ОХУ-аас 13550 тонн, БНХАУ-аас 12250 тонн шатахуун импортолжээ

Монгол Улсын газрын тосны бүтээгдэхүүний нийт хэрэглээний 95 хувийг ОХУ, таван хувийг БНХАУ хангадаг. Өчигдрийн /2021.10.25/ байдлаар ОХУ-аас 13550 тонн, БНХАУ-аас 12250 тонн, нийт 25800 тонн АИ-92 автобензин импортлоод байгаа талаар салбар яамнаас мэдээллээ.

Энэ сард ОХУ-ын "Роснефть" НХН-ийн Ангарскийн ГТБҮ-ээс 54880 тонн, БНХАУ-ын "Петрочайна интернейшнл" компанийн Хөх хотын ГТБҮ-ээс 20000 тонн АИ-92 автобензин импортлохоор төлөвлөсөн. Ангарскийн ГТБҮ-ийн үйл ажиллагаа өнгөрсөн 17-ноос эхлэн тогтворжиж, хоногт 17-95 вагон буюу 1000-5500 тн АИ-92 автобензины ачилтыг хийж эхэлжээ.

Мөн Хөх хотын ГТБҮ-ээс 25-наас эхлэн 7750 тонн АИ-92 автобензиний ачилтыг хийж эхэлсэн байна. Улаанбаатар хот болон бусад суурин газруудад АИ-92 автобензины түгээлтийг шуурхай хийж байгаа аж.

Тухайлбал, аравдугаар сарын 23-25-ны өдрүүдэд
 

• Баруун бүсийн Цагааннуур, Боршоо боомтоор АИ-92 автобензиний хангамж түгээлт хэвийн явагдаж байна.
   
• Улаанбаатар хот болон зарим нэг суурин газруудын агуулахаас НИК, МТ, Тэс петролеум, Шунхлай, Газ-Ойл, Ундрага Увс, Монсуль зэрэг ААН-үүд Төвийн болон Хангайн бүсийн аймгууд болох Төв, Говь-Алтай, Увс, Баянхонгор, Архангай, Өвөрхангай, Дундговь, Өмнөговь, Булган, Сэлэнгэ, Говьсүмбэр зэрэг аймаг, зарим сумдад 570 орчим тонн, Зүүн 3 аймагт 150 тонн АИ-92 автобензин ачуулан түгээлт хийсэн.
   
• НИК, МТ, Сод монгол, Шунхлай ХХК-нууд нь Дархан, Эрдэнэт өртөөнд 16 вагон цистерн буюу 960 орчим тонн АИ-92 автобензин буусан ба Орхон, Дархан-Уул, Хөвсгөл, Булган, Сэлэнгэ зэрэг аймагт түгээлт хийж эхэлсэн. Түүнчлэн Ангарскийн ГТБҮ-ээс Баянтүмэн өртөө хаягаар /Чойбалсан хот/ 10 дугаар сарын 21-нд 5 вагон цистерн буюу 300 тонн АИ-92 автобензин ачсан болно.

ОХУ-ын Ангарскийн ГТБҮ-ээс аравдугаар сарын 23-ны өдрөөс ачилтын хэмжээ эрс нэмэгдэн 95 вагон цистерн ачсан ба уг ачилтаас 47 вагон цистерн буюу 2800 орчим АИ-92 шатахууныг Дархан, Эрдэнэт, Сүхбаатар, Сайншанд, Чойр, Чойбалсан зэрэг хот суурин газруудад хаяглан ачилтыг хийсэн ба аравдугаар сарын 27-ноос тухайн бүс нутагт түгээлт хийгдэн хангамж жигдэрч эхэлнэ.

Монгол Улсын АИ-92 автобензины хоногийн дундаж хэрэглээ 1330 тонн, Үүнээс Улаанбаатар хот-850 тонн, Хангайн болон Төвийн бүс-265 тонн, Баруун болон Зүүн бүсийн хэрэглээ 215 тонн орчим байдаг талаар мэдээллээ.