Х.Нямбаатар: Нүүрсний хамгийн том хулгайн хэрэгт Х.Баттулга хамаатай

Засгийн газрын ээлжит бус хуралдаан өнөөдөр /2022.12.12/ боллоо. 

Хуралдаанаас “Эрдэнэс Тавантолгой” компанид олон улсын аудит оруулж, аудитыг сонгон шалгаруулалтаар зарлах тухай шийдвэр гаргажээ. Мөн “Эрдэнэс Тавантолгой” компанийн IPO гаргаж, ажлын хэсгийн ахлагчаар Д.Амарбаясгаланг томилсон зэрэг мэдээллийг Хууль зүй, дотоод хэргийн сайд Х.Нямбаатар өглөө.

Энэхүү мэдээллийн үеэр Үндэсний аюулгүй байдлын зөвлөл (ҮАБЗ)-ийн хурлын тэмдэглэлийг ил болгох боломжтой эсэх талаар сэтгүүлчийн асуултад тэрбээр дараах тайлбарыг өглөө. 

Хууль зүйн сайд мэдээлэлдээ "ҮАБЗ-ийн зөвлөмжийг ил болгох эсэх асуудлыг би хэлэх албан тушаалтан биш. Үүнийг Ж.Энхбаяр даргаас тодруулах нь зүйтэй. Цаашид ҮАБЗ-өөр аж ахуйн шинжтэй гэрээ хэлэлцээ байгуулах, төрийн худалдан авалтыг шууд шийдэж, нууцад хамруулах процессийг хориглож өгнө.

Оффтэйк гэрээтэй холбоотой дийлэнх зөвлөмж Ерөнхийлөгч асан Х.Баттулгын үед гарсан. Тухайлбал, 2008 онд хувийн компани Гашуунсухайтын төмөр зам барих гэж байхад зогсоосон хүн нь нөхөр Х.Баттулга. Дараа нь бондын 280 сая ам.доллараар төмөр зам барих ажлыг гардан зохион байгуулсан хүн нь мөн л нөхөр Х.Баттулга. Тэр мөнгөөрөө уг төмөр замын ажлыг дуусгалгүй далангийн ажил хийгээд зогссон.

Дараа нь “Бодь интернэшнл" компаниар төмөр замын ажил гүйцэтгүүлэх зөвлөмж гаргасан хүн нь мөн л Х.Баттулга. Энэ хүн хамгийн түрүүнд шалгуулах ёстой.

Нүүрсний хамгийн том хулгайн хэрэгт шалгагдах ёстой хүн нь Ерөнхийлөгч асан, ҮАБЗ-ийг тэргүүлэгч асан Х.Баттулга.

Одоогоор эрүүгийн хэрэг үүсгээгүй байгаа тул таслан сэргийлэх арга хэмжээ авах нь хориотой. Оффтэйк гэрээтэй холбоотой асуудлаар эрүүгийн хэрэг үүсгэсэн талаарх мэдээлэл алга.

Х.Баттулга 2017, 2018 онд өөртэйгөө холбоотой яллагдагчаар татагдаж байсан бүх хэргээ хэрэгсэхгүй болгуулсан тул сэргээх ёстой гэж бодож байна" гэлээ.