Э.Бат-Үүл: Х.Баттулга бол төрийн тэргүүн шиг байж чадахгүй байна

Ардчилсан намын гишүүн Э.Бат-Үүл Ардчилсан намын нөхцөл байдлын талаар байр сууриа илэрхийллээ.

-Ардчилсан нам хоёр хуваагдаад байна. Та аль талын байр суурийг барьж байна вэ?

-Ардчилсан нам үндэсний хэмжээний том нам хэвээр байгаа. Манай нам дотор зөрчил гарсан. Үүнийг ойлгох хэрэгтэй. Шүүхээс энэ зөрчлөө яаралтай шийдвэрлэх чиглэлтэй тогтоол гарсан. Намын дараагийн даргыг яаралтай сонгох шаардлагатай болоод байна. Энэ чиглэлээр ҮБХ өчигдөр орой хуралдаад, өнөөдөр үргэлжлүүлж хуралдана. ҮБХ-ны хурлыг манай Улстөрийн зөвлөлөөс шийдвэр гаргаж хуралдуулж байгаа. Бид одоо шүүхийн шийдвэрийг хэрэгжүүлэх юм бол дотоодын зөрчлөөс гарна. Ер нь нам дотор хоёр хэсэг үл ойлголцол үүсээд, зөрчилдсөн байгаа юм. Энэ байдлыг Ардчилсан нам байхгүй болжээ гэж түгээж байна. Өнөөдөр монголын ардчилал бол Ардчилсан нам, Ардын нам гэсэн хүчний тэнцвэр дээр л тогтож байгаа. Одоо бид юуны өмнө шүүхийн шийдвэрийг биелүүлж, зөрчилдөөнөө арилгах ёстой. Манай намд үүсээд байгаа дотоод зөрчлөөс илүү сөрөг хүчний орон зайгаа алдаад байна. Ардын намын хариуцлагагүй үйлдлийн эсрэг манай намаас тэмцэл хариу үйлдэл алга. Сөрөг хүчний орон зайгаа алдсаныг бусад улстөрийн намууд овжин ашиглаж байгаа нь бидний санааг зовоож байна. Тиймээс идэвхтэй сөрөг хүчин болох орон зайгаа яаралтай нөхнө.

-Та Ерөнхийлөгчийн сонгуульд нэр дэвших үү?

Би бол нийслэлийн төлөө явна. Нийслэлийн намын даргын төлөө өрсөлдөнө. Ирээдүйд боломжтой бол Нийслэлийн засаг даргын төлөө өрсөлдөнө.  Намайг Ерөнхийлөгчийн сонгуульд өрсөлдөх гээд байна гэж хардаад янз бүрийн гүтгэлэг яваад байна.  

-Ерөнхийлөгчийн сонгуульд өрсөлдөх нэр дэвшигчийг ямар зарчмаар тодруулах вэ?

-Сая манай намын Үндсэн дүрмийн өөрчлөлтийг Улсын дээд шүүх бүртгэж авсангүй. Тиймээс хуучин дүрмээрээ явна. Олон лидер өрсөлдөнө. Х.Баттулга бол төрийн тэргүүн шиг байж чадахгүй байна, төрийн өмнө хүлээсэн үүргээ биелүүлж чадахгүй байна гэдэг шүүмжлэлийг би удаа дараа хэлж байсан. Одоо бол сунгаа шийднэ. Сунгаа явах гэж байхад аль нэгнийх нь талд байр сууриа илэрхийлнэ гэдэг зохимжгүй.  

-Таны шүүх хурлын процесс үргэлжилж байгаа болохоор та Х.Баттулгыг шүүмжилж чадахгүй байна уу?

-Ингээд л намайг гүтгээд байгаа юм. Би бол асуудлаа шударга шүүхээр шүүлгэх эрхээ эдэлмээр байна. Шударга шүүхээр шүүгээд ял оноовол би бэлэн байна.

-Ерөнхийлөгчөөр сонгогдсон хүн дахин Ерөнхийлөгчид нэр дэвших эрхтэй юу?

-Сая УИХ-д Засгийн газрыг байгуулах явцад Хууль зүйн байнгын хорооны дарга С.Бямбацогт ноцтой зүйлийг хэлсэн “Ерөнхийлөгчийн сонгуулийн дараа Үндсэн хуулийг өөрчилнө” гэж. Үндсэн хуулийг жилийн өмнө өөрчилсөн. Тухайн үеийн ажлын хэсгийн ахлагч дахиад найман жил энэ Үндсэн хуулийг өөрчлөхгүй гэсэн. Гэтэл сая Үндсэн хуулийг өөрчлөх шаардлагатай юм байна гэж нууж байсан зүйлээ задаллаа. Тэгэхээр би юуг анзаарч байна вэ гэхээр Ерөнхийлөгчийн сонгуулийн дараа Ерөнхийлөгчийн засаглал руу шилжих гээд байна гэж хардаж. Сая энэ бэлтгэлээ хангасан. Өөрөөр хэлбэл парламентын бүх эрх мэдлийг Ерөнхий сайд руу шилжүүлсэн. Одоо Ерөнхий сайдыг Ерөнхийлөгч томилно гэчихвэл Оросын туршлага нэвтрэх гээд байна.