С.Эрдэнэ: Би эцсийн мөч хүртлээ ардчиллын төлөө зүтгэх болно

Ерөнхийлөгчийн сонгуульд АН-аас нэр дэвшсэн С.Эрдэнэ хэвлэлийн хурал хийлээ.

Тэрбээр "Өнөөдөр Сонгуулийн ерөнхий хороо сонгуулийн эцсийн дүнгээ гаргаж, тогтоол гаргасан байна. Сонгуулийн үйл ажиллагааг сонгуулийн хуулийн хүрээнд явагдсан боловч их хэмжээний зөрчил гарсан. Ер нь бол Зөрчлийн болон Эрүүгийн хуулийн хэлбэртэй олон үйлдэл хийгдсэн. Их хэмжээний мөнгө тараалт боллоо. Төрийн бүх шатны байгууллага, албан тушаалтнуудыг оролцуулсан. Төрийн бүх шатанд удирдах дээд байгууллагаас чиглэл өгч шахаж шаардсан байна. Сонгуулийн компанит ажилд төрийн албыг бүхэлд нь дайчилж оролцуулсан. 

Гэхдээ би СЕХ-ны дүн мэдээг хүлээн авч, дараагийн Ерөнхийлөгчийн ажилд амжилт хүсье. Надад саналаа өгсөн олон мянган иргэдэдээ маш их баярлалаа. Би эцсийн мөч хүртлээ Монголын ардчиллын төлөө зүтгэх болно.

Энэ сонгуулийн дүнг харахад эрх барьж буй МАН зарим улс төрийн хүчинтэй хамтарч, сонгуулийн үйл ажиллагааг зохион байгуулалттайгаар, хуулийн хүрээнд бус аргаар зохицуулах үйл ажиллагааг явуулсан байх магадлалтай. Энэ тал дээр АН цаашид хяналт тавина.

Нийгэм эдийн засгийн хүнд нөхцөлд манай улс байна. Ерөнхийлөгчид захиас хэлье. Сонгуулийн үеэр олон будлиан гарсан. Мөнгө тараасан гэдгийг та бүхэн мэднэ. Хууль хүчний байгууллагууд эдгээрийг шалгана байх. Нотлох баримт олон бий. Нэгэнт болоод өнгөрсөн юм чинь гэж үүнийг орхигдуулж болохгүй.Миний улс төрийн замнал, карьер дуусаагүй. Дуусаасай гэж хүсдэг хүмүүүс бий. Би тэдний хүслийг биелүүлэхгүй. АН-ыг хагаралтай, хуваагдсан мэтээр ойлгуулдаг. Манай намд ийм зүйл  байхгүй. Улсын дээд шүүхийн бүх гишүүдийн бүрэлдэхүүнтэй хуралдаж, улс төрийн намын даргын асуудлыг шийддэг хуультай болсон. Иймд хуралдааны тов хэзээ гарахыг би мэдэхгүй байна. АН-ын гишүүд шинэ залуу М.Тулгатыг даргаараа сонгосон. Шинэ удирдлагууд ажлаа төлөвлөж байгаа боловуу. АН дандаа дардан яваагүй. Өмнө нь унаж явсан түүх бий. Залуу үе эрч хүчтэй, чадварлаг ажиллана гэж найдаж байна. Би үзэл санаа, үнэт зүйлийнхээ төлөө зогссон. Би яагаад ялагдсан шалтгаан цаг хугацааны явцад тодорно.       

Та бүхэн сайн сайхныг хүсье" гэлээ.           

Мөн тэрбээр "Ардчилсан намын дүрмээр Ерөнхийлөгчийн сонгуулийн үр дүнтэй холбоотойгоор тухайн намын удирдлага хариуцлага хүлээдэг хуулийн заалт байхгүй. Ардчилсан нам дотор ямар нэгэн асуудал байхгүй. Хагаралтай мэтээр харагдуулах гэж хичээж байгаа хэсэг бүлэг нөхдийн хүсэл биелэхгүй гэж хэлье" гэдгийг онцоллоо.