ажиллах гол зорилго тавьж байсан. Гэвч манай Засгийн газрын хоёр сайд огцрох өргөдлөө өгсөн. Манай иргэд төр засагтаа үгээ хэлж, хариуцлага тооцож ажиллахыг шаардсан. Энэ шаардлагыг би зөв гэж бодож байна. Ёс зүйн хариуцлага хүлээх нь Монголын улс төрд шинэ соёл оруулж ирж байгааг үгүйсгэхгүй. Хариуцлагыг хамтаараа үүря, Ерөнхий сайд гэсэн албан хүндтэй албан тушаалаас огцорч байгаагаа мэдэгдэж байна.

Миний итгэж найдаж хамтарч ажилласан Х.Баттулга ард түмнийг үймээн самуунд турхирч, ард түмний үймээн самуунд уриалан санхүүжүүлсэн. Цаашид өдөөн турхирах гэсэн үйлдэл төлөвлөж байхыг үгүйсгэхгүй. Ерөнхийлөгч, засгийн газар гэсэн төрийн институт хооронд зүй бус харилцаа үүсэх вий, үүнд нь ард түмэн түлхэгдэн орох вий, Монгол хүн хохирох вий гэсэн болгоомжлол байна. Дахин долоодугаар сарын 1 битгий давтагдаасай. Ерөнхийлөгч бол ард түмний эв нэгдлийн бэлгэ тэмдэг байдаг. Харамсалтай нь энэ ажлаа удаа дараа хийж чадахгүй, байгаа тул Ерөнхийлөгчтэй хариуцлага тооцох ёстой гэж үзэж байгаагаа илэрхийлж байна. Миний бие улстөрөөс явж байгаа биш, шударга шүүхтэй, АТГ нэг хүнээс хараат бус байхын төлөө зүтгэнэ. Хэн нэгэн хүнийг дуудаж, ял оноодог, өөрийнхөө өрсөлдөгчийг намнадаг, хуулийн байгууллагын дарга нарыг томилохдоо түрүүлж өргөдлийг нь авдаг Ерөнхийлөгчтэй байж болохгүй" гэлээ. 

 

 

Сэтгэгдэл ( 1 )

Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Ганаа(66.181.161.41) 2021 оны 01 сарын 21

Маш буруу, МАН-с Хүрэлсүхээс өөр зоригтой шударга, эх оронч ажиллах хүн байхгүй олдохгүй шүү ...МАНАН-гийн нөхдүүд баярлаж байгаа даа.

0  |  0
Top