ТАНИЛЦ: Дипломат цол хүртсэн эрхмүүд

Монгол Улсын Ерөнхийлөгч Халтмаагийн Баттулга гадаад харилцааны салбарт олон жил үр бүтээл, идэвх санаачилгатай ажиллаж, гадаад бодлогын тэргүүлэх зорилтуудыг хэрэгжүүлэхэд бодит хувь нэмэр оруулсан иргэдэд дипломат цол олгох тухай зарлиг гаргалаа.

Онц бөгөөд Бүрэн эрхт Элчин сайд цолыг
 

• Монгол Улсаас Бүгд Найрамдах Энэтхэг Улсад суугаа Элчин сайд Гончигийн Ганболд,

• Гадаад харилцааны сайд асан Лувсанвандангийн Болд нарт олголоо.

Онц бөгөөд Бүрэн эрхт Элчин цолыг:

• Монгол Улсаас Арабын Бүгд Найрамдах Египет Улсад суугаа Элчин сайд Чулууны Баярмөнх,
• Монгол Улсаас Бүгд Найрамдах Болгар Улсад суугаа Элчин сайд Дашжамцын Батсайхан,
• Монгол Улсаас Бүгд Найрамдах Социалист Вьетнам Улсад суугаа Элчин сайд Дашийн Билэгдорж,
• Монгол Улсаас Бүгд Найрамдах Австри Улсад суугаа Элчин сайд Ганхуурайн Баттунгалаг,
• Монгол Улсаас Кувейт Улсад суугаа Элчин сайд Зоригтын Чинтүшиг,
• Монгол Улсаас Бүгд Найрамдах Казахстан Улсад суугаа Элчин сайд Лувсангийн Баттулга,
• Монгол Улсаас Бүгд Найрамдах Сингапур Улсад суугаа Элчин сайд Төмөрийн Лхагвадорж,
• Монгол Улсаас Бүгд Найрамдах Куба Улсад суугаа Элчин сайд Шагдарын Батцэцэг,
• Улсын Их Хурлын Тамгын газрын Гадаад харилцааны хэлтсийн дарга Цэрэндоржийн Нарантунгалаг,
• Гадаад харилцааны яамны Консулын газрын зөвлөх Нэмэхийн Батаа,
• Гадаад харилцааны яамны Европын газрын захирал Мижиддоржийн Цэнгэг,
• Гадаад харилцааны яамны Бодлого, төлөвлөлтийн газрын зөвлөх Жагирын Сүхээ,
• Ахмад дипломатч Дарийн Пунцаг,
• Ахмад дипломатч Сүрэнгийн Бадрал нарт тус тус олголоо.

Монгол Улсын Ерөнхийлөгчийн зарлигийн дагуу дипломат цол олгох ёслол өнөөдөр Төрийн ёслол, хүндэтгэлийн Их танхимд болж, Лувсанвандангийн Болд, Мижиддоржийн Цэнгэг, Нэмэхийн Батаа, Жагирын Сүхээ, Дарийн Пунцаг, Сүрэнгийн Бадрал нар Монгол Улсын Ерөнхийлөгчөөс дипломат дээд цолны тэмдэг, алтан, мөнгөн гэрэгэ, цолны батламжаа гардан авлаа.

Монгол Улсын Ерөнхийлөгч Халтмаагийн Баттулга дипломат цол гардуулсныхаа дараа:

“Та бүхний өдрийн амгаланг айлтгая.

Өнөөдөр та бүхний дипломат албанд олон жил идэвх санаачилгатай ажиллаж, гадаад бодлогын тэргүүлэх зорилтуудыг хэрэгжүүлэхэд оруулсан бодит хувь нэмрийг үнэлэн, дипломат дээд цол олгож байна.

Монгол Улс аюулгүй байдал, үндэсний язгуур ашиг сонирхлоо олон улсын эрхзүйн хүрээнд улс төр-дипломатын аргаар хангадаг учраас үеийн үед гадаад харилцааны салбар, түүний дотор дипломатч нарт өндөр үүрэг, хариуцлага оногддог билээ.

Манай улсын тусгаар тогтнол, халдашгүй дархан байдлыг дэлхий дахинд хүлээн зөвшөөрүүлэх, бэхжүүлэх, хөгжил дэвшлийг дархлахад хичээн зүтгэсэн үе үеийн дипломатчдын түүхэн гавьяа зүтгэлийг бид мартах учиргүй ээ.

Орчин үед дипломат албанд өмнөх үеийнхнээс дутахааргүй чухал үүрэг, хариуцлага тулгарч байна. Олон улсын харилцаа хурдацтай өөрчлөгдөж, шинжлэх ухаан, технологи үсрэнгүй хөгжиж буй өнөө үед дипломат алба Монгол Улсын аюулгүй байдал, эдийн засгийн хөгжлийг нөхцөлдүүлэгч хүчин зүйл болох ёстой.

Миний бие бүрэн эрхийнхээ дагуу өнгөрсөн хугацаанд гадаад харилцааны салбарт онцгой анхаарч, Үндэсний аюулгүй байдлын үзэл баримтлал, Гадаад бодлогын үзэл баримтлалыг хэрэгжүүлэх, үндэсний эрх ашигт нийцсэн прагматик бодлого явуулж, эдийн засгийн тусгаар тогтнолыг бий болгохыг хичээн ажиллалаа.

Эн тэргүүнд хоёр хөрштэйгээ найрсаг байх гадаад бодлогын эн тэргүүний зорилтын дагуу ОХУ-тай Иж бүрэн стратегийн түншлэл тогтоож, БНХАУ-тай харилцаагаа улам хөгжүүлэх чиглэлээр идэвхи санаачилгатай ажиллахыг хичээлээ. Ялангуяа, гуравдагч хөршийн тэргүүлэх улс болох АНУ-тай Стратегийн түншлэл тогтоож, Бүгд Найрамдах Энэтхэг Улстай Стратегийн түншлэлээ нотолж, түншлэлийн харилцаа, хамтын ажиллагааг өргөжүүлэн хөгжүүлэх талаар ажилласан.

Эдийн засгаас ангид аюулгүй байдал гэж үгүй, аюулгүй байдлаас ангид эдийн засаг гэж байхгүй.

Ашигт малтмал, түүхий эдээс хэт хамааралтай эдийн засгийн өнөөгийн бүтцийг өөрчлөн төрөлжүүлэх, нэмүү өртөг шингэсэн экспортыг нэмэгдүүлэх, шинэ технологи нэвтрүүлэх, нутагшуулах, гадаадын хөрөнгө оруулалтыг нэмэгдүүлэх, иргэдийн орлогыг нэмэгдүүлэх, ажлын байр бий болгох, тогтвортой хөгжлийг хангахад гадаад улс төрийн харилцаа, дипломат үйл ажиллагааг чиглүүлэх нь Монгол Улсын тэргүүн зэргийн эрх ашиг билээ.

Эдийн засгийн хөгжлийн хэрэгцээ Монгол Улсын гадаад харилцааны гол зорилтыг тодорхойлж, тэрхүү зорилтыг хангаж чадах эсэх нь эх орноо төлөөлөх Онц бөгөөд Бүрэн эрхт Элчин сайдын үндсэн шалгуур болох ёстой.

Хоёр улсын харилцааг улс төр, эдийн засаг, нийгмийн салбарт хөгжүүлэх, хөрөнгө оруулалт, шинэ технологи, хамтын ажиллагааны олон талт хэлбэрийг санаачилж, тэдний ажлын үр дүнд гадаад харилцааны салбарыг Монгол Улсын эдийн засгийн хөгжлийн нөхцөлдүүлэгч хүчин зүйлийн нэг болгох нь Элчин сайд нарын эн тэргүүний үүрэг юм.

Жил ирэх тусам хилийн чанадад амьдрах Монгол иргэдийн тоо өссөөр байна. Гадаад харилцааны салбар, тухайн улс оронд суугаа Дипломат төлөөлөгчийн газрууд Монгол Улсын иргэдийнхээ эрх, хууль ёсны ашиг сонирхлыг идэвх санаачлагатайгаар хангаж ажиллах ёстой.

Гэтэл Монгол Улсыг төлөөлөх Онц бөгөөд Бүрэн эрхт Элчин сайд нарын зарим нь биеэ нөөх, амирлангуй хандах, практик ач холбогдолгүй ажилд хэт анхаарах зэргээр томилгоот хугацааны дөрвөн жилийг өнгөрөөснөөр улсын гадаад харилцааны үр дүн, хоёр улсын харилцааг хувь хүний идэвхгүй хандлагаар тодорхойлох нь үнэхээр хор хохиролтой юм.

Элчин сайдын томилолтыг улс төрийн “шагнал” гэдэг агуулгаар хандахаас эрс татгалзах хэрэгтэй. Иймэрхүү улс төржсөн хандлага өнгөрсөн хугацаанд стратегийн онц чухал ач холбогдолтой улс оронд суух Элчин сайдын томилгоонд хүртэл үйлчилж байсныг шулуухан хэлье.

Монгол Улсын гадаад харилцааны салбарт дипломат алба хашиж буй иргэн бүр өргөсөн тангарагтаа үнэнчээр зүтгэж, мянганаар өртөөлсөн Монгол төрийнхөө даянд алдаршсан нэр төрийг хамгаалж, эх орныхоо язгуур эрх ашгийг хангаж, хичээнгүйлэн ажиллах учиртай.Мөнх тэнгэрийн хүчин дор Монгол Улсын гадаад харилцаа хөгжин мандаж, эх орныхоо аюулгүй байдал, хөгжил дэвшлийг дархлах болтугай” гэлээ.Мэдээний дүрсийг хүлээн авч үзнэ үү.