Г.Мөнхбат: "Гоёл 23" наадамд олны танил болоогүй 50 загвар өмсөгч ОРОЛЦОНО

Монголын загварын ертөнцийн хамгийн нэр хүнд бүхий "Гоёл 23" наадмын гала тоглолт энэ сарын 27-ны өдөр Шангри Ла зочид буудалд зохион байгуулагдана. Ирэх оны загварын чиг хандлагыг тодорхойлдог тус наадмын урьдчилсан шалгаруулалт өнөөдөр /2022.11.23/ "Holiday Inn" зочид буудлын их танхимд эхэлсэн бөгөөд маргааш, нөгөөдөр хоёр өдөр үргэлжилнэ.  35 дахь удаагийн "Гоёл 23" наадмын талаар Монголын Дизайнеруудын холбооны менежер Г.Мөнхбаттай ярилцлаа.

-Энэ жилийн "Гоёл" наадмын онцлог юу байх вэ?

-Энэ жил бид 18-22 насны загвар өмсөгчдийн дунд шалгаруулалт зохион байгуулж, шилдэг 50 залууг сонгож авсан байгаа. Тэд маань энэ жил "Гоёл" наадамд анх удаа тайзан дээр гарна. Шинэ моделиудаар, шинээр төрнө гарна гэсэн үг. Энэ нь өмнөх жилүүдээс онцлог үйл явдал юм. Мөн бид өргөрсөн хугацаанд "Гоёл" наадмыг зохион байгуулахдаа МХО, СТӨ-г сонгодог байсан бол энэ удаад илүү том танхимд, өндөр түвшинд буюу Шангри Ла-д зохион байгуулахаар болсон.

-Тэгэхээр энэ жилийн тэргүүн мисс олны танил болоогүй залуу моделиудаас тодорч магадгүй юм байна. Өнгөрсөн жилүүдийн ялагч, топ загвар өмсөгчид оролцох уу?

-Шинээр сонгогдсон моделиудад өндөр найдвар тавьж байна. Мэдээж, уламжлалын дагуу өнгөрсөн жилийн топ моделиудаа урилгаар оролцуулна. Нөгөөтэйгүүр үзэгчид тэднийг жил бүр тайзнаа харахыг хүлээж байдаг.

-Загварын долоо хоног өнөөдөр албан ёсоор эхэлж байна. Өдөр өдөртөө шилдгүүдээ шалгаруулаад явах уу?

-Тиймээ. Арваннэгдүгээр сарын 23-25-ны өдрүүдэд загварын долоо хоног үргэлжилж, шилдгүүдээ шалгаруулна. Өнөөдрийн хувьд гэхэд таван шүүгч ажиллаж байна.

-Өнөөдөр ямар загвар зохион бүтээгчдийн загвар тайзнаа тавигдав?

-Бид гурван өдрийн турш барууны хэв маягаар фэйшн шоу зохион байгуулахаар төлөвлөж байна. Өнөөдрийн хувьд эхлээд ноос ноолуран эдлэлийн брэнд "Bodio`s", түүний араас "U one" брэнд, "Иш Чоогоо", "Ундрах", "Түмэн Торго", "Дөрвөн Арвайт" зэрэг загварын агентлаг, загвар зохион бүтээгчдийн загварууд танилцуулагдлаа. Маргааш "Бэби камель кашмер", "Сугармаа", "Урлахуй", "Dew" брэнд, "отгон, "Amin" брэндүүд загвараа сонирхуулах бол 25-ны өдөр "Эртний Монгол хийц", "Altjin fashion", "Батзогсоол", Болормаа, "Эвсэг", "Шилмэл загвар"-ын бүтээлүүд танилцуулагдана. Эндээс шалгарсан агентлаг, дизайнерууд 27-ны өдөр Шангри Ла-д шилдгийн төлөө өрсөлдөнө.

-Загварын ертөнцийн томоохон наадам гэх утгаараа оролцогчдын тоонд лимит тогтоодог уу?

-Тогтооно. Учир нь загварын чиглэлээр Монголд үйл ажиллагаа явуулдаг гадаад, дотоодын маш олон дизайнер, агентлагууд байдаг. Тиймээс бид улсдаа хамгийн томд тооцогдох энэ наадамдаа зөвхөн үндэснийхээ дизайнеруудыг оролцуулахыг зорьдог.