СУРВАЛЖИЛГА: "Барс" захад 7000 төгрөг байсан чинжүү 23000 хүрчээ

Эрээний хилийн боомт хаагдсанаас дөрөв хоногийн дараах “Барс” худалдааны төвийн нөхцөл байдлыг сурвалжлан хүргэж байв. Тухайн үед хил хаагдсанаас үүдэн нарийн ногооны хомсдол үүсэж, улмаар нөөцөлсөн цөөн ногоо, жимс үнэд орсон талаар мэдээлсэн.

Тэгвэл хилийн боомт хаагдсанаас гурван долоо хоногийн дараа “Барс” худалдааны төвд нарийн ногоо, жимсний тасгуудаар дахин орлоо.

Жимс, ногооны тасгууд өндөр үнэтэй Орос бүтээгдэхүүнээр дүүрчээ

Нарийн ногоо, жимсний хомсдол үүссэн байх хэмээн дотогш ортол лангуу дүүрэн ногоо, жимстэй байлаа. Харин үнийн хувьд өмнөхөөсөө дахиад л өсжээ.

Нэгэнт хил хаагдсантай эвлэрсэн наймаачид хойд хөрш болох ОХУ-аас ногоо, жимсээ татах болсон байна. Ногооны тасгаар явах төдийд л “Оросын помидор, огурцы байна шүү” гэх наймаачдын дуу чихнээ сонсогдоно. 

Хаа нэг “Дэвшил трейд” компанийн Монгол өргөст хэмх харагдах хэдий ч энэ нь Орос өргөст хэмхтэй адил өндөр үнэтэй байлаа.

Тухайлбал Орос ногоо:

• Орос чинжүү - 23,000
• Орос улаан лооль - 16.000
• Монгол улаан лооль - 15.000
• Орос өргөст хэмх - 12.000
• Орос үрлэн помидор - 25.000
• Орос сармис - 25.000
• Цоо байцай - 12.000

Харин “Дэвшил трейд” компанийн ногоо:

• Өргөст хэмх - 14.000
• Улаан лооль - 18.000
• Бууцай - 10.000 /300гр/ төгрөгийн үнэтэй байна.

 “Оросууд Хятадаас татаж авсан жимсийг эргээд бид Оросоос өндөр үнээр авч байна”

Жимсний тасгаар орлоо. Энд өмнөх шиг хоосон лангуу нэг ч алга. Цэвэрхэн, өнгөлөг жимсээр лангуунууд дүүрчээ.

Жимсний тасгийн худалдагч “Хятадын жимс гэж байхгүй болж байна. Нөөцөлсөн байсан цөөн хэдэн Хятадын хатаасан жимс л байгаа. Бусдыг нь Оросоос татаж байна” гэлээ.

Харин Оросоос хэрхэн жимс татаж байгаа талаар бөөний төвийн наймаачин “Оросоос бараа татахад илүү хол учир тээвэрлэлтийн үнэ өндөр байдаг. Эрээн Монгол хоёрын хооронд 1300 км зайтай. Гэтэл Орос руу ирж очихын 3000 км байна. Тэгэхээр тээвэрлэлтийн үнэ нь мэдээж өндөр гарна” гэлээ.

"Орос жимстэй болохоор жимс нь ч илүү цэвэрхэн болсон нь ажиглагдлаа" гэхэд тэрбээр “Цэвэрхэн хэдий ч үнэтэй байна. Үнэндээ яг л адилхан сортын жимснүүд байгаа. Бас л Хятадаас татаж авсан жимснүүд шүү дээ. Оросууд Хятадаас татаж авсан жимсийг эргээд бид Оросоос худалдаж аваад байна гэсэн үг. Харин Хятад бүтээгдэхүүнээ гаргахдаа Орос руу илүү цэвэрхэн сав баглаа боодолтойг экспортолж байгаа юм. Яг үнэндээ бол адилхан сортынх, Хятад жимс, ногоонууд байгаа. Оросууд помидор болон нарийн ногоогоо Манжуураас авдаг. Тэгээд л эргээд бидэнд зарж байгаа юм” хэмээн учирлав.

“Зөвхөн “Жин туул”-ын боорцогны үнэ л нэмэгдсэн”

“Жин туул” компанийн бүтээгдэхүүний үнэ нэмэгдсэн гэх сургаар гурилан бүтээгдэхүүний тасгаар оров. Энд худалдан авагч хомс байлаа.

“Жин туул”-ын боорцог байгаа юу гэхэд л худалдагч “Жин туулын боорцог үнэтэй байгаа” гэх хариултыг өгөв. Түүний энэ хариу үйлдлээс харахад худалдан авагчдын үнэтэй байна гэх бухимдуу үгнээс халгаж буй нь ажиглагдав.

Түүнээс лавлан асуухад 14 хоногийн өмнөөс “Жин туул”-ын боорцгийн үнэ 1000-2500 төгрөгөөр нэмэгдсэн. Уг нь гурилын үнэ 200 төгрөгөөр өссөн байхад гурилан бүтээгдэхүүний үнэ нь ингэж эрс нэмэгдсэнийг гайхаж байна. Зөвхөн “Жин туул”-ын боорцог л өндөр үнэтэй болсон. Бусад үйлдвэрийн боорцгийн үнэ хэвийн байгаа” гэлээ.

Тухайлбал “Жин туул”-ын  4800 төгрөгөөр худалдаалагдаж байсан “шагшуурга” гэх боорцог ганцхан хоногийн дотор 6500 төгрөг болжээ. Үүнээс болоод тухайн үйлдвэрийн боорцгийн худалдан авалт буурсан. Гэхдээ цөөн хэдэн байнгын хэрэглэгчид нь авч байгаа аж.