Хүсэл биелүүлдэг “Бадар хундага” нууранд ерөнхийлөгч Ц.Элбэгдорж алтан ембүү өргөжээ

 Төрийн их тахилгат уул Отгонтэнгэрийн Очирваань хайрхнаа Монгол төр  дөрвөн жилд нэг удаа тахидаг. Энэ удаагийн ёслол өнгөрсөн 6-р сард болж Завхан руу ёстой нь хөлтэй нь хөлхөж, хөлгүй нь мөлхөж очсон. 21 аймгийн 330 гаруй сум болгоноос иргэд олноороо зорин очсон болохоор хүн машин битүү байв. Тэр тусмаа хүсэл биелүүлдэг гэдэг “Бадар хундага” нуур руу зорьж, хүслээ шивнэн өөрсдийгөө даатгах гэсэн хүсэлтэй мөргөлчид маш олон байлаа. Дөрвөн жилийн өмнө болсон тахилгын үеэр гурав дахь ерөнхийлөгч жийп машинаар ирж, мориор "Бадар Хундага"  нуур руу очин мөнгөн ембүү өргөж байсан бол одоогийн төрийн тэргүүн нисдэг тэрэг хөлөглөн ирж алтан ембүү өргөжээ. Монгол улс болон түмэн олноо даатгаж буй ерөнхийлөгчөө харсан ард түмэн "Амьдрал аргагүй сайжирчээ.  Дараагийн тахилгын үеэр ерөнхийлөгчөө дагаад ард түмний амьдрал адилхан сайжрах биз" хэмээн бэлэгшээж байна. Амны бэлгээс ашдын бэлэг гэдэг. Санасан бүхэн сэтгэлчлэн бүтэхийн сайхан ерөөл тавья.

Б.Эрдэнэ.

Zindaa.mn-Үндэсний чөлөөт мэдээллийн портал