ОХУ цөмийн дайнаас сэргийлэх тухай МЭДЭГДЭЛ ГАРГАВ

ОХУ-ын Гадаад хэргийн яамнаас цөмийн дайнаас урьдчилан сэргийлэх тухай мэдэгдэл гаргалаа.

Тус мэдэгдэлд “ОХУ нь НҮБ-ын Аюулгүйн Зөвлөлийн байнгын гишүүн болон цөмийн зэвсэгтэй гүрнүүдийн нэг болохын хувьд Цөмийн зэвсгийг үл дэлгэрүүлэх тухай гэрээний дагуу олон улсын аюулгүй байдал ба стратегийн тогтвортой байдлыг бэхжүүлэх асуудалд онцгой хариуцлагатай хандаж, тодорхой үүрэг хүлээдэг.

ОХУ цөмийн зэвсгийг тогтоон барих чиглэлээр бодлого хэрэгжүүлэхдээ “Ялагч гэж байдаггүй, хэзээ ч өрнүүлж болохгүй цөмийн дайныг хүлээн зөвшөөрөх боломжгүй” гэсэн зарчмыг хатуу бөгөөд тууштай баримталдаг” гэжээ.

ОХУ цөмийн зэвсгийг ямар тохиолдолд ашиглах вэ?

Оросын Гадаад хэргийн яамны мэдэгдэлд мөн “ОХУ нь зөвхөн үй олноор устгах зэвсэг ашиглан үйлдсэн түрэмгийлэл, эсвэл ердийн зэвсэг ашигласнаар улс орны оршин тогтноход аюул заналхийлэл учруулсан түрэмгийллийн хариуд л цөмийн зэвсгийг ашиглан хариу үйлдэл үзүүлэхийг зөвшөөрдөг” гэжээ.

ОХУ Цөмийн дайнаас урьдчилан сэргийлэх, зэвсгээр хөөцөлдөхийг хүлээн зөвшөөрөхгүй байх тухай цөмийн зэвсэгтэй таван улсын удирдагчдын хамтарсан мэдэгдэлд заасан зүйлсийг тууштай баримталж байгаагаа бүрэн нотлох аж.

Мэдэгдэлд “Манай улсын үндэсний аюулгүй байдлыг алдагдуулах гэсэн хариуцлагагүй, увайгүй үйлдлүүдийн үр дүнд бий болсон өнөөгийн хүнд хэцүү, эмх замбараагүй нөхцөл байдалд бид аливаа цэргийн мөргөлдөөнөөс урьдчилан сэргийлэх нь цөмийн гүрнүүдийн нэн тэргүүний зорилт болоод байна гэдэгт бат итгэлтэй байна” гэж өгүүлжээ.