Ерөнхийлөгч Х.Баттулга Вашингтонд төвтэй лобби фирмтэй гэрээ байгуулж, ЗАХИАЛГАТ МЭДЭЭЛЛҮҮД цацуулжээ

Коронавируст цар тахлын нөхцөл байдал улам хүндэрч, Монгол Улс 86 иргэнээ алдаад буй амаргүй энэ цаг үед улс төрийн тогоо Ерөнхийлөгчийн сонгуулийг угтан буцалж байна. Эрэмбэлж харвал, энэ улс орны иргэдийн эрүүл, аюулгүй орчинд амьдрах эрх хамгийн эхний асуудал байх ёстой. Гэвч улстөрчид, бүлэглэлүүдийн хувьд  эрх мэдэл хамгийн чухал гэдгийг өрнөж буй үйл явдлууд батлан харуулсаар.

Тухайлбал, “Ерөнхийлөгчийн сонгуулийг угтан гадны лобби компанитай Ардчилсан нам гэрээ байгуулжээ” гэх мэдээллийн үнэн учир тайлагдаж, “Хэргийн эзэн, хэнгэрэгийн дохиур” нь өнөөдрийн Ерөнхийлөгч Х.Баттулга болохыг хэвлэлүүд баримттайгаар бичиж, нийтэлж эхэллээ.

Монгол Улсын Ерөнхийлөгчийн Тамгын газар Вашингтонд төвтэй лобби фирмтэй хамтарч, төлбөртэй хэвлэлийн мэдээ түгээдэг компанийг хөлслөн, Монголын улс төрд өрнөж буй үйл явцын эсрэг буюу маргаашийн эрх мэдлийг олж авахын төлөөх худал хуурмаг мэдээллийг уншигчдын итгэлийг алдсан, найдваргүй сайтуудад байршуулан, цацалт хийлгүүлж байсныг баримтууд харуулж байна.

Ерөнхийлөгч болон түүний хамтран зүтгэгчид  “DCI” группт захиалга өгч хамтран ажиллаж буйг харуулах баримтууд АНУ-ын Хууль зүйн яамны албан ёсны веб сайт дахь цахим архивын хэсэгт нээлттэй байгаа юм. АНУ-д төвтэй “DCI”  лобби фирмийн ажилтан Райн Грилло өөрийн илгээсэн и-мэйлдээ “Манай фирмийн хамтран ажиллагч Ерөнхийлөгч Баттулга” гэхчлэн бичсэн байна.

Тэрбээр өмнө нь Ерөнхийлөгчөөр ажиллаж байсан хүмүүсийг дахин нэр дэвшүүлэхгүй байх нь зөв гэж үзсэн Үндсэн хуулийн цэцийн шийдвэрийг УИХ-аар хэлэлцсэн үйл явдлын талаар захиалгат мэдээ, мэдээллийг сэтгүүлчдэд илгээхдээ “Ерөнхийлөгчийн сонгуулийн тухай хуулийг өөрчлөх гэж байна” илтэд худлаа мэдээллийг өгчээ. Мөн Монгол Улсын Ерөнхийлөгч Х.Баттулгатай шууд холбогдож ярилцах боломжийг санал болгосон байна.

Тухайлбал,  “Вашингтон пост” сонинд сурвалжилга бэлддэг Москвагийн Изабель Хуршудян гэх сэтгүүлчид илгээсэн и-мэйлдээ “Украйн, Навальныйг тойрсон асуудлаас үүдэн зав муутай байгаа байх, гэвч Монголд өрнөж буй үйл явдал таны эсвэл “Вашингтон пост” дахь бусад ажилтнуудын сонирхлыг татаж магадгүй гээд бичиж байна. Ерөнхийлөгч Х.Баттулгыг манай байгууллага АНУд төлөөлдөг бөгөөд олонхыг бүрдүүлэгч МАН зургаадугаар сарын 9-нд болох Ерөнхийлөгчийн сонгуулийг угтаж, сонгуулийн тухай хуульд өөрчлөлт оруулах асуудлын талаар хэлэлцэх маргаашийн парламентын хэлэлцүүлгийг Ерөнхийлөгчийн нам бойкотлох болсноо зарласан. Тус өөрчлөлт нь МАН-д ашигтай бөгөөд Ерөнхийлөгч дахин сонгогдох эрхгүй болох юм” гэхчлэн бичжээ.

Ерөнхийлөгчийн талаас Америкийн “DCI” фирмтэй гэрээ байгуулахдаа 50 мянган доллараар гарын үсэг зурсан бол гэрээний нэг чухал заалт “Хэвлэл мэдээллийн байгууллагуудыг худалдан авах” гэж байна. Үүнд хэвлэл, мэдээллээр өөрсдийн хүссэн мэдээллийг гаргах харилцааг тус фирм Захиалагчийг бүрэн төлөөлөн хийх бөгөөд 100 мянган доллар хүртэлх төлбөрийг 10 хоногийн дотор шилжүүлэх шаардлагатай гэжээ. Мөн 100 мянган доллараас дээшхи үнийн дүнтэй хэвлэл, мэдээллийн зардлыг гурав хоногийн дотор шилжүүлнэ гэж заасан байгаа нь асар өндөр төлбөрийг, түргэн шуурхай гаргаж өгч байхаар зөвшөөрчээ. Ийнхүү төлбөрөө төлж олон улсын хэвлэлээр “хүссэн дуугаа захиалан” улс, эх орноо зориудаар муухай харагдуулах үйл ажиллагаагаа гэрээгээр албажуулсан байна.

Тодотгоход, “DCI” фирм нь 1996 онд Вашингтонд байгуулагдаж үйл ажиллагаагаа эхэлжээ. Улс төрийн лобби, бохир кампанит ажил хийдгээрээ АНУ төдийгүй дэлхий дахинаа танигдсан компани юм. Америкийн Ерөнхийлөгчийн сонгууль болон кампанит ажлуудад олон удаа ажилласан байна. Тухайлбал, Доналд Трампын 2016 оны сонгуульд Кэмбриж Аналитика болон Оросуудтай хамтран ажиллажээ. Мөн Мьянмарын сонгуульд 384 мянган долларын гэрээ байгуулан ажиллаж байсан төдийгүй Мьянмарын цэргийн дэглэм тогтоогчидтой ажиллаж байсан нь Нью-Йорк Таймс, Атлантик зэрэг Америкийн томоохон хэвлэлүүдээр дуулиан тарьж байсан юм. Энэ асуудлаасаа болж АНУ-ын ерөнхийлөгчийн сонгуульд Бүгд найрамдах намаас өрсөлдөх сунгаанд Жон Мэккэйний зөвлөхөөр томилогдоод байсан “DCI”-ийн үүсгэн байгуулагч Дуг Гүүдеэр гэх хүн нь уг ажлаасаа халагдаж байв.Манай Ардчилсан нам болон Х.Баттулгатай холбоотой мэдээллийг “DCI” фирмийн Дэд ерөнхийлөгч Кэвин Ивэрс болон ахлах ажилтан Райн Грилло, төслийн зохицуулагч Ребэкка Невилл зэрэг хүмүүс хариуцан олон улсын хэвлэлүүдэд түгээх ажлыг хийсэн нь удаа дараагийн и-мэйлүүдээс харагдлаа.

Yahoo зэрэг уншигчдад танил болсон сайтууд тэдний гаргасан мэдээллийг төлбөртэй хэсэгтээ нийтэлсэн бөгөөд нийтлэлийн төгсгөлд уг мэдээллийн эх сурвалж хэмээн өөр холбоосуудыг зааж өгсөн байгаа.

Тухайн холбоосоор нэвтэрвэл “PR Distribution” гэх төлбөртэйгээр хэвлэлийн мэдээ түгээдэг агентлагийн вэб сайт бий. Улмаар “Монгол Улсын Ерөнхийлөгч ардчилал, бүрэн эрхэт байдлаа хамгаалах яаралтай алхам хийлээ” гэх гарчигтай хэвлэлийн мэдээг Монгол Улсын Ерөнхийлөгчийн Тамгын газраас гаргуулсан төдийгүй харилцах хэсэгт Ерөнхийлөгчийн Хэвлэл, мэдээллийн алба гэдгийг бичжээ.

Мөн “Энэхүү хэвлэлийн мэдээ нь захиалагчийн бэлтгэсэн нийтлэл бөгөөд агуулгын хувьд “PR Distribution” болон үүнийг нийтэлсэн бусад редакцын агуулгатай хамааралгүй болно...  Уг материалыг Монголын Ардчилсан намыг төлөөлж “DCI” фирм түгээж байна” гэхчлэн тодотгосон байна.

Тухайн мэдээллүүдэд Монголын ардчилал, бүрэн эрхэт байдал аюулд орсныг аврах хүн нь Х.Баттулга. Тэр бол 1990 онд Зөвлөлтийн систем задран унасны дараа тайван замаар ардчиллыг авчрах үйл хэрэгт оролцсон МоАХ-ын үүсгэн байгуулагч, Ардчилсан намын шанг татсан, 20 жил парламентад ажилласан улстөрч гэхчлэн магтан сайшаасан агуулгатай.

Гадны хэвлэлүүдээр ийнхүү Монголын аврагч хэмээн өөрийгөө бичүүлж буй Х.Баттулга үнэн хэрэгтээ улсынхаа эрх ашгийн эсрэг үйлдэл хийж буйг цаг хугацаа баримттай харуулж байна.