Өмнөх дүрээ бүгдийг нь санадаг Пако Рабан нас барлаа

Францын загвар зохион бүтээгч Пако Рабан 88 настайдаа энэ ертөнцийг орхин одлоо.

Пако бол загварын ертөнцийн хамгийн этгээд, нууцлаг нэгэн байлаа.

Түүнийг төрөхөд нь Франсиско Рабанеда-и-Куэрво нэр хайрлажээ.

Тэрээр Испанийн Баск нутагт төрсөн бөгөөд аав нь Бүгд найрамдах намыг дэмждэг, 1939 онд Франкогийн фашист дэглэмд алагдсан юм.

Үүний дараа коммунист үзэлтэй ээж нь хүүхдүүдээ дагуулаад Франц руу зугтжээ.

1960 онд  Пако Рабан хуванцар эдлэлийн бизнес эрхэлж байгаад 1966 онд анхны загварын тоглолтоо хийж байлаа.

Тэрээр хар арьст моделиудыг тайзанд гаргасан анхны загвар зохион бүтээгч юм.

Рабан “Намайг марксист ээж, удган эмээ хоёр өсгөсөн болохоор би сэтгэл санааны хувьд прагматик болсон” гэж ярих дуртай байв.

Пако “Би 78 мянган настай. Би өмнөх дүрүүдээ бүгдийг нь тод санадаг. XVIII зуунд би Парисын алдартай биеэ үнэлэгч байсан. Том, гоё хөхтэй, их мөнгө олдог байсан” гэж тоглоом хийдэг байв.