Д.Амарбаясгалан: ӨМС мэдээллээ цаг тухай бүрт нь шинэчлээгүйгээс алдаа гарлаа

Хүүхдийн мөнгөний бүртгэлийн алдаатай мэдээллийн талаар Засгийн газраас мэдээлэл өгч байна. /2023.01.17/

Энэ үеэр ЗГХЭГ-ын дарга Д.Амарбаясгалан "Өчигдрөөс эхлэн хүүхдийн мөнгө олгох журам хэрэгжсэнтэй холбогдуулан E-halamj систем рүү иргэд нэвтрэхэд мэдээллийн зөрүүтэй байдал, алдаа гарсныг бид хүлээн зөвшөөрөх ёстой. Хамгийн том алдаа нь өрхийн мэдээллийн нэгдсэн сан дээр гарч ирээд байна. Өрхийн мэдээллийн сан нь нэгжийн бага түвшиндээ мэдээллээс зохих хасалтыг цаг тухайд нь хийдэггүй, мэдээллээ цаг тухай бүрт нь шинэчлээгүйн улмаас давхардал зөрүү үүсэж, алдаа болсныг бид хүлээн зөвшөөрч байна. 

Хүүхдийн мөнгөний талаар мэдээлэл өгч байгаа НДЕГ, ХХҮЕГ, АТҮТ, ҮСХ, УБЕГ, ТЕГ гэх зургаан байгууллагууд нь хоорондоо мэдээллээ солилцдоггүй, уялдаагүй ажиллаж байгаагаас тус асуудал үүсээд байна. Иймд эдгээр алдаа, дутагдлаас үүдэж, олон нитийг бухимдуулсандаа Монгол Улсын Засгийн газрын зүгээс хүлцэл өчиж байна. 

Монгол Улсад анх удаа төр өөрт байгаа мэдээллээ нэгтгэж, олон улсын жишигт нийцсэн аргачлалаар хүүхдийн мөнгө олгох ажлыг хийж эхэлсэн нь энэ юм. Тиймээс бид гарсан алдааг засварлаж, цаашид цахимжих ажлаа улам бүр шинэчлэн ажиллана гэдгээ илэрхийлж байна.

Системд таныг хүүхдийн мөнгөө авна гэсэн өрхүүдийн хүүхдийн мөнгө ямар нэгэн асуудалгүйгээр олгогдоно. Харин зөрчилтэй буюу тухайлбал, байр, орон сууц, автомашины бүртгэлийн давхардлаас үүдэж, өндөр орлоготой болж харагдаад байгаа, хүүхдийн мөнгөнөөс хасагдаж байгаа гэх ойлголт төрж буй иргэдийн мэдээллийг шинэчлэх ажлыг 14 хоногийн хугацаанд Засгийн газраас зохион байгуулна. Энэ хугацаанд төр иргэдтэйгээ хамтарч ажилласны үндсэн дээр мэдээллийнхээ санг шинэчлэх, анхан дунд шатны бүртгэлийн байгууллагуудын эрчимтэй үйл ажиллагааг зохион байгуулна. Ингэснээр хүүхдийн мөнгө авах ёстой айл өрхийн хүүхдүүдийг бүрэн хамруулах болно" гэлээ