М.Тулгат даргатай АН-ынхан нөхөн сонгуульд өрсөлдөх эрхээ авлаа

Монгол Улсын Их Хурлын сонгуулийн 18, 28 дугаар тойрогт явагдах Улсын Их Хурлын гишүүний нөхөн сонгуульд оролцох тухай хүсэлтээ ирүүлсэн 9 нам, нэг эвслийн холбогдох баримт бичгийг Сонгуулийн ерөнхий хороо 2021 оны 8 дугаар сарын 09-10-нд хүлээн авч, нягтлан шалгаад Сонгуулийн ерөнхий хорооны 2021 оны 8 дугаар сарын 13-ны өдрийн хуралдаанаар хэлэлцлээ.

Тус Хорооны хуралдаанаар Үнэн ба Зөв нам, Эрх чөлөөг хэрэгжүүлэгч нам, Ардчилсан нам, Монгол Ардын нам, Шударга Иргэдийн Нэгдсэн Эвсэл нам, Гэр Хороолол Хөгжлийн нам, Дэлхийн Монголчууд нам, Ард Түмний Олонхийн Засаглал нам, Иргэний Зориг Ногоон нам, Зөв хүн-Электорат эвслийг Монгол Улсын Их Хурлын сонгуулийн 18, 28 дугаар тойрогт УИХ-ын гишүүний нөхөн сонгуульд оролцуулахаар бүртгэж, батламж олгохоор шийдвэрлэв.

Нөхөн сонгуульд О.Цогтгэрэл даргатай АН-аас оролцох хүсэлтээ СЕХ-нд өгсөн боловч хүлээж аваагүй байна. Гэвч тэд харуулын ширээн дээр материалаа орхиод явсан гэх мэдээлэл бий. 
Иймд СЕХ-ноос албан бичиг хүргүүлжээ. Ингэхдээ "УИХ-ын гишүүний нөхөн сонгуульд оролцох тухай хуульд заасан холбогдох баримт, бичгийг батлагдсан маягтын дагуу хүлээн авсан болно. Иймд танай ирүүлсэн баримтыг хүлээн авах боломжгүй тул Иргэдээс төрийн байгууллага албан тушаалдтанд өргөдөл гомдол гаргах тухай хуулийн 14 дүгээр зүйлийн 1.3-т заасны дагуу үүгээр буцаан хүргүүлж байна” гэжээ.

Ингэснээр М.Тулгат даргатай АН-ынхан нөхөн сонгуульд оролцохоор боллоо.

Нөхөн сонгуульд оролцохоор бүртгүүлсэн нам, эвсэл болон бие даан нэр дэвшигчид нь нэр дэвшүүлэх ажиллагааг Монгол Улсын Их Хурлын сонгуулийн тухай хуульд заасны дагуу 2021 оны 8 дугаар сарын 26-ны өдрөөс эхлүүлж, долоо хоногийн хугацаанд буюу 9 дүгээр сарын 01-ний өдрийг дуусталх хугацаанд явуулах юм.